Discipulokuna santo espirituta chaskinku

Jesús janaq pachaman ripusqanmantaqa chunka p’unchayñan pasarqan. Jinan discipulokunaqa santo espirituta chaskirqanku. Chayqa pasarqan 33 wata Pentecostés Fiestapin, chay fiestamanmi askha nacionkunamanta runakuna Jerusalenman jamurqanku. 120 discipulokuna jinan altos cuartopi juñusqa kasharqanku. Jinan qonqaylla qallu jina nina rauraykuna sapankankuq uma patanman tiyaykurqan, jinaspa juj rimaykunapi rimayta qallarirqanku. Jinaspapas chay wasipin sinchi wayra suenayta uyarikurqan.

Jerusalenman riq runakunan chay suenayta uyarispa phawaylla rirqanku imachus pasasqanta yachanankupaq. Anchatan admirakurqanku Jesuspa discipulonkuna juj rimaykunapi rimasqankuta uyarispa, jinan nirqanku: “Kay runakunaqa Galileamantan kanku, ¿imaynapitaq rimayninchispiri rimashanku?”, nispa.

Jinan Pedroqa juj apostolkunapiwan runakunaq ñaupanpi sayarirqanku. Jinaspa Pedro nirqan: “Qankunan Jesusta wañuchirqankichis, Jehová Diosmi ichaqa kausarichipun, kunanqa janaq pachapin Diospa paña ladonpi kashan. Jinaspa prometewasqanku santo espirituta qowanku, chaymi rikurqankichis uyarirqankichispas kay milagrokunata”, nispa.

Jinan runakunaqa anchata admirakurqanku, Pedroq rimasqantaq sonqonkuman chayarqan, chaymi tapurqanku: “¿Imatan ruwanayku?”, nispa. Pedrotaq nirqan: “Juchaykichismanta pesapakuspa Jesuspa sutinpi bautizakuychis. Chaymi santo espirituta chaskinkichis”, nispa. Jinan chay p’unchay 3000 runakuna jina bautizakurqanku. Chaymantapachan Jerusalenpi aswan askha discipulokuna yapakurqanku. Apostolkunaqa santo espirituq yanapayninwanmi iñiq t’aqakunata jatarichirqanku, chhaynapin discipulokunaman yachachirqanku Jesuspa llapa kamachisqanta.