Diosmanta herencia chaskisqanchis

1. ¿Imatan Jehová Dios waqaycharqan runakunata munakuspa?

‘WIÑAYPAQ KAWSAQ’ Diosmi willawanchis wiñay kawsayta chaskinapaq imatachus ruwananchista. Chay willawasqanchisqa manan cambianqaku, Diospa rimasqan ‘simi wiñay-wiñaypaq’ kasqanrayku (1 Pedro 1:23-25). Anchatan Jehová Diosta agradecekunchis Bibliapi chay willakuyta qelqachispa waqaychasqanmanta. Chay ruwasqanpin rikuchin runakuna munakusqanta.

2. ¿Ima reqsinanchistan Jehová Dios munan?

² Jehová Diosmi Simin Qelqapi sutinta qelqachirqan llaqtanpi runakuna reqsinanpaq. “Hanaq pachapas kay pachapas” kamasqa kasqanmanta willashallasparaqmi Bibliaqa Jehováa Diospa sutinmanta rimarqan (Gén. 2:4). Chay qhepamanmi milagrota ruwaspa Chunka Kamachikuykunata qelqasqan rumipi askha kutita sutinta churarqan. Ñawpaq kamachikuypin nin: “Ñoqan Señor [Jehová] Dioniyki kani”, nispa (Éx. 20:1-17). Arí, Jehová Diosqa waqaycharqanmi Simintapas sutintapas, Satanasña chinkachinanpaq tukuy imaymanata ruwarqan chaypas.

3. ¿Imatan Jehová Dios waqaycharqan k’anchaypi purinapaq?

³ Jehová Diosqa Simin Qelqapin cheqaq yachayta waqaychallantaq. Chaymi ancha kusisqa kashanchis cheqaq yachaywan Diospa k’anchaykusqan ñanninta purispa (leey Salmo 43:3, 4). Laqhayaq ukhupi hinaña runakuna pantasqa yachachikuykunapi purishanku chaypas, ñoqanchisqa k’anchaypin purishanchis (1 Juan 1:6, 7).

HATUN HERENCIATAN CHASKINCHIS

4, 5. ¿Ima hatun kusikuymi karqan Diosta serviqkunapaq 1931 watamantapacha?

⁴ Cheqaq cristianokunaqa hatun herenciatan chaskirqanchis. Huk diccionarion nin: “[Herenciaqa] huk llaqtaq mana cambiaq ruwayninkuna costumbrenkunan, chaytan hamuq miraykunapas ruwashallanku”, nispa (Gran Diccionario de Uso del Español Actual). Hatun herencia chaskisqanchisqa kaymi: Diospa Siminta sut’ita entiendesqanchis, Diosmantapas munayninmantapas cheqaqta yachasqanchispiwan. Chay hatun herencia chaskisqanchispin kallantaq huk herencia.

⁵ Chay herenciatan chaskirqanchis 1931 watapi Estados Unidospi Columbus (Ohio) llaqtapi, huk hatun huñunakuy aparikusqanpi. Chay huñunakuypaq programapin qelqasqa kasharqan JW nisqa letrakuna. Huk iñiqmasin nirqan: “Llapa iñiqmasikunan chay letrakunata imaymanawan tupachirqanku yachayta munaspa”, nispa. Chayraqmi domingo p’unchayta 26 julio killapi chay letrakuna sut’inchakurqan: Biblia Estudiaqkuna nisqa sutiq rantinpin, Jehová Diospa testigonkuna nisqa sutiwan sutichakapurqanchis Bibliaq nisqanman hina (inglés simipi Jehovah’s Witnesses). ¡Ancha kusikuymi karqan! (Leey Isaías 43:12.) Huk iñiqmasin willan: “Manan hayk’aqpas qonqasaqchu chay p’unchaypi kusikuymanta anchatapuni t’aqllakusqankuta”, nispa. Manan huk religionkuna chay sutita apayta munarqankuchu, ñoqanchismi ichaqa 80 wata hinaña chay sutita apashanchis. ¡Ancha kusikuymi Jehová Diospa testigon kayqa!

