LEEQKUNAQ TAPUKUSQAN
¿Tiyankumanchu huñunakuykunapi iñiq tayta-mamakuna Diospa llaqtanmanta qarqosqa wawankuwan kuska?
Manan sinchitaqa llakikushanachu Diospa llaqtanmanta qarqosqa runa huñunakuyman hamuqtin maypi tiyananmanta. Kay revistan sapa kutilla tayta-mamakunata kallpachan makillankupiraq kaq qarqosqa wawankuta atikusqanman hina iñiyninpi yanapanankupaq. 1988 wata 15 noviembre killamanta, La Atalaya revistan 19, 20 paginakunapi nirqan, tayta-mamakunaqa makillankupiraq kaq qarqosqa wawankuta Bibliamanta yachachiy atisqankuta. Chay wawakunaqa yanapanatan necesitanku mana allin ruwasqankumanta kutirikunankupaq.
Diospa llaqtanmanta qarqosqa wawa tayta-mamanpa makillanpiraq kashan chayqa, atinmanmi huñunakuykunapi tayta-mamanpa ladonpi tiyayta, ichaqa ch’inllan kanan. Huñunakuykunapiqa manan sapaq tiyanakunachu kan qarqosqakunapaq, chaymi mana pipas hark’akunanchu tayta-mamanpa ladonpi tiyananta. Tayta-mamakunan wawankuta iñiyninkupi yanapananku, chaymi paykunaqa kallpachakunku wawanku huñunakuykunapi allinta uyarinankupaq. Wawanku sapaqpi tiyanman chayqa manan yanapayta atinkumanchu.
Wawanku manaña wasinkupichu tiyanman chayri, ¿manañachu tayta-mamakuna huñunakuykunapi paywan kuska tiyayta atinkuman? Ñawpaqmantañan qelqanchiskuna willarqan huk wasipi tiyaq qarqosqa familiawan huñunakuyta imayna qhawarinanchis kasqanta.a Qarqosqa runa huñunakuyman rispa familianpa ladonpi tiyaykunman chaypas, iñiq familiaqa manan yanqa qasi paywan huñunakushananchu. Sichus iñiq familiakuna Bibliapi Diospa kamachikusqanman hina qarqosqa familiankuta qhawarishanku chayqa, manan imamantapas llakikushanachu (1 Cor. 5:11, 13; 2 Juan 11).
Sichus qarqosqa runa huñunakuykunaman hamuspa ch’inlla kanqa chayqa, tiyallanmanmi familianpa ladonpi otaq mayqen iñiqkunaq ladonpipas. Huñunakuna Wasipi maypi tiyanankupaqpas kamachikuyta churayqa sasachakuykunatan apamunman. Sichus qarqosqa familiayoq cristianokuna llapa iñiqmasikunapas kallpachakushanku Diospa kamachikusqanman hina qarqosqa runata qhawarinankupaq, qarqosqa runa maypi tiyasqanpas mana hukkunata misk’achinchu chayqa, manan pipas llakikushananchu huñunakuyman hamuq qarqosqa runa maypi tiyananmanta.