Ñawpaqkaq

Runata munakuy amataq kaqniykikunatachu

BIBLIAN NIN: “Qolqe sonqo-kaymi tukuy mana allinkunaq saphinqa”, nispa (1 Timoteo 6:10).

¿IMA SASACHAKUYMI KAN? Propagandata ruwaqkunan imaymanata munachiwanchis. Paykunaqa chayllaraq lloqsimuqta, aswan allinkaqta, hatun kaqnintan munachiwanchis, manataqmi paykunaman imapas qokunchu chaykuna rantinapaq hayk’a tiempo llank’ananchis kasqanta. Chaykunawanmi runakunaqa ratolla qolqeman sonqollikusunman. Ichaqa Biblian willan qolqeman sonqollikuqqa astawan munaqman tukupunanta. Rey Salomonmi nirqan: “Qolqeman sonqollikuqqa, astawanpunin munan, imaymanayoq kayta munaqpas, astawanraqmi tariyta munan”, nispa (Eclesiastés 5:10).

¿IMAN YANAPAWASUNMAN? Jesustan qatikuna. Payqa runakunatan munakurqan manan imaymana kaqkunatachu. Chaymi kawsayninta imaraq qorqan runakunarayku (Juan 15:13). Nirqanmi: “Aswan kusisamiyoqqa qoqmi chaskiqmantaqa”, nispa (Hechos 20:35). Sichus runakunaman qosun tiemponchista ima kaqninchiskunatapas chayqa paykunapas kaqllatataqmi ruwanqaku. Jesusmi nirqan: “Runa-masiykichisman qoykuychis, ahinapin [...] qosunkichis”, nispa (Lucas 6:38). Qhapaq kaykunaman k’askakuqkunaqa manan hayk’aqpas contentakunkuchu, imaymana llakikunapin rikukunkupas (1 Timoteo 6:9, 10). Ichaqa, hukkunata munakuy hukkunaq munakusqan kaymi cheqaq kusikuytaqa apamun.

Chayraykun kaykunata tapukunanchis: “¿Kawsaymanchu pisillawan? ¿Imakunatan mana necesitanichu? ¿Necesitanichu tukuy rantiy munasqayta?” nispa. Sichus tiemponchiswan kallpanchiswan allinta yuyaykuspa imatapas ruwasun chayqa, aswan allin kaqkunatan ñawpaqman churasun, arí, tukuyta qowaqninchis Diostan servisun, yanapasuntaqmi runamasinchista (Mateo 6:24; Hechos 17:28).

[4 paginapi foto]

“Runa-masiykichisman qoykuychis, ahinapin [...] qosunkichis”