Moisesqa huch’uyyaykukuq runan karqan
¿IMATAQ HUCH’UYYAYKUKUQ KAYRI?
Huch’uyyaykukuq runaqa manan hatunchakunchu nitaq umata hoqarinchu. Huch’uyyaykukuqqa manan hukkunamanta aswan allinpaqchu qhawarikun. Hinaspapas reqsikunanmi mana llapantachu ruway atisqanta.
¿IMAYNATAN RIKUCHIRQAN HUCH’UYYAYKUKUQ KASQANTA?
Moisesqa hatun atiytaña chaskirqan chaypas manan umanta hoqarirqanchu. Runakunaqa atiyta otaq autoridadta chaskispan rikuchinku huch’uyyaykukuqchus kanku icha manachus chayta. Robert G. Ingersoll, 1800 watakunapi orador runan chaymanta nirqan: “Yaqa llapa runakunan ima sasachakuytapas atipayta atinku. Autoridadta qoqtiykin ichaqa chayraq yachanki imayna runa kasqanta”, nispa. Chaywanmi yachanchis Moisés huch’uyyaykukuq runa kasqanta.
Jehová Diosmi Moisesman atiyta qorqan Israel llaqtata umallinanpaq. Chaywanpas payqa manan hatunchakurqanchu. Qhawarisun imaynatan huch’uyyaykukuq kasqanta rikuchirqan herencia chaskiymanta sasachakuy kaqtin (Números 27:1-11). Chaypi imachus decidikusqanqa qhepa miraykunapaq imaraqmi kanan karqan, chaymi mana hawan ukhuntachu decidikunan karqan.
¿Imatan Moisés ruwarqan? ¿Israelpi umalliq kasqanta, yachayniyoq kasqanta otaq experienciayoq kasqanta qhawarikuspachu paylla decidirqan? ¿Icha Diospa yuyaykusqanta yachaqman tukuspachu paylla decidirqan?
Hatunchakuq runa kaspaqa chaytan ruwanman karqan. Ichaqa Biblian nin: “Moisesqa chay warmikunaq mañakusqanta Señor Diosman willarqan”, nispa (Números 27:5). Moisesqa 40 wata hinañan Israel llaqtata umallirqan chaypas Jehová Diospin confiashallarqan pay kikinpi confiananmantaqa. ¡Moisesqa huch’uyyaykukuq runapunin karqan!
Moisesqa manan payllachu umalli kayta munarqan. Chaymi Jehová Dios huk israelitakunata profeta kananpaq churaqtin kusikurqan manataqmi sientepakurqanchu (Números 11:24-29). Huk kutinmi suegronpas nirqan llank’ananta huk runakunawan yanapachikunanpaq, chaypipas huch’uyyaykukuspan uyarikurqan (Éxodo 18:13-24). Moisés kurak kayninpi allin kallpayoqraq kasharqan chaypas, Jehová Diostan nirqan paypa rantinpi huk umallita akllananpaq. Chaymi Josueta Dios akllaqtin Moisesqa tukuy sonqowan yanaparqan. Hinaspapas llaqtapi runakunatan kallpacharqan Prometesqa Hallp’aman pusaqninku Josué waynata kasukunankupaq (Números 27:15-18; Deuteronomio 31:3-6; 34:7). Moisesqa may allinpaqchá qhawarirqan Diospa llaqtanpi umalliq kayta. Ichaqa manan umalli kasqanpichu astawan interesakurqan aswanpas runakunaq allin kananpin.
¿IMATAN CHAYMANTA YACHANCHIS?
Ima autoridadtaña chaskisun otaq ima ruwaytaña yachasun chaypas, ama hayk’aqpas umataqa hoqarisunchu. Jehová Diosqa huch’uyyaykukuq kasqanchistan aswan allinpaq qhawarin (1 Samuel 15:17). Huch’uyyaykukuq kasun chayqa, Proverbios 3:5, 6 textoq nisqantan kasukusun, chaypin nin: “Tukuy sonqoykiwan Señor Diosman hap’ipakuy, amataq qan kikiykiq yuyayniykimanqa k’askakuychu”, nispa.
Hinaspapas imaña kasun otaq ima autoridadtaña chaskisun chaypas amapuni chaywanqa umata hoqarisunchu.
¿Allinninchispaqchu kanqa Moisés hina huch’uyyaykukuq kay? Arí, allinninchispaqmi kanqa. Sichus huch’uyyaykukuq kasun chayqa kusisqan kanqaku ñoqanchiswan kaqkuna munakuwasuntaqmi kanpas. Astawanqa huch’uyyaykukuq Jehová Diosninchismi munakuwasun (Salmo 113:5-7). “Diosqa hatunchakuqkuna contran sayarin, huch’uyyaykukuqkunatataqmi munakuyninwan saminchaykun” (1 Pedro 5:5). Chaypi yuyaykusun chayqa Moisés hinan huch’uyyaykukuq kasun.