Círculo polar ártico nisqaq qayllanpi 50 wataña predicashayku

FINLANDIA nacionpi Ostrobotnia Septentrional llaqtamantan kayku. Tayta-mamaykuqa chakra llank’aqmi karqanku wawankunataq chunka karqayku. Segunda Guerra Mundial kashaqtinqa sipaskunallaraqmi karqayku. Tiyasqaykumanta karupiña guerra aparikurqan chaypas nishutan llapa runakunata ñak’arichiwarqanku. Huk kutinmi Oulu, Kalajoki llaqtakunaman bombata kachaykamuqtinku nina rawray hinaraq tutapi chay llaqtakunaq hawanpi rikukurqan. Chaykuna kashaqtinmi kuraq turayku willawarqanku qhepaman kay Hallp’a huk paraisoman tukupunanta, chayta uyarispan astawan willawanankuta munarqayku.

Tauno turaykun Biblia Estudiaqkunaq qelqankunata leespa 14 watanpi cheqaq yachayta tarirqan. Chaymi Segunda Guerra Mundial qallariqtin mana munarqanchu chay guerrapi yanapakuyta. Chaymantan carcelpi wisq’arqanku chaypitaqmi nishuta ñak’arichirqanku. Chaykunapi tarikusqanmi astawanraq iñiyninpi kallpacharqan, chaymi carcelmanta lloqsispa astawanraq tukuy sonqowan predicarqan. Chayta rikuspan ñoqaykupas qayllaykupi kaq llaqtapi Testigokunaq huñunakuyninman rirqayku. Hatun huñunakuykuna kaqtinpas riqmi kayku, ichaqa askhatan llank’anayku karqan pasajeykupaq qolqeta huñunapaq. Chaypaqmi cebollata plantarqayku, fresaman rikch’akuq frutakunata pallarqayku, vecinokunaq p’achankutapas sirapuq kayku. Ichaqa wasipi askha ruwana kasqanraykun turnopi riq kayku.

Jehová Diosmanta astawan yachasqaykuman hinan astawan payta munakurqayku, chaymi 1947 watapi iskayniyku bautizakurqayku (Annikki 15 watanpi Ailitaq 17 watanpi). Chay watallapitaqmi Saimi ñañaykupas bautizakurqan. Hinaspapas casarasqaña kaq Linnea ñañaykumanmi Bibliamanta estudiota qorqayku, chaymi paypas familiantin Bautizakurqan. Ñoqaykuqa bautizakusqayku qhepamanmi atisqayku killakunapi precursora (precursor auxiliar) kayta munarqayku.

TUKUY TIEMPOYKUWAN DIOSTA SERVIYKU

1955 watapin Kemi llaqtaman tiyaq ripurqayku. Ñoqaykuqa ch’isiyaqmi llank’aq kayku, ichaqa manan qonqarqaykuchu precursor kay munasqaykuta. Ichaqa precursora kaspa qolqe pisiwanankuta manchakuspan qolqetaraq ñawpaqta huñurqayku. Chhaynapi tarikushaqtiykun ñawpaqpi willasqayku precursorawan parlarqayku. Paywan parlaspaykun repararqayku Diosta tukuy tiemponchiswan servinapaqqa mana ima kaqninchispichu confiana nitaq familianchispa yanapaynintachu suyana. Aswanmi kikin hanaq pacha Taytanchispi hap’ipakunanchis.

Chaypaqqa iskay killa precursora kanaykupaqmi qolqeta huñururaykuña. Chaymi 1957 watapi manchan-manchan nirqayku Laponiapi tarikuq Pello llaqtapi precursora kanaykupaq. Iskay killa qhepamanqa manan huñusqayku qolqemanta imatapas tupaykurqaykuchu. Chaymi iskay killatawan precursora kanaykupaq mañakurqayku. Chay killakuna pasaytapas kaqllan qolqeykuqa kasharqan. Chaypin chayraq repararqayku Jehová Diospa makinpi kasqaykuta. Phisqa chunka wata hinaña pasarun chaypas ¡hap’ishaykuraqmi chay huñusqayku qolqeta! Tukuy chay tiempokunapi Diosta servisqaykupi yuyaymanaqtiykun reparayku, Jehová Diospas makiykumanta hap’iykuspa “ama manchakuychu, ñoqan yanapasqayki” nispa niwasqankuta (Is. 41:13).

