Diosta serviy ama huchachakuspalla

1-3. a) ¿Iman imamantapas llakipakuy, imaynapin mana allinninchispaq kanman? b) ¿Imatan yachanchis apóstol Pablomanta?

HARAWIKUNATA qelqaq John G. Whittier runan nirqan: “Llapa llakikunapaq simikunata qelqaspaqa otaq rimaspaqa, aswan llakikunapaqqa, ‘chhaynata ruwayman karqan niymi’”, nispa. Chay qelqaqqa chhayna simikunawanmi nisharqan ima ruwasqanchismantapas pesapakusqanchista. Llakipakuyqa ima ruwasqamantapas otaq mana ruwasqamantapas huchachakuymi. Llapanchispas imamantapas llakipakunchispunin. ¿Imakunamantan qan llakipakunki?

² Wakin runakunaqa imaymanapin pantarqanku otaq hatun huchakunamanpas urmarqanku. Wakinqa manan chaykunata ruwarqankuchu, ichaqa yuyaykunkun ima decidisqankupas allinchus kasqanta. Chhaynapi tarikuspan wakinqa ñawpa kawsayninkuta saqespa ñawpaqllaman qhawarirqanku. Wakinmi ichaqa ñak’arinku kayta yuyaykuspa: “Khaynata, haqaynata ruwayman karqan chayqa...”, nispa (Sal. 51:3). Qanri, ¿kunanmantapacha munawaqchu ñawpa kawsayniykimanta mana huchachakuspalla Diosta serviyta? Apóstol Pablon chhaynapi tarikurqan, paymanta yachaymi yanapawasun.

³ Pabloqa imaymanakunapin pantarqan, ichaqa allinkunatapas ruwallarqantaqmi. Ñawpaqpi pantasqanmanta llakipakurqanña chaypas, yacharqanmi hunt’aq sonqowan Diosta servispa kusisqa kayta. Yachasunchis ruwasqankunamanta.

PABLOQ ÑAWPA KAWSAYNIN

4. ¿Imakunatan ñawpaqpi apóstol Pablo ruwarqan?

⁴ Pabloqa waynallaraq kashaspa fariseo kaspa ruwasqankunamantan pesapakurqan. Payqa Cristoq qatikuqninkunata mana khuyapayaspa qatiykachasqankupin umallirqan. Biblian willan Estebanta wañuchisqanku qhepaman, ‘Saulo qhepaman Pablo sutiwan reqsisqa iglesiata ch’inyachinanpaq, wasin-wasinta haykuspa, qharikunatapas warmikunatapas aysaspa carcelman churachisqanta’ (Hech. 8:3). William Barclay profesorpa nisqanman hinaqa, griego rimaypi “ch’inyachinanpaq” nisqa simiqa “millayta trataymi” imaynan “huk salqa animalqa pimanpas phawaykun hina”. Judío religionta nishuta munakusqanraykun Sauloqa cristianokunata chinkachiyta qhawarirqan Diospa kamachisqanta hina. Chaymi cristianokunata ‘wañuchinanpaq amenazaspa’, “qharikunatapas warmikunatapas” phiña animal hina qatiykacharqan (Hech. 9:1, 2; 22:4).a

5. Willay imaynapi Saulo Cristoq qatikuqninkunata manaña qatiykachasqanta, imaynapi Cristomanta predicaq kapusqantapas.

⁵ Sauloqa munarqanmi Damascoman rispa Cristoq qatikuqninkunata wasinkumanta horqomuspa Jerusalenman apayta, chhaynapi Sanedrinpa juzgasqan kanankupaq. Ichaqa cristiana iñiq t’aqata Umalliq Jesusmi chayta hark’arqan (Efes. 5:23). Damascoman rishaqtinmi Jesusqa payman rikhurispa huk k’anchaywan ñawsayachirqan. Hinan nirqan chay llaqtata rispa imachus kamachisqanta suyakunanpaq. Qhepaman imachus sucedesqanqa Bibliapin kashan (Hech. 9:3-22).

6, 7. ¿Imaynapin yachanchis Pabloqa ñawpaqpi ruwasqankunata reqsikusqanta?

