5: “Mariaqa Diospa mamanmi”, nispan ninku

¿Imaynatan paqarimurqan chay yachachikuy?

Huk libron khaynata nin: “Mariataqa astawanqa yupaychakurqan [...] mana iñiqkuna Iglesia [Catolicaman] haykuqtinkun. [...] Paykunaqa waranqa-waranqa watañan yupaychaqku ‘hatun mama diosa otaq virgen divina’ nisqata, chaymanmi yachasqaña kasharqanku”, nispa (The New Encyclopædia Britannica, 1988).

¿Imanintaq Bibliari?

Khaynatan nin: “Kunanmi wiksallikunki, hinaspan huk qhari wawata wachakunki, paytan Jesusta sutichanki. [...] Ancha Hatun Diospa Churin nisqan kanqa [...] Diospa Churin sutichasqataq kanqa”, nispa (Lucas 1:31-35).

Chaypi nisqan hina, Mariaqa ‘Diospa Churinpa’ mamanmi karqan, manan Diospa mamanchu. Bibliaq nisqan hinaqa manas hanaq pachapas, ancha hatunña kashaspapas, Diosta chaskiyta atinmanchu, ¿chaychu Mariaq wiksanpi kanman karqan? (1 Reyes 8:27.) Hinaspapas, manan hayk’aqpas Mariaqa: “Diospa mamanmi kani”, nirqanchu. Chhaynaqa, ¿imaraykun ninku: “Mariaqa Diospa mamanmi”, nispa? Trinidad nisqapi iñisqankurayku. 431 watapi, Éfeso llaqtapi Concilio nisqa huñunakuypin Mariata suticharqanku: “Diospa Maman otaq Theotokos”, nispa (Theotokos simiqa griego rimaypi “Diosta onqokuq” ninantan nin). Chay Éfeso llaqtapin ñawpaqpi Ártemis nisqa diosata yupaychaqku, chay diosamantan niqku: “Payraykun warmikunaqa onqokuyta atinku”, nispa.

Paypa imagenninmantan niqku: ‘Hanaq pachamantan uraykamun’, nispa, chaymi procesionkunapiraq apaykachaqku. Kaqllatataq kay tiempopipas ruwakun Mariaq imagenninkunawan (Hechos 19:35). Pisi-pisimantan Iglesia Catolicaqa imagenkuna ruwachiyta qallarirqanku yupaychanankupaq.

Kay textokunata leey: Mateo 13:53-56; Marcos 3:31-35; Lucas 11:27, 28.