Kay sasa tiempokunapi ‘ch’uya sonqolla’ kashasun

ITALIA llaqtapi askha sacerdotekuna qhelli huchapi kawsasqankumanta rimaspan huk periodista khaynata nirqan: “[Católico sacerdotekuna ukhupiqa] sinchi mast’arisqan kashan qhelli kawsay, manataqmi chaytaqa allichakunmanchu warmiyoqña kankuman chaypas. Paykunamantaqa askhan qharipura puñuq kanku, violankun qharikunata wawakunatapas”, nispa (La Stampa).

Chhayna millay kawsayqa kananpunin karqan kay “tukukuy qaylla” p’unchaykunapiqa (2 Tim. 3:1-5). Noticiakunapi uyarisqanchisman hina, qhelli kawsayqa sinchi mast’arisqan kashan maypipas. “Dios sonqon kayku” niq runakuna ukhupipas chhaynan kashan, paykunaq sonqonqa sinchi millaykunawan hunt’an kashan, chaymi tukuy qhelli kaqta ruwanku (Efe. 2:2). Chaychá Jesusqa nirqan: “Runaq sonqonmantan lloqsimun mana allin yuyaykuna, runa wañuchiykuna, wasanchaykuna, qhelli huchapi puriykuna, suwakuykuna, yanqa tumpakuykuna, millay k’amikuykuna”, nispa (Mat. 15:19). Jehová Diosta serviqkunan ichaqa “ch’uya sonqo” kananku (Pro. 22:11). ¿Imatan chaypaq ruwananku? Chaymantan qatiqninpi yachasun.

¿Imataq “ch’uya sonqo” kayri?

Bibliapiqa askha kutipin sonqomanta rimakun rikch’anachiy simipi. Huk libron khaynata nin: “Sonqotaqa tupachikun ukhunchispi imayna runa kasqanchiswanmi, chaytan Diosqa qhawan, chay sonqonchis imayna kasqanman hinataq kawsanchispas”, nispa. Chaypi nisqan hina, Jehová Diosqa ukhunchispi imayna kasqanchistan yachan, chaymi paypaqqa ancha chaniyoq (1 Ped. 3:4).

Bibliapi wakin textokunapiqa ch’uya, limpio, nispan nikun imapas mana qhelliyoq kaqta, chhaynatan nikullantaq mana qhellikunata ruwaspa Dios serviqta, allin runatapas. Orqo patapi yachachishaspan Jesusqa nirqan: “Kusisamiyoqmi ch’uya sonqoyoqkunaqa”, nispa (Mat. 5:8). Chay runakunaqa manan iskay uyakunachu kanku, aswanpas tukuy sonqonkuwanmi Jehová Diosta munakunku, agradecekunku ima; ch’uya kaqllatan yuyaykunku ruwankupas (Luc. 10:27). Lliwpas chhayna runa kaytachá munanchis.

‘Ch’uya sonqolla’ kayqa sasan

Jehová Diosta serviqkunaqa “ch’uya makiyoqmi” kananku, arí, karunchakunankun ima huchamantapas. Chaymantapas “ch’uya sonqoyoqmi” kanallankutaq (Sal. 24:3, 4). Chhayna kaymi ichaqa sinchi sasa. Saqrapas, kay pachapi mana allin kawsaypas, huchaman aysakuq cuerponchispas sinchitan sasachawanchis Jehová Dios servinanchista. Chaymi munananchispuni “ch’uya sonqo-kayta”, chayman hinataq kawsananchis. Chhaynapin Diospa amigon kashallasun. Ichaqa, ¿imatan ruwananchis ch’uya sonqolla kashananchispaq?

Yuyarinanchismi Hebreos 3:12 nisqanta, chaypin nin: “Wawqe-panaykuna, makilla cuidakuychis, paqtataq mayqenniykichispas mana iñiq hina millay sonqoyoq kaspa, kawsaq Diosmanta t’aqakuwaqchis”, nispa. “Mana iñiq” kaspaqa manan “ch’uya sonqo” kayta atisunmanchu. Chaytan Satanaspas yachan, chaymi payqa iñiyninchista pisiyachiyta munan. Chaypaqmi mast’arichin evolución nisqa yachachikuyta, hinallataq yachachin: “Manan yachakunchu imas allin imas mana allin kasqantaqa, sapanka munasqanman hina kawsachunku. Bibliapas manan Diosmantachu hamun”, nispa. Chaymi cuidakunanchis chhayna yachachikuykunamanta (Col. 2:8). Chhaynaqa, ¿imatan ruwananchis? Sapa p’unchaymi Bibliata estudiananchis, yuyaymanananchistaq. Bibliata allinta reqsispaqa astawanmi Jehová Diosta munakusunchis, allintataq entiendesunchis runakunata imayna tratasqanta. Chhaynapin mana engañachikusunchu yanqa yachachikuykunawan, aswanmi qaqata sayasunchis iñiyninchispi ch’uya sonqo kananchispaq (1 Tim. 1:3-5).

¿Imatan ruwana tentacionkuna kaqtin?

Chaymantapas cuidakunanchismi ‘aychaq millay munayninkunamanta’ qolqe sonqo-kaymantawan (1 Juan 2:15, 16). Qolqe sonqo kayqa sonqonchistan pantachinman, chhaynapitaq Diospa cheqnikusqankunata ruwasunman. Wakinqa qolqe sonqo kaspankun llank’anankupi suwakuyta qallarinku, hukkunatapas engañanku suwanku ima (1 Tim. 6:9, 10).

