Jehová Diosmi ‘p’unchay-p’unchay sasa kawsayniypi kawsaysiwan’
Onqosqa kasqaywan sinchitaña ñak’arini chaypas, hanaq pachapi kaq Taytanchis Jehová Diosmi sapa p’unchay munakuywan yanapawan. Kunankamaqa 20 watañan karun precursora kaspa Diosta kusisqa servisqaymanta.
1956 watapin nacerqani, ichaqa wiksallapiraq kashaqtiymi wasa tulluykuna mana allintachu k’askanakurqan, chaytaqmi wasa tulluypi nerviokunata afectarqan. Chaywanmi sasata purini manataqmi qhali kasqay kanchu.
Manaraq naceshaqtiymi tayta-mamay casarasqa Testigo misionerokunawan Biblia estudiayta qallarirqan. Nacesqay qhepamanqa iskay kinsa Testigokunallan Usakos (Namibia) llaqtaypi tiyarqanku. Chaymi familiapi hinalla huñunakuykunapaq qelqakunata estudiaq kayku. 7 wataypi kashaqtiymi mana unu hisp’ayniy pasayta atirqanchu, chaymi operawaspa huk t’oqota hina ruwawarqanku hisp’ay pasananpaq. Qhepamanmi 14 wataypi kashaqtiy epilepsia onqoy hap’iwallarqantaq. Tayta-mamaypa cuidawananta necesitasqayraykun colegiopi estudioytapas mana tukurqanichu.
Chaywanpas kallpachakurqanin iñiyniypi allin takyasqa kanaypaq. Chay tiempopaqqa pisillan karqan afrikáans simipi qelqakuna, chaymi inglés simita yacharqani libronchiskunata estudianaypaq. Qhepamanmi publicadora kapurqani, 19 wataypitaq bautizakurqani. Chay qhepamanmi tawa wata hunt’a astawan onqorqani, sinchitataqmi llakikuq kani. Hinaspapas llaqtaypi runakunata manchakuspan mana tukuy atisqaytachu predicaq kani.
20 wataypi kashaqtiymi Namibia nacionmanta Sudáfrica nacionman astakurqayku, chaypin ichaqa huñunakuykuna karqan. ¡Anchatan chay kusichiwarqan! Ichaqa hatun hisp’ayniy mana pasaqtinmi yapamanta operawaspa wiksaytañataq t’oqowarqanku chayninta pasananpaq.
Huk kutinmi iñiq t’aqakunata watukuq umalli precursor kaymanta rimarqan, chaytaqmi sonqoyman chayarqan. Sinchi onqosqaña tarikurqani chaypas, yuyarirqanin Jehová Dios imaymana sasachakuykunapi tarikushaqtiy yanapawasqanta. Hinan precursora kanaypaq solicitudta hunt’arqani. Ichaqa onqosqata rikuwaspan umallikuna mana atinaypaq hina qhawarirqanku.
Chaywanpas tukuy atisqaytan kallpachakurqani astawan predicanaypaq. Chaymi mamaypa yanapayninwan huk iñiqmasikunaq yanapayninwan ima, precursor regular hina soqta killa llank’arqani. Chaypin qhawarichikurqani onqosqaña kashaspapas precursora kay atisqayta. Yapamantan solicitudta hunt’arqani, hinan 1988 wata setiembre killamanta precursora regular kapurqani.
Precursora kasqaymantapachan astawan Diospa yanapayninta rikurqani. Onqoyniykunallapi yuyaykunaymantaqa, runakunaman Diosmanta yachachiymi pakaykuwan, kallpachawan, iñiyniypipas allinta takyachiwan. Ancha kusisqan kani askha runakunata bautizakunankukama yanapasqaymanta.
Manan yachanichu onqoyniywan imaynapi tarikunayta. Ichaqa Jehová Diosmi ‘p’unchay-p’unchay sasa kawsayniypi kawsaysiwan’ (Sal. 68:19). ¡Paymi yanapawan nanayniykunata aguantanaypaq kusisqa kawsanaypaqpas!