Leeqkunaq tapukusqan
¿Imaraykun Nadab, Abiuwan wañusqanku qhepaman Moisés phiñakurqan Eliazarpaq Itamarpaqwan? ¿Imaynapin phiñakuynin tiyaykapurqan? (Lev. 10:16-20.)
Yupaychana karpapi sacrificiokunata haywanankupaq sacerdotekunata churasqan qhepallamanmi Jehová Dios Aaronpa iskay churinkunata, Nadadta Abiutawan wañuchirqan “mana haywana ninata” haywasqankurayku (Lev. 10:1, 2). Moisesqa Aaronpa qhepa iskay churinkunatan, Eliazarta Itamartawan kamachirqan wañupuq iskay wawqenkumanta ama llakikunankupaq. Chay qhepallamanmi paykunawan phiñakurqan hucha pampachaypaq orqo cabra ofrendata mana mikhusqankumanta (Lev. 9: 3). ¿Imarayku phiñakurqan?
Moisesman Kamachikuy Simita qosqanpin Dios kamachirqan huchakunata pampachanapaq sacrificiomanta wakinta Dioswan tupana karpa kanchapi sacerdotekuna mikhunankupaq. Chayta ruwasqankuwanmi sacrificiota haywaqpa huchan pampachasqa karqan. Sacrificiopi haywasqanku animalpa yawarninta Ch’uya Cheqasman apaykuspan ichaqa mana mikhunankuchu karqan aswanmi ruphachinanku karqan (Lev. 6:24-26, 30).
Ñawpaqta mana allinkuna sucedesqanraykun Moisesqa Diospa kamachikusqanman hinapuni imapas ruwakunanta munarqan. Chaymi orqo cabra ruphachisqankumanta yacharuspa, phiñasqa nirqan: “Qhawariychis, manan yawarqa Karpapi Ch’uya Cheqasman apaykusqachu karqan, chaymi ñoqaq kamachikusqayman hina qankunaqa chay ofrendata karpa kanchapi mikhunaykichis karqan”, nispa (Lev. 10:17, 18).
Yaqapaschá taytanku Aarón kamachirqan chayta ruwanankupaq, chaychá Moisesmanqa pay kutichirqan. Yaqapaschá Aaronqa yuyaykurqan: “Huchapakuq iskay churiykunataq wañuchisqa kapurqanku chayqa, ¿ch’uya concienciawanchu kay huk churiykuna hucha pampachaypaq sacrificiota mikhunqaku? Manaña paykunachu huchayoq kanku chaypas, manapaschá Jehová Dios allinpaqchu qhawarinqa”, nispa (Lev. 10:19).
Hinaspapas khaynatapaschá yuyaykurqan: “Yupaychana karpapi wawaykuna Dios serviyta qallarishaqtinkun Diospa munasqanman hina imatapas ruwananku karqan. Nadabwan Abiuwanqa Jehová Diostan phiñachirqanku, chaymi wañuchisqa karqanku. Itamarwan Eliazarwanqa manan sacrificio haywasqankuta mikhunankuchu wawqenkuna Diospa contranpi huchallikusqankurayku”, nispa.
Chayta willaqtinñan Moisespa sonqon tiyaykurqan, Biblian nin: “Chayta uyarispataq Moisesqa manaña ima nispapas nipurqanchu”, nispa (Lev. 10:20). Yaqachus hina Jehová Diospas chay kutichisqanta allinpaq qhawarirqan.