Iskaykaq

Ama hukkunawan tupanachikuychu

BIBLIAN NIN: “Sapanka pay kikinpa kawsasqanta allinta qhawakuchun, hinaspa allin kawsasqanta reparakun chayqa, chayllawan kusikuchun, amataq hukpa kawsasqanwan tupanachispachu”, nispa (Gálatas 6:4).

¿IMA SASACHAKUYMI KAN? Llapallanchismi imayna kasqanchista otaq kawsayninchista hukkunaq kawsayninwan tupanachinchis. Chaytan mayninpi ruwanchis wakchakunawan, astawanqa qhapaqkunawan, kallpayoqkunawan otaq aswan yachayniyoqkunawan. Chayta ruwayqa mana allinninchispaqmi kanman. Imaymana kaqniyoq runatan allinpaq qhawarisunman mana imayoqtataq pisichasunman. Hinaspapas envidiakuyta qhawanakuyta iman paqarichisunman (Eclesiastés 4:4).

¿IMAN YANAPAWASUNMAN? Jehováa Dios qhawariwasqanchista hinan qhawarikunanchis. Chaymi mana pisipaqchu qhawarikusun. 1 Samuel 16:7 texton nin: “Runallan rikch’aynintaqa qhawan, ñoqan ichaqa sonqonta qhawani”, nispa. Arí, Diosqa manan piwanpas tupanachiwanchischu. Payqa sonqonchistan qhawarin: yuyaykusqanchista, sientesqanchista, munasqanchista (Hebreos 4:12, 13). Yachanmi maykamalla imatapas ruway atisqanchista, chayta reqsikunanchistan munan. Hukkunawan tupanachikuspaqa paykunamanta aswan allinpaqmi qhawarikusunman otaq tukuy tiempo mana valeqpaq qhawarikusunman. K’umuykukuq kaymi yanapawasun hukkuna ñoqanchismanta imallapipas aswan allin kasqankuta qhawarinapaq (Proverbios 11:2).

¿Imatan ruwana Diospa ñawpaqenpi aswan allin qhawarisqa kananchispaq? Diospa yuyaychasqanmi profeta Miqueas qelqarqan: “¿Imatataq Señor Diosqa ruwanaykita munan? Chanin kaqllatapuni ruwanaykitan, khuyapayakuqllapuni kanaykitan, Diosniykiq ñawpaqenpi huch’uyyaykukuspa kawsanaykitan”, nispa (Miqueas 6:8). Chaypi nisqanta kasukusun chayqa Diosmi cuidawasun (1 Pedro 5:6, 7). ¿Manachu chayta yachasqanchis anchata kusichiwanchis?

[Uranpi willakuy]

[5 paginapi foto]

Jehová Diosqa sonqonchispi kaqtan allinta qhawarin