1958 watapin iñiqkunata watukuq umalli invitawarqanku Sodankylä llaqtapi precursora especial kanaykupaq, chayqa círculo polar ártico nisqaq hawanpin tarikun. Chay llaqtapiqa huk Testigollan tiyarqan. Paymi kay hinapi Diosmanta yachasqa: wawanmi estudiaqmasinkunawan Helsinki nisqa hatun llaqtata viajasqa. Callepi purishaqtinkus huk kuraq iñiqmasinchis Qhawaq revistata wawanman qosqa, nisqataqsi “mamaykiman qonki” nispa. Chay revistata wawan qoqtinsi payqa leeruspa nisqa: “Kaymá cheqaq yachachikuyqa”, nispa.

Tablakuna ruwananku wasiq patanpin huk cuartota alquilarqayku tiyanaykupaq huñunakunaykupaq ima. Qallariypiqa tawallan huñunakuq kayku, chay llaqtapi tiyaq iñiqmasi, ususin, ñoqaykupiwan. Qhepamanmi Bibliata estudiaq runa tablakuna ruwananku wasiman llank’aq hamurqan. Hinan familianwan kuska huñunakuykunaman hamuyta qallarirqan, qhepaman bautizakuspataq pay chay huñunakuykunata aparirqan. Chaypi llank’aqkunamanta wakin runakunan huñunakuykunaman hamuyta qallarirqanku qhepamantaq iñipurqanku. Chaymanta iskay wata qhepamanmi iñiq t’aqa kapurqan.

SASAN KARQAN PREDICANAPAQ

Chay llaqtapi runakunaqa karu-karupin tiyaqku, chaymi sasa karqan predicanapaq. Ch’aki tiempopin chakillapi predicaq riq kayku, maynintaq botepi, bicicletapi ima. Bicicletaqa anchatan yanapawaqku hatun huñunakuykunaman rinaykupaq otaq karupi tarikuq familiaykuta visitanaykupaq. Rit’iy tiempopin carropi riq kayku predicanayku llaqtakunata, chayman chayaspataq chakillapi wasin-wasinta predicaq kayku. Chay llaqtachapi runakunata predicaruspan huk llaqtatañataq chakillapi riq kayku. Chay killakunaqa nishutan rit’iq chaymi carreterakunapas mana puriy atiy karqan. Chaymi carreta aysaq caballokunaq purisqallanta riq kayku, mayninqa ratollan chaykunatapas rit’i pakaruq. Para qallariy tiempopiqa purispan rit’iman chinkaykuq kayku chaymi sasa karqan purinapaq.

Chay tiempokunapiqa allin-allintan chirimanta cuidakuq kayku. Lanamanta mediaswan churakusqayku hawamanmi iskay otaq kinsa mediastawan churakuq kayku chaymantaq botasta. Hatunña botasniyku karqan chaypas rit’in hunt’arullaq, chaymi huk wasiman chayaspa hina chay rit’ita botasniykumanta hich’aq kayku. Abrigoykun rit’iman tupaspa apichakuq, astawan chiriqtintaq rumiman hinaraq tukuq. Chaymi huk kutin 11 kilometrota purispa huk warmiq wasinman predicanaykupaq chayaqtiyku niwarqanku: “May hatun iñiyniyoqchá qankunaqa kankichis chaychá khaynaniraq chiripi hamunkichis”, nispa.

Karukunapi predicaspan mayninqa runakunaq wasillanpi puñupakuq kayku. Tutayamushaqtinqa runakunatan valekuq kayku alojawanankupaq. Wakchaña karqanku chaypas sumaq runakunan kaqku. Paykunaqa manan puñunallatachu qoykuwaqku aswanmi mikhunankutawan haywariwaqku. Askha kutipin animalkunaq qaranpi puñurqayku, maynintaq qhapaq hinaraq puñuq kayku. Huk kutinmi huk warmi hatun wasiq altosninman apawarqanku. Chaypin kasqa alojananku cuarto munay camayoq yuraq sumaq sabanakunayoq ima. Sapa kutillanmi tuta-tutakama wasiyoqkunawan rimaq kayku. Huk kutinmi alojawaqniyku runakuna puñusqayku cuartollapitaq puñurqanku, hinan Bibliamanta rimayta qallarirqayku. Paykunaqa turnopin tapuwarqanku Bibliamanta, chaymi yaqa illariykama parlarqayku.