6. ¿Ima willakuykunatan herenciata hina chaskillanchistaq?

⁶ Hatun herencia chaskisqanchispin kashallantaq ñawpa tiempomanta Bibliapi tarikuq ancha allin willakuykuna. Chaypaq yachasun Abraham, Isaac, Jacob runakunamanta. Paykunaqa sapa kutillachá familiankuwan parlaqku Jehová Diospa sonqonta imayna kusichiymanta. Chaychá Josepas patronninpa warmin paywan puñuyta munaqtin nirqan: “¿Imaynan [...] Dios contra huchallikuyman?” nispa (Gén. 39:7-9). Apostolkunaq tiemponpi cristianokunapas qhepa mirayninkumanmi yachasqankumanta willaqku otaq kawsayninkuwan yachachiqku. Apóstol Pablopas chaytan ruwarqan Señorpa Cenanmanta iñiq t’aqakunaman yachachispa (1 Cor. 11:2, 23). Kunanpas ‘espiritupi cheqaq-kaypiwan’ Diosta yupaychanapaq yachachikuykunaqa Simin Qelqapin tarikun (leey Juan 4:23, 24). Ñoqanchismi astawanqa Bibliapi cheqaq yachachikuykunata ancha chaninpaq qhawarinchis llapa runakunapaqña kashan chaypas.

7. ¿Ima promesan kashallantaq herencia chaskisqanchispi?

⁷ Hatun herencia chaskisqanchispin kashallantaq kay tiempopi willakuykuna, chay willakuykunan rikuchiwanchis Jehová Dios ñoqanchiswan kashasqanta (Sal. 118:7). Chaykunata qelqanchiskunapi leespan pakaykusqa hina sientekunchis qatiykachasqaña kashaspapas. Herencia chaskisqanchisqa astawanmi yapakushan. Chay herenciapin kashallantaq kay sumaq promesa: “Manan ima ruwasqa armapas imanasunkipaschu, llapa huchachaqniykitapas upallachinkin. [...] [‘Kaymi Jehová Diosta serviqkunaq herencia chaskisqanku’, NM]. Señor Diosmi chay hinatapuni nin”, nispa (Is. 54:17). Satanasqa manan ima armawanpas pasaqpaqqa atipayta atiwasunmanchu.

8. ¿Imakunamantan yachasun kay estudiopi qatimuq estudiopipas?

⁸ Satanasqa ñawpaqmantañan Diospa Simintapas sutintapas chinkachiyta munarqan, cheqaq yachaytapas pakayta munarqan. Ichaqa manan Jehová Diostaqa atipayta atinmanchu, Diosqa mana allinkuna ruway munasqantan lliwta qolluchishan. ¿Imaynatan Jehová Dios Siminta waqaycharqan? ¿Imatan ruwarqan sutinta reqsinanchispaq? ¿Imatan ruwarqan cheqaq yachayta tarinanchispaq? Chaykunamantan kay estudiopi qatimuq estudiopipas yachasun.

SIMIN QELQATA WAQAYCHARQAN

9-11. ¿Ima ejemplokunan rikuchin Bibliata manapuni pipas chinkachiy atisqanta?

⁹ Jehová Diosqa tukuy imaymanatan ruwarqan Simin Qelqata waqaychananpaq. Enciclopedia Cattolica nin: “1229 watapin Concilio de Toulouse nisqa runakunata kamachirqan [huk simikunapi] Bibliakunata ama hap’inankupaq, Albi llaqtapi religiosokuna hinallataq valdenses t’aqa runakuna contra kasqankurayku [...]. 1234 watapin, Españapi Jaime I runaq umallisqan Concilio de Tarragona ruwakusqanpi kaqllatataq kamachikurqan. [...] 1559 watapin [kikin papa] Pablo IV, Índice de libros prohibidos nisqapi kamachikurqan Santo Oficio nisqaq autorizasqallan huk simiman Bibliakuna ruwakunanta hap’inankutapas.

