¿Diospa atiyninwanchu huk simikunapi rimanku?

DEVON sutiyoq waynan nin: “Iglesiaypi runakunaqa yaqachus hina sapa semana santo espirituta chaskinku, qonqayllan huk simikunapi rimanku. Paykunamantan wakinqa qhelli huchapi purinku. Ñoqaqa allinta kawsanaypaqmi kallpachakuni, ichaqa mañakushaniña chaypas manan santo espirituta chaskinichu, chay imayna kasqantan mana entiendenichu”, nispa.

Gabrielpa religionninpipas yaqa chhaynan sucedellantaq, paymi nin: “Astawanqa phiñakuni mañakushaqtiy wakin chaypi kaqkuna qaparispa pantachiwaqtinkun, chay runakunaqa paykuna kikinkun mana entiendenkuchu ima rimashasqankuta; yanqachus hina chaykunata ruwanku. Diospa atiyninwan huk simikunapi rimankuman chayqa, allinkunatachá ruwankuman”, nispa.

Chaykuna sucedesqanwanmi askha runakuna tapukunku: “¿Cheqaqtachu Dios runakunaman espiritunta qon huk simikunapi rimanankupaq?” nispa. Chayta yachanapaq t’aqwirisun imapaqsi Dios huk simikunapi rimanankupaq qallariy siglopi runakunaman atiyta qorqan chayta.

“Wak rimaykunapi rimayta qallarirqanku”

Bibliaq willasqanman hina, qallariy siglopin Dios wakin runakunaman santo espiritunta qorqan, chaymi mana yachasqanku simikunapi rimayta qallarirqanku. Chayqa Jerusalén llaqtapin ñawpaqta sucederqan, 33 wata Pentecostés fiestapi Jesuspa wañupusqan qhepallaman. Chay p’unchaymi 120 Jesuspa qatikuqninkunaman ‘Santo Espíritu hunt’aykurqan, hinan wak rimaykunapi rimayta qallarirqanku’ chaymi karu llaqtakunamanta hamuq askha runakuna anchata admirakurqanku sapankaq “rimayninpi paykunaq rimasqanta uyarispanku” (Hechos 1:15; 2:1-6).

Bibliaqa willallantaqmi Jesuspa huk qatikuqninkunamanta, paykunapas Diospa santo espirituntan chaskillarqankutaq huk simikunapi rimanankupaq. Paykunamanta hukninmi karqan apóstol Pablo, payqa askha simikunapin rimayta atirqan (Hechos 19:6; 1 Corintios 12:10, 28; 14:18). Diospa espiritunpa yanapayninwan imatapas ruwaq runaqa, ¿allinkunatan ruwanman riki? Chhaynaqa, ¿Imapaqmi Dios ñawpaqpi espiritunwan runakunata huk simikunapi rimachirqan?

Pikunatachus Dios chaskisqanta yachanankupaq

Corinto llaqtapi wakin cristianokunaqa yaqachus hina rimarqanku huk simikunata, paykunatan Pablo carta qelqasqanpi nirqan: “Mana yachasqa simikunapi rimayqa huk señalmi Diospi mana iñiq runakunapaq”, nispa (1 Corintios 14:22). Chhaynaqa, santo espirituwan milagro ruwaq runakuna hinan huk simikunapi rimaqkunapas rikuchirqanku chayllaraq qallariq iñiq t’aqa Diospa allin qhawarisqan kasqanta. Imaynan carroq purinan ñanpi señalkuna kan, chhaynallataqmi santo espirituq atiyninwan huk simikunapi rimaykunapas señal hina karqan, allin sonqoyoq runakuna pikunachus Diospa llaqtan kasqanta yachanankupaq.

Hinaspapas, Bibliaqa manan willanchu Jesús otaq ñawpa tiempopi profetakuna huk simikunapi rimasqankuta. Chaypin reparanchis Jesuspa qatikuqninkuna huk simikunapi rimasqankuqa huk ruwaytawan rikuchinankupaq kasqanta.