⁶ Cristianoman Pablo tukupuspaqa manañan qatiykachaqñachu kapurqan, aswanpas tukuy sonqowanmi allinta rimarqan chay religionmanta. Qhepaman qelqaspan nirqan: “Qankunaqa uyarirqankichismi judío runakunaq yachachisqan kaspa imaynatachus purisqayta. Yacharqankichistaqmi sinchitapuni Diospa llapan iglesianta ñak’arichispa qatiykachasqaytapas, ch’usaqyachiyta munasqaytapas”, nispa (Gál. 1:13). Hinaspapas chaytan willallarqantaq Corinto, Filipos cristianokunaman, Timoteoman qelqaspapas (leey 1 Corintios 15:9; Filip. 3:6; 1 Tim. 1:13). Pabloqa manan chay ruwasqankunamanta hatunchakunanpaqchu qelqarqan, nitaqmi manapas imapipas pantanmanchu hinatachu qhawarikurqan. Payqa reparakurqanmi ñawpaqpi pantasqankunata (Hech. 26:9-11).

⁷ Frederic W. Farrar runan willarqan cristianokunata “qatiykachasqankupi” imatachus Pablo ruwasqanta. Willarqanmi: “Cristianokunata millayta tratasqanta entiendespallan yachasunman imaynataraq qhepaman huchachakusqanta, enemigonkuna imakuna k’amisqankutapas”, nispa. Iñiq t’aqakunata watukusqanpipas yaqapaschá paypa mana reqsisqan cristianokuna asuykuspa nirqanku: “¡Qanchu kanki Pablo, qanchu qatiykachawarqankiku!” nispa (Hech. 9:21).

8. ¿Imaynatan Pablo qhawarirqan Jehová Diospa Jesuspa munakuyninta, imatan chaymanta yachanchis?

⁸ Pabloqa entienderqanmi Diospa khuyapayasqanrayku predicay atisqanta. 14 cartakuna qelqasqanpin 90 más kutitaraq riman Diospa khuyapayakuyninmanta, manan chhaytukuytaqa pipas rimarqanchu (leey 1 Corintios 15:10). Pabloqa anchatan agradecekurqan Diospa khuyapayasqanmanta, chaymi rikuchiyta munarqan chay khuyapayakuyninta allinpaq hap’isqanta. Huk apostolkunamantapas aswantaraqmi Diosqa Pablota khuyapayarqan. Pabloq kawsayninmantaqa askhatan yachasunman, astawanqa “Diosqa manan pampachawanmanchu” nispa yuyaykuqkuna. Sichus iñisun Jesuspa yawar hich’asqanpi, huchanchista willakuspataq kallpachakusun allinta kawsanapaq chayqa Jehová Diosmi huchanchista pampachanqa, hatun huchamanña urmarqanchis chaypas (leey 1 Timoteo 1:15, 16). Pabloqa nishutan qatiykacharqan Cristoq qatikuqninkunata, chaywanpas qelqarqanmi: ‘Diospa Churinmi [...] munakuwarqan, chaymi ñoqarayku wañurqan’, nispa (Gál. 2:20; Hech. 9:5). Pabloqa yacharqanmi mana huchachakuspalla Dios serviyta. Qanri, ¿chaytachu ruwanki?

¿HUCHACHAKUSHANKICHU?

9, 10. a) ¿Imaraykun wakin iñiqmasinchiskuna huchachakunku? b) ¿Imaraykun ñawpaqpi ruwasqanchiskunamanta mana huchachakunanchischu?

⁹ Yaqapaschá ima ruwasqaykimantapas huchachakushanki. Ima ruwaykunapipaschá tiempoykita kallpaykita usuchirqanki. Yaqapaschá piqpa sonqontapas k’irirqanki, otaq ima ruwasqaykimantapas llakipakushanki. Chhayna kaqtinqa, ¿imatan ruwawaq?

¹⁰ Askhan chaykunawanqa llakikunku. Chayllapiña nishuta yuyaymanaspan sinchita ñak’arinku. Ichaqa, chayta ruwaspanku, ¿allichankuchu sasachakuyninkuta? Manan. Chayqa kanman huk tiyanapipas unayta kuyuykachasqaykirayku karuman chayayta munay hinan, chayta ruwaspaqa aswanpas sayk’ullankin. Chhaynaqa ama nishuta yuyaykuychu imachus ruwasqaykipi, aswanpas imallatapas ruway chayta allichanaykipaq. Yaqapaschá phiñachinakusqayki runawan pampachayninta mañakuspa amigontin kapuwaq. Chaymantapas allin yuyaywan qhawariy llakichisuqniyki ruwayman imaynapi urmasqaykita, chhaynapi ama hukmanta urmanaykipaq. Otaq yaqapaschá imaynapi tarikusqaykita aguantanallaykiña kanqa. Ichaqa chaykunamanta nishuta llakikuyqa yanqan. Hark’awanchismi Jehová Diosta tukuy sonqowan servinanchista.

