Manan imawanpas jark’achikurqankuchu

Mana puriyta atiq runan temploq punkunpi limosnata mañakuq. Juj tardenmi Pedrowan Juanwan temploman jaykusharqanku, jinan chay runaqa nirqan: “Imallatapas qoykuwaychis”, nispa. Pedrotaq nirqan: “Qolqemanta aswan valorniyoqta qosayki. ¡Jesuspa sutinpi puririy!”, nispa. Jinan Pedro makinmanta aysaqtin runaqa sayarispa puriripurqan. Runakunaqa anchatan admirakurqanku chay milagromanta, jinaspa Jesuspa discipulon kanankupaq bautizakapurqanku.

Sacerdotekunapas saduceokunapas sinchitan phiñakurqanku. Apostolkunata jap’ispankutaq juzgananku salaman aparqanku. Jinaspa tapurqanku: “¿Pin atiyta qorqasunkichis chay runata qhaliyachinaykichispaq?”, nispa. Pedrotaq nirqan: “Chay atiytaqa wañuchisqaykichis Jesucriston qowarqanku”, nispa. Paykunataq nirqanku: “¡Aman Jesusmantaqa rimankichischu!”, nispa. Apostolkunataq nirqanku: “Paymantaqa rimanaykupunin, manan upallakusaqkuchu”, nispa.

Jinan Pedrotapas Juantapas kacharipurqanku, paykunataq discipulokunaman willarqanku imachus pasasqanta. Chaymi llapanku Diosmanta mañakurqanku: “Yanapawayku mana manchakuspa rimashanallaykupaq”, nispa. Jinan santo espirituta chaskispa predicashallarqanku milagrokunatapas ruwashallarqanku. Aswan askha runakunataq Jesuspi iñipurqanku. Saduceokunan ichaqa apostolkunata carcelman wisq’arqanku. Chay tutan ichaqa Diospa angelnin carcelpa punkunta kichaspa nirqan: “Temploman rispa predicashallaychis”, nispa.

Qhepantin p’unchaymi juj runa salapi kaq umalliqkunaman willarqan: “¡Carcelpa punkunkunaqa wisq’asqan kashan, wisq’achisqaykichis runakunan ichaqa templopi kashanku runakunaman predicaspa!”, nispa. Chaymi apostolkunata jujmanta jap’imuspanku juzgananku salaman apamurqanku. Uma sacerdotetaq nirqan: “¡Kamachirqaykichismi Jesusmanta ama rimanaykichispaq!”, nispa. Pedrotaq nirqan: “Diostan ñaupaqtaqa kasukunayku runakunata kasukunaykumantaqa”, nispa.

Jinan chay umalliqkunaqa apostolkunata wañuchiytaraq munarqanku. Ichaqa Gamaliel sutiyoq fariseon sayarispa nirqan: “¡Kay runakunawanqa yaqapaschá Dios kashan! Dioswanqa manan maqanakuytaqa munawaqchischu ¿riki?”, nispa. Payta kasukuspankun kacharipurqanku, k’aspiwan maqaspataq kamachirqanku amaña predicanankupaq. Apostolkunan ichaqa mana manchakuspa Jesusmanta predicashallarqanku templopipas wasin-wasintapas.