Allin willakuykuna mast’arikunanpaq

Qallariypin Jesús qatikuqninkunata kamachirqan Diospa Gobiernonmanta willakuykunata judío runakunallaman predicanankupaq (Mateo 10:6; 15:24). Chayraykun qatikuqninkunaqa maynillanpi mana judío runakunaq tiyasqan cheqaskunapiqa puriqku. Qhepamanmi ichaqa paykunamanpas predicananku karqan.

33 watapi wañupusqan qhepallamanmi Jesús qatikuqninkunata kamachirqan: “Rispa llapa suyu runakunata yachachimuychis, yachachisqaykuna kanankupaq”, nispa. Nillarqantaqmi “kay pachaq k’uchunkunakamaraq” testigonkuna kanankupaq (Mateo 28:19; Hechos 1:8). Chhaynaqa, pachantinpi allin willakuykunata predicanankupaqqa huk simikunatawanmi rimananku karqan hebreo simi rimasqankumantapas.

Ichaqa Jesuspa askha qatikuqninkunan ‘mana estudioyoq runakunalla’ karqanku (Hechos 4:13). ¿Imaynatan predicankuman karu llaqtakunapi huk simita rimaq runakunaman? Paykunaqa santo espirituq yanapayninwanmi mana hayk’aq rimasqanku simikunapi kusata rimayta atirqanku.

Rikusqanchis hina, ñawpa tiempopi huk simikunapi rimayqa cristianokunata Dios allinpaq qhawarisqanta runakuna yachanankupaqmi karqan, hinallataq allin willakuykunata lliw runakunaman predicakunanpaq. Ichaqa, ¿imanisunmanmi kay tiempopi huk simikuna rimasqankumanta? ¿Ñawpa tiempopi hinachu kunanpas Diospa munasqanta hunt’ashanku?

¿Allinpaqchu Dios qhawarin kay tiempopi huk simikunapi rimayta?

Sichus hap’iwaq ancha importante willakuyniyoq letrerota, munawaqtaq lliw runa yachananta chayqa, ¿maymanmi churawaq? Manachá huk wasi ukhupichu hap’iwaq, aswanpas lliw runaq rikunanpin k’askachiwaq. Bibliaq willasqanman hina, Pentecostés fiestapi Jesuspa qatikuqninkuna huk simikunapi rimasqankutaqa askha runakunan uyarirqanku. Chayraykun “chay p’unchaypi iñiqkunaman yapakurqan kinsa waranqa hina runakuna” (Hechos 2:5, 6, 41). Kay tiempopi huk simikunapi rimaq runakunan ichaqa iglesianku ukhullapi rimanku. ¿Imaynapitaq chayqa huk señal kanman llapa runakuna cheqaq religión kasqankuta yachanankupaq?

Chaymantapas Bibliaqa willanmi qhelli huchakunapi puriy, hinallataq “runaq millay munasqan ruwaykunaqa” santo espirituq yanapayninta hark’asqanta. Hinaspapas “chay hinata ruwaqkunaqa manan Diospa qhapaqsuyunman haykunqakuchu” (Gálatas 5:17-21). Chayraykun askha runakuna mana allinpaq qhawarinku “huk simikunapin rimani” niq runakuna qhelli kawsaypi purisqankuta. ¿Imaynapitaq Dios santo espiritunta qonman Bibliapi kamachikuyninkunata mana kasukuq runakunaman? Chayqa carrota huk ladoman dirijeq mana allin señal hinan kanman.

¿Allin willakuykuna mast’arikunanpachu kunan huk simikunapi rimasqanku?

