¿Imaynatan yanapasunman huk simi rimaqkunata?

1. ¿Llaqtanchispi pikunatawanmi predicasunman?

¹ Jesusmi nirqan: “Allin willakuykunan kay pachantinpi willasqa kanqa, llapa suyukunaq yachananpaq”, nispa (Mat. 24:14; 28:19, 20). Chay allin willakuykuna willaypi yachachiypi llank’aqkunaqa allintan yachanku Jesuspa nisqan ancha importante kasqanta. Predicacionpiqa sapa kutillanmi tupanchis mana yachasqanchis simita rimaq huk lado llaqtayoq runakunawan. Paykunamanpas willananchismi allin willakuykunata, chhaynapin paykuna akllakuyta atinqaku Dios serviyta, manaraq phiñakuynin p’unchay chayamushaqtin (Mal. 3:18). Chhaynaqa, ¿imaynatan llaqtanchispi huk simi rimaq runakunata yanapasunman?

2. ¿Imaynatan Jehová Diosman rikch’akusunman predicacionpi?

² Jehová Dios hinan paykunatapas qhawarina. Jehová Diosqa manan mayqen runatapas rikch’ayninta qhawaspachu akllan. Pay hina kananchispaqqa sonqomantapunin munananchis lliw runa Diosmanta allinta yachanankuta, ima simi rimaqña kaqtinkupas (Sal. 83:18; Hech. 10:34, 35). Huñunakuyninchispi rimakusqan simipiña astawan predicanchis chaypas, manan qonqananchischu huk simi rimaq huk llaqtayoq runakunaqa, chaymi kallpachakunanchis paykunatapas predicananchispaq. Jehová Diosqa munanmi lliw llaqtayoq runakunaman predicananchista. Chhaynaqa, ¿imaynatan paykunata yanapasunman?

3. ¿Ima folletowanmi yanapachikusunman? ¿Imaynatan chayta ruwasunman?

³ Naciones nisqa folletowan yanapachikusun: Mana yachasqanchis simita rimaqkunawan tupaspaqa Buenas nuevas para gente de todas las naciones nisqa folletowanmi yanapachikusunman. Chay folletoqa chaypaqpunin ruwasqa kashan, chaymi allinta yachana imaynatan chaywan yanapachikusunman chayta, apanataqmi maymanña riqtinchispas. Allinmi kanman llaqtanchispi rimasqanku simikunata chay folletopi marcay. Sichus chay simikunapi kanña qelqanchiskuna chayqa, qochikusunmanmi iskay kinsata, hinaspa chay folletopi willakuyta leeqkunaman qosunman.

4. ¿Imaynatan predicasunman Naciones nisqa folletowan?

⁴ Sichus mana reparanchischu ima simipi rimasqanta chayqa, qhawachisunmanmi chay folletoq tapanta, hinaspa qhepanpi kaq mapata qhawachispa señalasunman may llaqtamanta kasqanchista, chaymantataq makillawan tapusunman maymantachus pay kasqanta, ima simi rimasqantawan. Chayta yacharqospañan índice nisqapi maskhasunman mayqen paginapichus rimasqan simi kasqanta, hinaspa chay paginata maskharqospaña chaypi qhawachisunman hawanpi kaq letrakunata, leechisunmantaq parrafokunata. Leeyta tukuqtintaq rimasqan simipi huk tradado nisqata qosunman otaq uspha colorpi letrakunata qhawachisunman, chaypin nishan: “Gustowanmi apamuyman rimasqayki idiomapi leenaykipaq”, nispa. Chaymantataq folletopi señalasunman “sutiyta willasqayki” nisqata, hinaspa willasunman sutinchista. Chaymantataq “munaymanmi sutiyki yachayta” nisqatañataq señalasunman, hinaspa suyasunman sutinta willawananchista. Chay qhepamantaq allinta yuyaykunanchis chay runaman kutinanchispaq.

5. Huk simi rimaq runa astawan yachayta munanman chayqa, ¿imatan ruwasunman?

⁵ Ama qonqasunchu kutiyta: Diosmanta astawan yachay munaqmanqa visitananchismi, may llaqtayoqña ima rimayniyoqña kanman chaypas. Sichus chay runa munashallanqapuni Diosmanta, Bibliamanta yachayta chayqa, hunt’ananchismi Sírvase visitar (S-43) nisqa hojachata, hinaspa secretarioman qonanchis, paytaq sucursalman apachipunqa. Sucursalñataq chay hojachata apachimunqa chay simita rimaq iñiq t’aqaman, chhaynapi chay runaman visitanankupaq. Chay hojachata chaskiqtinku hinallan chay runaman visitananku. Chaymantapas secretarioqa ruwallanmantaqmi chay hojachamanta huk copiata superintendente de servicio umallipaq, chhaynapin pay yachanqa chay simi rimaypi runakuna maytukuyta uyarikushanku chayta. Ichaqa chay hojachataqa hunt’ana Bibliamanta cheqaqtapuni yachay munaqkunata tarillaqtinchismi.

6. ¿Imatan ruwananchis chay hojachata apachisqanchis qhepaman?

⁶ Chay hojachata apachirqanchisña chaypas, manapaschá usqhayllachu huk iñiqmasinchista tarinqaku chay yachay munaq runata visitananpaq. Chayraykun ñoqanchis visitananchis chay runata, estudiotapas qallarisunmanmi paywan. Ichaqa, ¿maymantan horqosunman chay runapaq qelqakunata?

7. ¿Maymantan horqosunman huk simikunapi qelqakunata?