11. a) ¿Imatan ruwananchis Jehová Dios khuyapayawananchispaq munakuwananchispaqpas? b) ¿Ima yanapaytan Jehová Dios qowanchis thak kawsanapaq?

¹¹ Wakin cristianokunaqa nishutan ñawpaqpi ruwasqankuwan huchachakunku chaymi yuyaykunku “Diosqa manan munakuwanmanchu” nispa. Yaqapaschá hatun huchaman urmarqanku otaq sapa kutilla ima huchatapas ruwasqankurayku yuyaykunkuman Diospa mana khuyapayananpi. Ichaqa ima huchamanña urmarqanku chaypas pesapakuspa cambiaqtinkuqa Diospa pampachaynintan mañakunkuman (Hech. 3:19). Jehová Diosqa khuyapayakuyninta munakuynintan rikuchinqa imaynan huk runakunawanpas ruwarqan hinata. Payqa khuyapayanmi Jobpa ruwasqanta hina huch’uyaykukuspa sonqomanta pesapakuqtaqa, Jobmi nirqan: “Ñut’u hallp’api, usphapi tiyaykuspa, llakikuspa yuyayniyta hap’ikuni”, nispa (Job 42:6). Thak kawsanapaqmi Diosqa kay yanapayta qowanchis: “Huchankunata pakaykuqqa manan allinyanqachu, huchankunata willakuspa saqepuqmi ichaqa khuyapayasqa kanqa”, nispa (Prov. 28:13; Sant. 5:14-16). Chhaynaqa, Diosmanmi huchanchista willakunanchis, pampachayninta mañakuspataq amaña hukmanta urmanapaq kallpachakunanchis (2 Cor. 7:10, 11). Chayta ruwasun chayqa Diosmi khuyapayawasun, ‘payqa pampachaytapunin munawashanchis’ (Is. 55:7).

12. a) ¿Imatan David ruwarqan allin concienciayoq kananpaq? b) ¿Imaynapin Jehová Dios khuyayta llakikun, imapin yanapawanchis chayta entiendey? (Recuadrota qhaway.)

¹² Jehová Diosqa yanapawallanchistaqmi mañakuywanpas. Davidqa iñiywanmi Diosmanta mañakurqan sonqonpi imachus kaqkunata willakuspa, chay mañakusqanmi Salmo libropi tarikun (leey Salmo 32:1-5). Davidqa reparakurqanmi conciencian mana allin kasqanrayku pisikallpayasqanta. Huchanta mana willakusqanraykun manaña kusisqañachu karqan, manan thakchu kawsarqan. ¿Imatan ruwarqan pampachasqa kaspa thak kawsananpaq? Diosmanta mañakuspan huchanta willakurqan. Jehová Diosqa uyarirqanmi, chaymi kallpacharqan allin kaqta ruwashanallanpaq. Chhaynallataqmi sichus sonqomanta huchaykikunata willakunki chayqa Diosqa uyarisunkin mañakusqaykita. Sichus ñawpaqpi ruwasqaykikuna llakichishasunki chayqa tukuy atisqaykita ruway allichanaykipaq. Chay qhepamanqa confianaykin pampachanasuykipaq prometesqanta Jehová Dios hunt’ananpi (Sal. 86:5).

ÑAWPAQLLAMAN QHAWAY

13, 14. a) ¿Imapin kunan yuyaykunanchis? b) ¿Ima tapukuykunan yanapawasun imachus ruwasqanchista qhawarikunanchispaq?

¹³ Runakunaqa ninkun ñawpaqpi kawsasqanchista qhawarispalla kawsay entiendekusqanta, ichaqa qhepaman imachus kananta qhawarispalla kawsay atikusqanta. Chhaynaqa manan llakikushananchischu ñawpa kawsayninchismantaqa, aswanpas imatachus ruwashanchis, hamuq tiempopi imatachus ruwasunchis chaykunapin yuyaykunanchis. Tapukunanchismi: “¿Imapas decidisqaymantachu qhepaman pesapakusaq? ¿Qhepamanchu nisaq, ‘hukniraymanta ruwayman karqan’ nispa? ¿Hunt’aq sonqowanchu Diosta servishani mana qhepaman llakipakunaypaq?” nispa.