“Ch’uya sonqo” runakunan ichaqa Jehová Diosta manchakunku, chaymi chanin kaqllata ruwanku, kallpachakunkutaq allin concienciayoq kanankupaq, ‘tukuy imaymanapipas allintapuni purinankupaqwan’ (Heb. 13:18). Emiliomanta yachasun. Payqa Italia llaqtapi chofermi. Huk kutinmi tarisqa huk billeterata, chaypitaq kasqa 470 euros qolqe (chayqa 2000 soles hinan). Chaymi payqa supervisor jefenman entregapusqa, paytaq dueñonman qopusqa. Chayta rikuspan Emilioq wakin llank’aqmasinkunaqa Biblia estudiayta qallarisqaku. Kunankamaqa qanchis runañan Jehová Diosta servishanku Emilio honrado runa kasqanrayku. Chhaynaqa, honrado kaqtinchisqa askha runakunan Diosta alabankuman (Tito 2:10).

Cristianokunaqa cuidakunallanchistaqmi qhellipi kawsaq runakunamanta. Paykunan ninku: “Mana casarakuspalla piwanpas puñukuyqa manan huchachu, wasanchaypas qharipura warmipura puñukuypas manan imapaschu”, nispa. Chhayna runakunan sonqonchista qhellichanman, hinaspa paykuna hina ruwayta qallarisunman. Sonqonchis qhelli kaqtinqa iskay uyakuna hinan huchanchista pakasunman, chhaynapitaq manaña ‘ch’uya sonqochu’ kasunman.

Gabriele sutiyoq cristianomanta yachasun. Payqa 15 watanpi kashaspan bautizakusqa, hinaspa precursor kapusqa. Ichaqa pisi-pisimantan mana allin runakunawan puriysikuyta qallarisqa, chaymi discotecakunaman yacharqokusqa (Sal. 26:4). Chhaynapin qhelli huchakunaman urmasqa, Diospa llaqtanmantapas qarqochikusqa. Hinaspanmi payqa yuyayta hap’ispa huchanta saqepusqa, Jehová Diosmanpas tukuy sonqo kutirikusqa. ¿Iman payta yanapasqa Diosman kutirikunanpaq? Chaymantan pay nin: “Kallpachakurqanin Bibliata sapa p’unchay leenaypaq, chhaynapi Jehová Diospa munasqanta entiendenaypaq, hinallataq qelqanchiskunatapas allinta estudiarqani. Chhaynata estudiayqa anchatan yanapawarqan. Arí, Diospa Simin Qelqata sapa p’unchay estudiaspa, Diosmanta tukuy sonqo mañakuspaymi kallpata hap’irqani”, nispa.

Chhaynaqa, “ch’uya sonqo” kanapaq, qhelli huchamantapas karunchakunapaqqa, allintan estudiananchis Bibliata, ‘allin yuyayniyoq hunt’aq kamachiq’ qelqankunatapas (Mat. 24:45; Sal. 143:10). Chayta ruwasqanraykun Gabriele iñiqmasinchispas wakmanta precursor kapun, señoranpas precursorallataqmi.

“Ch’uya sonqo” kasun sasachakuyña kaqtinpas

Wakin cristianokunaqa sinchitan pisi kallpayanku familiankuna contrankupi hatariqtinku, qolqenku pisiyaqtin, sinchi onqosqa kaspankupas. Rey Davidpas chhaynan sientekurqan, chaymi nirqan: “Sinchitapunin llaki ñit’ishawan, sonqoymi p’iti-p’itishan”, nispa (Sal. 143:4). Chhaynapi tarikushaspan payqa yuyaymanarqan Jehová Diosqa serviqninkunata yanapaykukuq kasqanpi, yuyarirqanmi askha kutipi paytapas yanapasqanta, yuyaymanarqantaq Diospa hatunchasqa kananpaq imaymana ruwasqanpi. Chaykunapi yuyaymanaspan Davidqa kallpata hap’irqan aguantananpaq (Sal. 143:5). Sichus yuyaymanasun Diospa ñoqanchisrayku imaymana ruwasqanpi chayqa, kallpatan hap’isunchis.

Chaymantapas “ch’uya sonqo” kanapaqqa cuidakunallanchistaq sientepakuymanta. Mana allintaña pipas tratawarqanchis chaypas, manan chaytaqa yapa-yapamanta yuyarishananchischu, mana chayqa sonqonchispin wiñarinman cheqninakuy, mana allin yuyaykuykunapas; hinaspapas llapankumantan karunchakusunman. Chaykunaqa sinchi mana allinmi kanman. Chayraykun kallpachakunanchis llapan iñiqmasinchiskunawan sumaqta kawsananchispaq.

Cristianokunaqa ‘ch’uya sonqon’ kanchis, chaymi huk runakunamantaqa hukniraypuni kanchis. Jehová Diosqa munakunmi ‘ch’uya sonqoyoqkunata’. Chaymi “thak” nisqa kawsakunchis paypa munayninta ruwaspa, amigonkunataq kanchispas (Sal. 73:1). Chhaynaqa, kallpachakusun ‘ch’uya sonqopuni’ kananchispaq, chhaynapin kusisqa kasunchis, ‘Diostapas rikusunchis’, arí, rikusunchismi imaynatachus yanapawasqanchista (Mat. 5:8).