“Runakunaq sonqonman chayanaypaqmi yanapawan”
QAYNA watakunan Brasil nacionpa uray ladonpi kaq Porto Alegre llaqtapi lliw nacionkunamanta huñunakurqanku llaqtankupi tiyaq runakunata imapi yanapanankumanta rimanankupaq. Chaymanmi rirqanku 135 nacionkunamanta. Hinan Porto Alegre llaqtamanta Tetigokunaqa chay runakunaman Diospa Gobiernonmanta willarqanku mana huñukusqanku ratokunapi. ¿Imaynatan chayta ruwarqanku?
Elizabete sutiyoq precursoran khaynata nin: “Buenas nuevas para gente de todas las naciones nisqa folletowanmi predicarqayku, askhaña mana hayk’aqpas Diospa Gobiernonmanta uyarisqakuchu chaypas, kusikuywanmi uyariwarqanku. Rimarqaykun Bolivia, China, Francia, India, Israel, Nigeria nacionniyoq runakunawan. Wakin qelqakunatan aparqayku hamuqkunaq rimasqanku simipi, hinan kusisqa chaskikurqanku”, nispa.
México nacionmanta Raúl sutiyoq precursorpas chay folletollawantaqmi predicarqan. Chaypin rimarqan Arabia nacionmanta 80 watayoq runawan, paypaqa chayllaraqmi esposan wañukapusqa. Chaymi chay folletopi Apocalipsis 21:3, 4 nisqanman hina wañuy chinkapunanmanta rimasqan simipi leespaqa waqasqaraq. Huk p’unchaymi reqsillarqantaq portugués rimaq runata, paypapas wawanmi wañupullasqataq, chaymi Raulqa leechillasqataq portuguespi allin willakuyta, hinan chay runaqa Bibliata estudiayta munarqan.
Raulqa Buenas nuevas para gente de todas las naciones, nisqa folletowanmi predicarqan alemán, armenio, chino, coreano, francés, hindi, inglés, mixe, persa, ruso, zapoteco rimaykunapi. Paymi nin: “Chay folletoqa ancha allinmi predicanapaq; manaña rimasqanku simita rimanichu chaypas, yanapawarqanmi runakunaq sonqonman chayanaypaq”, nispa.
Sapa kutillanmi askha runakuna viajanku huk nacionkunaman mayninpitaq chayman tiyaq ripunku, chaymi paykunawanqa tupashallanchis. Sichus Buenas nuevas para gente de todas las naciones nisqa folletota predicacionman apallasunpuni chayqa, paykunamanpas willasunmi Diospa Gobiernonmanta. ¿Apallankipunichu qanpas?
[32 paginapi fotokuna]
Raulmi predicashan wak nacionniyoq runakunata sonqonkuman chayanapaq folletowan