Rikusqanchis hina, ñawpaq tiempopi huk simikunapi rimasqankuqa allin willakuykuna mast’arikunanpaqmi karqan. ¿Kay tiempopipas chaypaqchu huk simikunapi rimanku? Pentecostés fiestamanqa askha llaqtakunamantan hamuqku. Jesuspa qatikuqninkuna rimasqanku simipi predicaqtinkuqa allintan entienderqanku. Ichaqa kay tiempopi huk simikunapi rimaqkunaqa mana entiendeytan rimanku.

Chhaynaqa, kay tiempopi huk simikunapi rimasqankuqa manan kaqllachu ñawpa tiempopi santo espirituq yanapayninwan rimasqankuwanqa. Hinaspapas manan ima pruebapas kanchu apostolkunaq wañupusqanku qhepaman pipas chay atiyta chaskisqanmantaqa. Biblia estudiaqkunaqa allintan chayta yachanku, espirituq atiy qokuyninkunamanta rimaspan apóstol Pablo nirqan: “Profetizaykunan ichaqa tukukapunqa, mana yachasqa simi rimaykunapas manan kanqañachu”, nispa (1 Corintios 13:8). Chhaynaqa, ¿imaynapin yachasunman pikunamanchus Dios santo espíritu qosqanta?

¿Pikunan rikuchinku santo espirituq yanapaynin chaskisqankuta?

Jesusqa yacharqanmi iñiq t’aqa qallarisqan qhepamallan huk simikunapi rimay chinkapunanta. Chayraykun manaraq wañupushaspa cheqaq cristianokunata reqsinapaq huk señalmanta rimarqan, nirqanmi: “Chhaynapin ñoqaq yachachisqaykuna kasqaykichista llapa yachanqaku qankuna munanakuqtiykichis”, nispa (Juan 13:35). 1 Corintios 13:8 textoqa willallantaqmi ‘munakuy wiñaypaq kananmanta’.

Bibliaq nisqan hina, munakuyqa ‘kawsayninchispi ruruchiq’ santo espirituq ñawpaqkaq rurunmi (Gálatas 5:22, 23). Chayrayku santo espirituq yanapasqan runakuna, hinallataq Diospa allinpaq qhawarisqan runakunaqa paykunapura munanakunku. Chaymantapas santo espirituqa ruruchillantaqmi “sumaq kawsayta”. Chayraykun cheqaq cristianokunaqa kallpachakunku sumaqta kawsanankupaq, sonqonkumantan wikch’unku allin reqsisqa kay munapayayta, huk nacionmanta runakuna pisichayta, maqanakuyta ima.

Chaymantapas Hechos 1:8 textopin Jesús willarqan qatikuqninkuna atiyta chaskinankumanta, hinaspa “kay pachaq k’uchunkunakamaraq” paypa testigonkuna kanankumanta, “kay pachaq p’uchukanankama” predicanankumantawan (Mateo 28:20). Chhaynaqa, allin willakuykuna pachantinman mast’ariskusqanqa huk señalmi kanan karqan pikunachus espirituq yanapaynin chaskisqankuta yachanapaq.

Qhawarisqaykiman hina, ¿pikunan santo espirituq yanapaynin chaskisqankuta rikuchinku? ¿Pikunan munakuyta sumaq kawsaytapas rikuchinku? ¿Pikunan mana guerraman riyta munankuchu chayraykuña wakin gobiernokuna qatiykachaqtinkupas? (Isaías 2:4.) ¿Pikunan kallpachakunku ama qhelli huchapi purinankupaq? (1 Corintios 5:11-13.) Hinaspapas, ¿pikunan pachantinpi predicashanku Diospa Gobiernollan runakunaq sasachakuyninta allichananmanta? (Mateo 24:14.)

Kay revistata ruwaqkunaqa manan iskayaykuchu Jehová Diospa testigonkuna Bibliaq nisqanta ruwaspa santo espirituq yanapayninta chaskisqankumanta. Chayraykun invitaykiku paykunata aswan allinta reqsinaykipaq, chhaynapin kikiykipuni rikunki cheqaqtachus Dios yanapan icha manachus chayta.