¹⁰ Chaywanpas Bibliaqa manan chinkarqanchu aswanmi kay tiemponchispipas kashallan. 1382 watapin John Wyclef yanapaqninkunawan kuska inglés simiman Bibliata t’ikrarqanku. Chaytan ruwarqan William Tyndale runapas, ichaqa 1536 watapin wañuchirqanku. Payqa huk k’aspiman watasqa kashaspas mañakusqa: “Señor, Inglaterra reypa ñawinta kichariy” nispa. Chay qhepamantaq seq’ospa ruphachirqanku.

¹¹ Askha runakunaña Bibliata cheqnikurqanku chaypas manan chinkachiyta atirqankuchu. Yachasun 1535 watapi Miles Coverdale runaq t’ikrasqan Bibliamanta. Payqa Tyndale runaq t’ikrasqan Mosoq Testamentowan hinallataq Génesis libromanta Crónicas librokama t’ikrasqan librokunawanmi yanapachikurqan. Bibliapi huk librokunata t’ikrananpaqtaq latín simipi Bibliakunawan, alemán simiman Martín Luteroq t’ikrasqan Bibliawan ima yanapachikurqan. Kunanpas askha runakunan allinpaq qhawarinku Traducción del Nuevo Mundo de las Santas Escrituras nisqa Bibliata. ¿Imarayku? Ñawpa qelqakunawan allinta tupasqanrayku, facíl entiendenapaq predicanapaqpas kasqanrayku. ¡Manan Satanaspas nitaq pipas Diospa Simintaqa chinkachiyta atinqachu!

SUTINTA REQSICHIRQAN

12. ¿Imapaqmi Traducción del Nuevo Mundo nisqa Biblia ruwakurqan?

¹² Jehová Diosqa Bibliapin sutinta waqaycharqan runakuna reqsinanpaq, chaypaqmi Traducción del Nuevo Mundo nisqa Biblia ruwakurqan. Qelqakuna t’ikraymanta encargakuqkunan kallpachakurqanku allinta ruwakunanpaq. Español simiman t’ikrasqa Bibliaq qallariyninpin nishan: “Kay Bibliapiqa maypis rikhurinanpin Diospa sutinta español simipi churakun. Chaymi [...] Hebreo Rimay Qelqakuna nisqapi ‘Jehová’ suti rikhurin 6.973 kutita, Griego Rimay Qelqakuna nisqapitaq 237 kutita”, nispa. Traducción del Nuevo Mundo Bibliaqa 116 simikunapin t’ikrasqa kashan, 178.545.862 hinatan ruwakunpas.

13. ¿Imaynapin yachanchis Diospa sutin qallariymantapacha reqsisqa kasqanta?

¹³ Diospa sutinqa qallariymantapachan reqsisqa karqan. Adanpas Evapas reqsirqankun Diospa sutinta, Bibliapunin willan chay sutita Evaq rimasqanta. Hatun Paraq kasqan qhepamanmi, mana respetoyoq Cam churinmanta Noé nirqan: “Sempa Diosnin [Jehová] Señorqa saminchasqa kachun, Canaantaq Sempa kamachin kachun”, nispa (Gén. 4:1; 9:26). Dios kikinmi nirqan: “Ñoqan Señor [Jehová] Diosqa kani, manan wakqa kanchu, manan ñoqamanta wak diosqa kanchu”, nispa (Is. 42:8; 45:5). Jehová Diosmi sutinta waqaycharqan llapa runakuna reqsinanpaq. Chaymi ñoqanchisqa sutin apasqanchismanta Testigonkuna kasqanchismantawan anchatapuni kusikunchis (Sal. 20:5).

14. ¿Imakunapin rikhurillantaq Diospa sutin?

