Jesusta jap’inku

Jesusqa apostolkunawanmi Cedrón wayq’onta purispa Olivos orqoman rirqanku. Kuska tuta masñan karqan killapas junt’an kasharqan. Getsemaní huertaman chayaqtinkun Jesusqa paykunata nirqan: “Kaypi rijch’ashaqlla suyawaychis”, nispa. Jesustaq chhikan ukhuman jaykurqan, sinchita llakikuspataq Jehová Diosta nirqan: “Munayniyki ruwakuchun”, nispa. Jinan Jehová Diosqa juj angelta kachamurqan Jesusta kallpachananpaq. Kinsa apostolninkunaq kasqanman kutimuqtinmi Jesusqa rikurqan puñushasqankuta. Jinan nirqan: “¡Sayariychis, manan puñunaykichis tiempochu! Horan chayarqamun enemigoykunaq makinpi kanaypaq”, nispa.

Chay ratupin Judas Iscariote chayamurqan askha runakunawan, paykunaqa espadantin k’aspintin iman jamurqanku. Judasqa yacharqanmi maypi Jesús kashasqanta, sapa kutilla chay huertaman risqankurayku. Judasmi soldadokunata nirqan: “Noqan Jesusta rikuchisaykichis”, nispa. Jinan Jesusman qayllaykuspa “yachachikuq” nispa much’aykurqan. Jesustaq nirqan: “Judas much’aykuwaspachu traicionawanki”, nispa.

Jesusqa ñaupaqman rispan tapurqan: “¿Pitan maskhashankichis?”, nispa. Soldadokunataq nirqanku: “Jesustan”, nispa. Paytaq nirqan: “Noqan kani”, nispa. Jinan qhepaman kutirispanku pampaman wijch’ukurqanku. Wajmantan Jesusqa tapurqan: “¿Pitan maskhashankichis?”, nispa. Paykunataq nirqanku: “Jesustan”, nispa. Jesustaq nirqan: “Noqan kani niykichistaq. Kay runakunaqa ripullachunku”, nispa.

Pedroqa Jesusta jap’inankuta reparaspan espadanta orqorqan, jinan uma sacerdoteq esclavonpa ninrinta qhorurqan, chay esclavoq sutinmi karqan Malco. Jesusmi ichaqa kaq ratu llamiykuspa qhaliyachirqan. Pedrotataq nirqan: “Espadaykita waqaychay, espadawan maqanakuqqa, espadallawantaqmi wañuchisqa kanqa”, nispa. Apostolkunaqa ayqekurqankun. Jesustataq jap’ispa makinkunata wataspa uma sacerdote Anaspa wasinman aparqanku. Anastaq Caifaspa wasinman apachirqan. Ichaqa, ¿iman pasarqan apostolkunawan?