CHASKISQAYKU

Laponia ladopi campokunaqa munaymi tiempo cambiasqanman hinataq aswan munayman tukun, ichaqa Diosmanta chaypi uyarikuq runakunan aswan munayqa. Huk ladokunamanta chaypi llank’aq runakunatan predicaq kayku. Chaypaqmi mayninqa hatuchachaq runakunaq tiyasqanku wasikunata haykuq kayku, sumaqtataqmi uyarikuqku qelqakunatapas chaskikuqku.

Sumaq experienciakunatan chaypi tarirqayku. Huk kutinmi estacionmanta carro phisqa minuto ñawpaqta lloqsiqtin manaña ayparqaykuchu. Hinan huk carroman seqarqayku mana hayk’aq predicasqayku llaqtata rinaykupaq. Huk wasipi predicayta qallariqtiykun huk sipas lloqsimuspa niwarqanku: “Kayqa chayaramunkichisña, yuyaykusqay hinapunimá kasqankichis”, nispa. Ñoqaykuqa manan payta reqsirqaykuchu, ichaqa estudiachisqayku warmiq ñañanmi kasqa, paytan nisqa chay p’unchay visitanaykupaq. Ichaqa manan ñañanqa imatapas willawarqankuchu. Chaymi Bibliata paywan estudiayta qallarirqayku qayllanpi tiyaq familiankunawan ima. Chay qhepamanmi chunka iskayniyoq estudiantekunata huñuspa estudiachirqayku, hinan chay familiamanta askha bautizakapurqanku.

1965 watapin Kuusamo llaqtamanñataq kachawarqanku. Chayqa kashan círculo polar ártico nisqaq uranpin, chaypin kunankama tiyashayku. Chay tiempopaqqa pisillan chaypi Testigokuna karqanku. Chaypi runakunaqa religionniyoqmi karqanku, mana allintataqmi Testigokunata qhawariqku, chaymi chayman chayaqtiykuqa pisita runakuna uyarikuqku. Ichaqa askha runakunan Bibliata respetaqku chaymi paykunaman interesaq temakunamanta rimaq kayku. Pisi-pisimantan runakunawan reqsinakurqayku, iskay watamanta hinataq askha estudiokunata tarirqayku.

PREDICASHALLAYKU

Kunanqa manañan kallpayku kanchu ch’isiyaq predicanaykupaq ichaqa yaqa sapa p’unchaymi predicayku. 1987 watapin Aili 56 watanpi kashaqtin, sobrinoyku kallpacharqan carro manejayta yachananpaq. Licenciata horqoruqtintaq chay anchata yanapawarqanku predicanaykupaq. Hinaspapas Huñunakuna Wasitawan kuskan huk cuartokunata ruwarqanku, hinan chayman astakurqayku, chaytaqmi anchata yanapawallarqankutaq.

Finlandia nacionpa wichay ladonpi predicayta qallarishaqtiykuqa ch’eqe-ch’eqellan chay ladokunapi Testigokuna kaqku. Chaymi anchata kusikuyku wiñasqanta rikuspa. Kunanqa askha iñiq t’aqakunan chaypi kan. Hatun huñunakuykuna kaqtinmi sapa kutilla iñiqmasikuna asuykamuwaspanku niwanku “¿reqsiwashankichu?” nispa. Wakinqa wawallaraqmi karqanku familiankuta estudiachishaqtiyku. ¡Jehová Diosmi wiñachirqan muhu tarpusqaykuta! (1 Cor. 3:6.)

2008 watawanmi 50 wataña karun precursora especial kasqaykumanta. Jehová Diostan anchata agradecekuyku kay sumaq llank’aypi kanaykupaq kallpachanakusqaykumanta. Imaykupas pisillaña karqan chaypas manan imapas pisiwarqankuchu (Sal. 23:1). ¡Yanqapaqmi qallariypiqa imamantapas llakikurqayku! Ancha kusisqan kashayku kunan p’unchaykama Jehová Dios kay promesanman hina kallpachawasqankumanta: “Ñoqan kallpachasqaykipas yanapasqaykipas, ñoqan hap’iykusqaykipas atipachisqaykipas” (Is. 41:10).