⁷ Huk simikunapi qelqakuna: Sichus huk simita rimaq runakuna predicasqanchista uyariyta qallarishanku, manataq chay simipi qelqakuna kanmanchu chayqa, superintendente de servicio umalliqa ninmanmi chay simipi wakin qelqakunata mañanankupaq. Ichaqa iñiq t’aqakunaqa manan askhatachu hap’inanku chay qelqakunata. Chay pedido chayamunankamataq internetpi www.watchtower.org nisqamanta horqosunman wakin qelqakunata, chaypiqa askha rimaykunapin kan qelqakuna papelpi horqonapaq. Chayqa allinpunin kanqa huk simi rimaq runakunata yanapanapaq.

8. ¿Imaynatan iñiq t’aqapi kaqkuna yanapankuman huk simi rimaqkunata?

⁸ ¿Imaynatan iñiq t’aqapi kaqkuna yanapakusunman? Wakin llaqtakunapiqa huk simi rimaq runakunamanta askhan Bibliamanta yachayta munanku, ichaqa manan cercallapi kanchu chay simikunapi huñunakuykuna. Chhayna kaqtinqa, huñunakuyninchismanmi pusamusunman paykunata. Huñunakuypiqa allin chaskisqan kanqaku, chhaynapitaq kallpachakunkuman hamushanallankupaq. Chayllaraq hamuqtinkuqa manapaschá allintachu iñiqmasinchiskunawan entiendenakunqaku wak llaqtayoq huk simita rimaq kasqankurayku. Ichaqa manan chayqa imananpaschu cheqaq munakuy kaqtinqa, chhayna munakuymi kan ñoqanchis Jehová Diospa testigonkuna ukhupi (Sof. 3:9; Juan 13:35). ¿Rimankichu huk simikunata? ¿Munawaqchu visitayta chay simikunapi rimaq runakunata? Chhayna kaqtinqa, secretario umalliman chayta willay, paytaqmi sucursalman chayta willanqa. Chhaynapin sucursalpi yachanqaku pitan ninkuman huk simi rimaq runata visitananpaq chayta.

9. ¿Ima kaqtinmi ruwakunman huk simita yachanapaq curso? ¿Imaynatan chay ruwakunman?

⁹ Huk simita yachanapaq curso: Huk simi rimaqkunataqa, mayqen huñunakuypichus rimasqanku simipi yachachinku chayman rinankupaqmi kallpachananchis. Sinchi karutaqchus chay huñunakuykuna kanman chayqa, yaqapaschá wakin iñiqmasinchiskuna munankuman chay simi yachayta, chhaynapi chay runakunata yanapanankupaq. Sichus huk llaqtapi mana qayllallapi kanchu mayqen iñiq t’aqapas, askhataq chaypi munashanku Bibliamanta yachayta, huk llaqtayoq runakunapas askhataq chaypi kashanku chayqa, sucursalmi ninman chay runakunaq rimasqan simita yachachikunanpaq. Chhayna kaqtinqa, chay ladokunapi kaq iñiq t’aqakunamanmi willanqa chay simita yachanapaq huk curso ruwakunanmanta. Chay cursoman riy munaqkunaqa liston kashananku huk grupoman otaq iñiq t’aqaman pasanankupaq, chhaynapi chay simi rimaqkunata yanapanankupaq.

10. ¿Imakuna kaqtinmi huk simipi grupo qallarinman? ¿Imatan chaypaq ruwakunan?

¹⁰ ¿Imakuna kaqtinmi huk grupo qallarinman? Huk simipi grupo qallarinanpaqqa kaykunan kanan: 1) Askhan chay simi rimaqkuna munananku Bibliamanta yachayta. 2) Kananmi chay simita rimaq iñiqmasinchiskuna, otaq yacharishananku chay simita. 3) Kanallantaqmi huk umalli otaq huk allin yachachiq yanapakuq (siervo ministerial), semanapi huk kutillatapas chay simipi huñunakuyta aparichinanpaq. 4) Huk iñiq t’aqapi umallikunaq cuentanpi kanan chay grupoqa. Chaykunata ruwakuqtinñan chay umallikunaqa sucursalman cartata apachinkuman, chaypitaq willankuman huk grupo kananpaq imatachus ruwashasqankuta, mañakunkumantaqmi: “Allinmi chay grupota yanapasqaykichis”, nispa ninankuta (qhaway Organizados págs. 106, 107). Huk umallichus chay grupomanta encargakunqa chayqa, “grupopi umalli” nisqan kanqa; huk yanapakuq iñiqmasinchistaqchus kanqa chayqa, “grupopi yanapakuq” nisqa kanqa. Paymi encargasqa kanqa chay grupota umallinanpaq.

11. ¿Imaraykun ancha allinpuni territorionchispi huk simi rimaqkunata predicay?

¹¹ Predicasqanchis llaqtapi huk simi rimaqkunata predicayqa ancha allinmi, chaywanmi yanapakushanchis Umalliqninchis Jesucristoq qallarichisqan llank’aypi. Chayrayku kallpachakusun tukuy atisqanchista ruwananchispaq, hinan rikusunchis imaynatachus Jehová Diosninchis lliw llaqtakunamanta ‘qhapaq kaykunata’ otaq allin sonqoyoq runakunata horqomusqanta (Ageo 2:7). ¡Ima munaymi chay llank’aypi yanapakuyqa! Jehová Diosmi yanapawasun tiyasqanchis llaqtapi huk simi rimaqkunata predicananchispaq. Sasaña kanman huk simi rimaqkunata yachachiy chaypas, Jehová Diosmi chay runakunaq sonqonpi allin willakuy muhutaqa wiñachinqa (1 Cor. 3:6-9.)