Askha runakunan infiernopi creenku
“Infiernotaqa sinchitan manchakuq kani. Mosqoyniypin nina rawrashaqman wikch’uyuwaqku chaymi qaparispay rikch’ariq kani. Chayraykun anchata kallpachakuq kani mana huchallikunaypaq.” (Arline)
IMA niwaqtaq, ¿infiernopichu huchallikuq runakuna ñak’arinku? Askha runakunan chhaynata yuyaykunku. 2005 watapi Escocia nacionpi Saint Andrews nisqa universidadmanta huk yachachiqpa tapusqanman hina, kinsa umalliq religiosomantan huknin creesqa Diosmanta karunchakapuqkuna “yuyaynillankupi wiñaypaq infiernopi ñak’arinankuta”, phisqamanta huktaqmi creesqa nina infiernopi wiñaypaq ñak’arinankuta.
Nina infiernopiqa askha nacionkunapin creenku. 2007 watapin encuesta Gallup nisqa Estados Unidospi apakuran, chaypin yacharanku 70% (pachakmanta qanchis chunka) runakuna infiernopi creesqankuta. 2000 watapi México nacionpi tapusqankuman hinaqa 71% runakunan kaqllatataq creesqaku. Religionwan mana chhaqrukuq nacionkunapipas creenkun infiernopiqa. Argentinapi 40% runakuna creesqaku, Españapitaq 30%. 2004 watapi tapusqankuman hina, Canadá nacionpipas 42% creesqaku, Gran Bretañapitaq 32%.
¿Imatan iglesiakunapi yachachinku?
Askha religionpi umalliqkunan manaña yachachinkuchu huchallikuq runakuna nina rawray infiernopi ñak’arinankuta. Aswanmi kunanqa 1993 watamanta Iglesia Catolicapi Catecismoq nisqanman hina yachachinku: “Infiernopi ñak’ariyqa Diosmanta wiñaypaq t’aqakuymi”, nispa.
Chaywanpas askha runakunan creeshankuraq infiernoqa nina rawraypi ñak’ariy kasqanta. Chaypi creeqkunaqa ninkun: “Biblian chayta yachachin”, nispa. Centro teológico Southern Baptist Theological Seminary nisqamanta presidente Albert Mohler sutiyoq runapas sut’itan nin: “Nina infiernoqa Bibliaq yachachisqanpunin”, nispa.
¿Imaraykun yachanayki cheqaqpunichus creesqayki chayta?
Sichus infierno nina rawraypi ñak’ariy chayqa, manchakunapaqmi kanman. Ichaqa sichus chay yachachiy mana cheqaqchu chayqa, yanqan religionpi umalliqkuna askha runakunata pantachishanku manchachishanku ima. Manan chayllaraqchu, Diostan qhawarichishanku millay mana khuyapayakuq Diosta hina.
¿Ima ninmi Biblia infiernomanta? Qatimuq temakunapin chaymanta yachasunchis, chaypin catolicokunaq protestantekunaq Biblianwan kay tapukuykunata sut’inchakunqa: 1) ¿Maymanmi rinchis wañupuqtinchis? 2) ¿Imatan Jesús niran infiernomanta? 3) ¿Imaynatan infiernomanta cheqaqta yachasqanchis yanapawasunman Diosman achhuykunanchispaq?