Jesús Saulota ajllan

Sauloqa Roma nacionmantan karqan. Payqa fariseon karqan, allintan yacharqan judiokunaq leyninmanta, cheqnikurqantaqmi cristianokunata. Chaymi warmitapas qharitapas carcelpi wisq’achirqan. Rikurqanmi millay runakuna rumiwan ch’aqespa Estebanta wañuchisqankutapas.

Sauloqa waj llaqtamanta cristianokunatapas wisq’achiytan munarqan. Chaymi uma sacerdotemanta permisota mañakurqan Damasco llaqtapi kaq cristianokunatapas qatikachananpaq. Llaqtaman chayashaqtinmi qonqaylla juj k’anchayta rikurqan, jinaspa pampaman wijch’ukurqan. Juj kunkataq nirqan: “Saulo, ¿imaraykun qatikachawanki?”, nispa. Saulotaq nirqan: “¿Pin kanki Señor?”, nispa. Paytaq nirqan: “Jesusmi kani. Damascota riy, chaypin imachus ruwanaykita willasunkiku”, nispa. Chay ratupin Sauloqa ñausayapurqan, jinan makinmanta llaqtaman pusarqanku.

Damasco llaqtapin tiyarqan Ananías sutiyoq allin iñiyniyoq cristiano. Jesusmi rijuriypi payta nirqan: “Judaspa wasinman riy, recta nisqa calleman, maskhamuytaq Saulota”, nispa. Ananiastaq nirqan: “Señor, payqa discipuloykikunatan carcelman wisq’achimushan”, nispa. Jesustaq nirqan: “Rillay, paytan ajllani waj nacionkunapi predicananpaq”, nispa.

Chaymi Ananiasqa Sauloq kasqanman rispa nirqan: “Wayqéy Saulo, Jesusmi kachamuwan wajmanta qhawarinaykipaq”, nispa. Jinan kaqpacha qhawaripurqan. Chaymi Jesusmanta yachaspa bautizakapurqan. Jinaspa sinagogakunapi cristianokunawan kuska predicayta qallarirqan. Judiokunaqa anchatachá admirakurqanku Jesusmanta predicasqanta rikuspankuqa. Paykunan tapukurqanku: “¿Manachu kay runaqa Jesuspa discipulonkunata qatikachasharqan?”, nispa.

Sauloqa kinsa watan Damasco llaqtapi predicarqan. Judiokunaqa sinchitan cheqnikurqanku, chaymi wañuchinankupaq rimarqanku. Ichaqa cristianokunan chayta yacharuspa Saulota yanaparqanku ayqekunanpaq. Chaypaqmi llaqta perqaq t’oqonta canastapi uraykachirqanku.

Jerusalenman chayaqtintaq Sauloqa hermanokunawan juñukuyta munarqan, paykunan ichaqa Saulota manchakurqanku. Chaymi Bernabé sutiyoq sumaq sonqo hermano Saulota pusarqan apostolkunaman, jinaspa convencerqan cristianoman tukupusqanta. Chaymi Sauloqa paykunawan kuska tukuy sonqo Diosmanta predicarqan. Qhepamanmi Pablo sutiwan reqsirqanku.