Diosta allinta reqsiy
Diosqa sonqotan qhawan
RUNAKUNAQ rikch’aynillanta qhawaspaqa manan yachasunmanchu imayna runa kasqanta. Runakunaqa runamasinkuq hawallanta rikuspan imaymanata yuyaykunku, Jehová Diosmi ichaqa mana chhaynachu. Chaymantan willashan 1 Samuel 16:1-12 textopi.
Ñawpaq tiempopin Jehová Diosqa huk kamachikuqta akllanan karqan Israel llaqtanpaq, chaymi Samuel sutiyoq profetata nirqan: “Kachasqaykin Belén llaqtapi Isaipa wasinman. Paypa churinkunamantan hukkaqninta akllakuniña”, nispa (versículo 1). Ichaqa manan willarqanchu Isaipa mayqen wawanchus akllasqa kasqanta, chayrayku Samuelqa Belenta rishaspa tapukurqanpaschá: “¿Imaynatataq yachasaq mayqenninta Jehová Dios akllasqanta?” nispa.
Chayaspataqmi Isaita wawankunatawan invitarqan sacrificiota Diosman haywanankupaq, kurak wawan Eliabta hatunkaray kasqanta rikuspan ima hinaraq qhawarirqan, yuyaykurqantaq: “Kaytapunichá Señor Diosqa reypaq akllakurqan”, nispa (versículo 6).
Jehová Diostaq Samuelta nirqan: “Aman qhawankichu rikch’ayninta, hatun kaynintapas, manan paytaqa munanichu”, nispa (versículo 7). Diosqa manan Eliabpa hatun kayninta otaq rikch’aynillantachu qhawan, aswanmi imachus sonqonpi kasqanta.
Pay kikinmi Samuelta nirqan: “Manan ñoqaqa runa hinachu patallanta qhawani, runallan rikch’aynintaqa qhawan, ñoqan ichaqa sonqonta qhawani”, nispa (versículo 7). Jehová Diosqa runaq yuyaykusqanta, sientesqanta, imakuna ukhunpi kasqantan qhawan. Paymi “sonqokunata pruebaqqa” t’aqwiqqa (Proverbios 17:3). Chayraykun Eliabta soqta wawqenkunatapas mana akllarqanchu.
Ichaqa kasharqanraqmi Isaipa sullk’a wawan David sutiyoq, paymi ‘ovejata michimusharqan’ (versículo 11). Chaymi Samuel waqyachimuqtin Jehová Dios nirqan: “Kaymi chay akllakusqay, kunanqa hawiykapuway”, nispa (versículo 12). Davidqa “sumaq rikch’ayniyoq puka uya, munay ñawikunayoqmi karqan”. Ichaqa manan chayraykuchu Diosqa akllarqan, aswanmi sumaq sonqo kasqanrayku (1 Samuel 13:14).
Kunan p’unchaykunapiqa rikch’aynillankupin runakunaqa yuyaykunku, Diosmi ichaqa mana chhaynachu, payqa manan hatun, munay uyayoq kasqanchistachu qhawan, aswanmi sumaq sonqo kayninchista qhawan. Chhaynaqa kallpachakusun sumaq sonqo kananchispaq, chhaynapin Diosqa allinta qhawariwasun.