¹⁴ Diospa sutinqa manan Bibliallapichu kashan. Mar Muerto nisqamanta 21 kilometropi tarikuq Dibón llaqtapin Moabita Rumi nisqata tarirqanku. Chay rumipin qelqasqa kashan Israelpi Omrí reypa sutin, Israel contra hatarisqankumanta Moabpi Mesá reypa rimasqanpiwan (1 Rey. 16:28; 2 Rey. 1:1; 3:4, 5). Chaykunamanta astawanqa Diospa sutinmi hebreo simi YHWH letrakunapi qelqasqa kashan, chaytan reqsikun Tetragrámaton nispa. Chay letrakunan askha kutita rikhurillantaq Israelpi tarisqanku Cartas de Lakís nisqa k’arpakunapi.

15. ¿Imatan sutichakun Septuaginta nispa? ¿Imarayku ruwakurqan?

¹⁵ Qallariypi Bibliata t’ikraqkunan yanapakurqanku Diospa sutin mana chinkananpaq. Babilonia llaqtaman apasqa judiokunan 607 watamanta 537 watakama (manaraq Jesús hamushaqtin) chaypi tiyarqanku, ichaqa askha judiokunan manaña llaqtankumanchu kutipurqanku. 300 watapaqqa (m.J.h.) Egiptopi tarikuq Alejandría llaqtapin askha judiokuna tiyarqanku, paykunan chay tiempopi rimakusqan griego simipi Diospa Siminta necesitarqanku, chaymi hebreo simimanta griego simiman t’ikrarqanku. Chay qelqakunatan 200 watakunapi (m.J.h.) t’ikrayta tukurqanku, chaytan suticharqanku Septuaginta nispa. Chay qelqamanta wakin copiakunapin hebreo simipi Jehová suti rikhurishan.

16. ¿Maypin Diospa sutinta churakurqan 1640 watapi lloqsimuq libropi?

¹⁶ Diospa sutinqa Bahiamanta Salmos Libropin (inglés simipi) tarikullantaq, chay libron ñawpaqta lloqsimurqan América del Norte nisqaq wakin llaqtankunapi. 1640 watapin ñawpaqta lloqsimurqan Salmo libro, hebreo simimanta inglesman t’ikrasqa. Salmo 1:1, 2 textopin willarqan “kusisamiyoq” runa millay runakunaq yuyaychayninta mana hap’ikusqanmanta, aswanpas Jehová Diospa kamachikuy siminwan kusikusqanta. Diospa sutinmanta astawan yachayta munanki chayqa El nombre divino que durará para siempre nisqa folletota leey.

CHEQAQ YACHAYTA WAQAYCHARQAN

17, 18. a) ¿Ima ninanmi “cheqaq” nisqa simi? b) ¿Imatan nikun ‘allin willakuykunaq cheqaq yachachikuynin’ nispa?

¹⁷ Cristianokunaqa kusisqan servinchis ‘cheqaq’ rimaq Diosta (Deut. 32:4). Huk diccionarion “cheqaq” nisqa simimanta nin: “Chay hinapuni imachus kasqanmi, imachus sucedesqanmi, manan yanqa yuyaykuyllachu”, nispa (Diccionario de uso del español de América y España). Hebreo simipitaqmi “cheqaq” nispa nikun: confianapaq hina kaqta, sut’ipuni kaqta, hunt’asqa otaq sut’inchasqa kaqta. Griego simipitaq nikun: imachus sucedesqanman hina kaqta, chanin kaqta, chay hinapuni kaqta.

