4: “Diosqa trinidadmi”, nispan ninku
¿Imaynatan paqarimurqan chay yachachikuy?
“Jesuspa nacesqanmanta yaqa tawa pachak wata qhepatan ‘Diosqa Trinidadmi’ nisqa yachachikuyqa astawan saphichakunman karqan, chay watakunapin ‘Diosqa kinsan’, nispa yachachiyta qallarirqanku. Chay watakunamanta ñawpaqtaqa manan anchata yachakurqanchu chaymanta.” (New Catholic Encyclopedia, 1967.)
“325 watapi, 20 mayo killapin Nicea llaqtapi aparikurqan Concilio nisqa huñunakuy, chaypin umallirqan [Roma llaqtata kamachiq] Constantino. Pay kikinmi Iglesiapi umalliqkunata rimanachirqan chay huñunakuypi. Hinallataq nirqan: ‘Yayawan Churiwanqa kaqllan kanku’, nispa. [...] Hinan obispokunaqa manchakuymanta, wakintaq mana munashaspa, firmarqanku chhaynata yachachikunanpaq, iskayllan mana firmarqankuchu.” (Encyclopædia Britannica, 1970.)
¿Imanintaq Bibliari?
Khaynatan nin: “Estebantaq ichaqa Santo Espirituwan hunt’a kaspa, hanaq pachata qhawarispa Diospa lliphlli-kayninta rikurqan, Jesustapas Diospa paña ladonpi sayashaqta rikurqan. Hinaspan nirqan: –¡Qhawariychis! Hanaq pachatan kicharayashaqta rikushani, Jesucristotataq Diospa paña ladonpi sayashaqta”, nispa (Hechos 7:55, 56).
Chaypi nisqan hina, Estebanqa santo espirituwan otaq Diospa kallpanwan hunt’a kaspan Jesusta rikurqan “Diospa paña ladonpi sayashaqta”. Chhaynaqa Jesusqa manan Diosmanchu tukupusqa hanaq pachaman kutipuspa, payqa sapaqmi karqan Yayanmanta. Estebanqa manan kinsatachu rikurqan, aswanmi iskayllata. “Diosqa kinsan” niqkunaqa, maytaña Bibliapi maskharqanku chaypas, manan tarirqankuchu chay yachachikuymanta willaq textokunataqa, chaymi Marie-Émile Boismard sutiyoq sacerdote dominico khaynata qelqarqan: “Nuevo Testamentopiqa manan maypipas kanchu ‘Diosqa kinsan’ nisqaqa”, nispa.
Hatun kamachikuq Constantinoqa Iglesia Catolicapi amaña t’aqanakuy kananpaqmi Trinidad nisqamanta yachachirqan. Ichaqa, chay yachachikuyta paqarichimusqanwanmi rikhurillarqantaq “Mariaqa Diospa mamanmi” nisqa yachachikuypas. ¿Cheqaqchu chay kanman? Qatiqninpi chaymanta yachasun.
Kay textokunata leey: Mateo 26:39; Juan 14:28; 1 Corintios 15:27, 28.
KAYMI CHEQAQ YACHACHIKUYQA:
Jesuspa nacesqanmanta tawa pachak wata qhepatañan Trinidad yachachikuyqa paqarimurqan.