¹⁴ Manchay ñak’ariy p’unchayqa asuykamushanñan, chaymi kaykunata nispa mana llakipakushananchischu: “¿Imaraykun mana precursorchu karqani? ¿Imaraykun mana kallpachakurqanichu yanapakuq qhari kanaypaq? ¿Astawanchu Diosta serviyta atiyman karqan? ¿Tukuytachu kallpachakurqani allin cristiano kanaypaq? ¿Paraisopi kanaypaq hinachu Dios qhawariwan?” nispa. Kay tapuykunaqa yanapawasunmanmi Diosta servispa tukuy atisqanchistachus ruwashanchis chayta qhawarikunanchispaq. Mana chayqa yaqapaschá imapas decidisqanchis qhepaman llakichiwasunman (2 Tim. 2:15).

AMA HAYK’AQPAS LLAKIPAKUYCHU DIOS SERVISQAYKIMANTA

15, 16. a) ¿Imakunatan askha cristianokuna saqerqanku aswan allin kaqta Diosman qonankurayku? b) ¿Imaraykun Diosta servinaykirayku imapas ruwasqaykimanta mana pesapakunaykichu?

¹⁵ ¿Imatapas saqerqankichu tukuy tiempoykiwan Diosta servinaykirayku? Yaqapaschá ima estudiasqaykitapas, ima negociotapas saqerqanki, pisillawan kawsaspa astawan Diosta servinaykipaq. Manapaschá casarakurqankichu otaq casarakuspapas mana wawayoqchu karqanki betelita, watukuq umalli, misionero, huk nacionkunapi huñunakuna wasikunata hatarichiypi yanapakunaykirayku. Askha watakunaña chhaynata Diosta servisqaykimanta, ¿pesapakunaykichu chay decidisqaykimanta? ¿Chay ruwasqaykitachu qhawarinayki yanqapaq hinata otaq ninaykichu “chaykunataqa qhepamanña ruwayman karqan” nispa? ¡Manapunin chhaynataqa yuyaykunaykichu!

¹⁶ Chaykunataqa decidirqanki Diosta munakusqaykiraykun, anchatataqmi munarqanki Diosta serviy munaqkuna yanapayta. Ama niychu: “Hukta ruwaspaqa aswan allinmi kashayman karqan” nispaqa. Anchata kusikuy allin kaqta akllakusqaykimanta, aswan allin kaqta Diosman qosqaykimantapas. Diosqa manan hayk’aqpas qonqanqachu payrayku imaymanakuna saqesqaykitaqa. ‘Cheqaq kawsay’ chayamuqtinqa otaq wiñaypaq ch’uya kawsay kaqtinqa Diosmi askhatapuni bendecisunki (Sal. 145:16; 1 Tim. 6:19).

MANA HUCHACHAKUSPA DIOSTA SERVINAPAQ

17, 18. a) ¿Imatan Pablo ruwarqan mana huchachakunanpaq? b) ¿Imatan ruwanki ñawpaqpi ruwasqaykikunawan, kunan ruwashasqaykiwan, qhepaman ruwanaykiwanpas?

¹⁷ ¿Imatan Pablo ruwarqan mana huchachakunanpaq? Pablon nirqan: “Ñawpa kawsayniypi kaqkunata lliwta qonqapuspaymi, ñawpaqeypi kaqman aypanaypaq anchatapuni kallpachakushani, ñawpaqllamanpunin phawashani”, nispa (leey Filipenses 3:13, 14). Pabloqa manan sapa kutillachu yuyaykusharqan judío kaspa mana allinkuna ruwasqanpi, aswanpas tiemponta kallpantan qorqan wiñay kawsay premioman aypananpaq.

¹⁸ ¿Imatan yachanchis Pabloq nisqanmanta? Ñawpa tiempopi mana allinkuna ruwasqanchismanta tukuy tiempo llakikushallayqa, manan allinchu. Imachus ruwasqanchistaqa manañan kutipayta atisunmanchu. Qhepaman imachus ruway atisqanchistan ruwananchis. Manapaschá ñawpaqpi ruwasqanchiskunataqa qonqayta atisunchu, ichaqa manan chayraykuchu huchachakushanallanchis. Ñawpaqpi ruwasqanchiskunata qonqaspan Jehová Diosta kunan servinanchis kutuy kallpanchiswan, hamuq tiempopi sumaq kawsayta qhawarispanchis.