¹⁸ Jehová Diosqa Simin Qelqapin cheqaq yachayta waqaycharqan, pisi-pisimantataq chayta yachachiwarqanchis (2 Juan 1, 2). Cheqaq yachayqa astawanmi yapakushan, chaymantan Proverbios 4:18 texto nin: “Chaninkunaq puriyninqa pacha illarimuy k’anchay hinan, allinta p’unchayamuqtin aswan-aswanta k’anchariq hinan”, nispa. Chaymi ñoqanchispas Jesús hina Diospa Siminmanta ninchis: “Simiykiqa cheqaq-kaypunin”, nispa (Juan 17:17). Diospa Simin Qelqapin kashan ‘allin willakuykunaq cheqaq yachachikuyninkuna’, chayqa llapa iñisqanchis yachachikuykunan (Gál. 2:14). Chaypin kashan: Diospa sutin, Dioslla kamachikunanpaq derechoyoq kasqan, Cristoq sacrificakusqan, wañuqkunaq kawsarimpuynin, Diospa Gobiernonmanta yachay ima. ¿Imaynatan Jehová Dios cheqaq yachayta waqaycharqan Satanás pakayta munashaqtin?

SAQRAQ RUWAY MUNASQANTA QOLLUCHIN

19, 20. ¿Pin karqan Nemrod? ¿Satanaspa ima yuyaykusqanmi qolluchisqa karqan?

¹⁹ Hatun Para kasqan qhepallamanmi kay rimay karqan: ‘Nemrod hina, payqa Diospa contranpi cazadormi karqan’ nispa (Gén. 10:9, NM). Nemrodqa Diospa enemigonmi karqan Satanastataqmi yupaycharqan. Jesuspa enemigonkunapas Satanastan yupaychaqku. Chaymi huk kutin Jesús nirqan: “Qankunaqa saqraq wawankunan kankichis, chaymi taytaykichispa munayninta ruwayta munankichis. Payqa qallariymantapachan runa wañuchiq karqan, manataqmi cheqaq-kayqa sonqonpi kanchu”, nispa (Juan 8:44).

²⁰ Nemrodqa Babel llaqtata, Tigris mayumanta Eufrates mayukama llaqtakunatawanmi munaychakurqan (Gén. 10:10). Paymi 2269 watapi (m.J.h.) Babel llaqtata hatun torretapas hatarichinman karqan. Diosmi munarqan llapa runakuna Hallp’antinpi tiyanankuta, ichaqa runakunan ninakurqanku: “Kunanqa, huk llaqtata perqasunchis, hanaq pachakama aypaq torretawan. Allin mentasqa runataq kasunchis, amataq kay pachantinmanpas ch’eqesunchu”, nispa. Chaymi Diosqa rimayninkuta t’ikraspa “pachantinman ch’eqeykachirqan” (Gén. 11:1-4, 8, 9). Satanasqa yaqapaschá munarqan chay llaqtapi huk religión kananta chaypi payta yupaychanankupaq. Ichaqa Diosmi chay yuyaykusqanta qolluchipurqan. Diosta yupaychaqkunan ichaqa kallarqanpuni manataqmi pipas qolluchiyta atirqanchu, chaymi kunanpas astawanraq yapakushan.

21, 22. a) ¿Imaraykun pantasqa religionkuna mana hayk’aqpas cheqaq religionta atipayta atirqankuchu? b) ¿Imamantan yachasun qatimuq estudiopi?

²¹ Pantasqa religionkunaqa manan hayk’aqpas cheqaq religionta atipayta atirqankuchu. ¿Imarayku? Hatun yachachiqninchis Diosmi Simin Qelqata waqaycharqan, runakunaman sutinta reqsichirqan, kunankamataq cheqaq yachayta runakunaman mast’arishan (Is. 30:20, 21). Munasqanman hina Diosta servispaqa kusisqan kasun. Chaymi iñiyninchispi qaqata sayananchis, tukuy sonqowan Diospi confiananchis, santo espiritunwantaq pusachikunanchis.

²² Qatimuq estudiopin yachasun religionkuna pantasqa yachachikuykuna paqarichimusqanmanta, chaykunatataq Bibliawan sut’inchasun. Yachallasuntaqmi Jehová Dios cheqaq yachayta imayna sut’inchawasqanchista, tukuy chaykuna herencia chaskisqanchis kasqantapas.