¿Jayk’aqmi Diospa gobiernon kamachikuyta qallarirqan? (Juj parte)

MASKHASHALLAYCHIS YACHAYTA

Julio: Anchatan kusikuni Bibliamanta rimasqanchiswan.a Ernesto, ¿Qayninpan tapuwasharqanki Diospa gobiernonmanta? Yachaytan munasharqanki imaraykus noqayku niyku 1914 watapin Diospa gobiernonqa kamachikuyta qallarirqan nispa chayta.

Ernesto: Arí, chaytan jujnin qelqaykichispi leerqani, chaypin rimasqa Diospa gobiernonqa 1914 watapi kamachikuyta qallarisqanmanta, chaymi iskayasharqani. Qankunaqa Bibliamantapunin imatapas yachachiyku ninkichismi riki.

Julio: Arí, chhaynapunin.

Ernesto: Noqaqa llapantan Bibliata leerqani, manataqmi chay watataqa mayqen versiculopipas tarinichu. Chaymi internetpi kaq Bibliapi maskharqani “1914” watata, manataqmi imapas lloqsimurqanchu.

Julio: Felicitaykin iskay ruwasqaykimanta. Ñaupaqta, Bibliata llapanta leesqaykimanta, chaypin rikukun anchata valorasqaykita.

Ernesto: Arí, noqapaqqa Bibliallan aswan allin libroqa.

Julio: Arí, chhaynapunin. Chaymantapas kusapunin tapukuyniykita Bibliapi maskhasqaykiqa. Bibliapunin kallpachawanchis yachayta maskhashanallanchispaq.b ¡May allinmi kallpachakusqaykiqa!

Ernesto: Gracias, Julio. Astawan yachayta munaspan chayta ruwani. T’aqwisqaypin leesqanchis libropi tarirqani 1914 watamanta. Chaypin rimashan juj jatunkaray sach’ata wit’usqankumanta, jujmanta wiñamusqanmantawan... Manan llapantachu yuyarini.

Julio: Arí, chayqa juj profecian, Daniel libro 4 capitulopin kashan. Babilonia rey Nabucodonosorpa mosqokusqanmantan rimashan.

Ernesto: Arí, chaymantan rimasharqan. Askha kutitan leeruni, ichaqa manan entiendenichu imaynapis chay tupan Diospa gobiernonwan 1914 watawanpas chayta.

Julio: Ama llakikuychu. Manan chay profeciata qelqaq kikin profeta Danielpas entienderqanchu.

Ernesto: ¿Cheqaqta?

Julio: Arí. Qhawariy Daniel 12:8 textopin pay nirqan: “Uyarisharqanin, ichaqa manan entienderqanichu”, nispa.

Ernesto: Wao, “noqallachá mana entiendenichu” nisharqanin. Kunanqa manañan nishutachu llakikuni.

Julio: ¿Imaraykun Daniel mana entiendenmanchu karqan? Manaraqmi yachakunan tiempochu karqan, Diosmi munarqan qhepa tiempomanña chay profecía entiendekunanta. Kunan tiempopin ichaqa profeta Danielpa qelqasqanta atinchisña entiendeyta.

Ernesto: Allinmá chayqa

Julio: Arí, qatiqnin 9 versiculopin chaymanta khaynata nin: “Kay qelqaqa tukukuy tiempokaman sellaspa waqaychasqa kanqa”, nispa. Rikusqayki jina, chay profeciaqa p’uchukay otaq tukukuy tiempokunapiñan entiendekunan karqan. Kunan imaymana pasasqanmi rikuchin chay tiempokunapiña kausashasqanchista. Chaymantan qhepaman astawan yachasun leeshasqanchis libropi.

Ernesto: ¿Yachachiwankimanchu chay profeciamanta?

Julio: Arí, yanapasaykin.

NABUCODONOSORPA MOSQOKUSQAN

Julio: Ñaupaqta rey Nabucodonosorpa mosqokusqanmanta rimasun, chaymantataq yachasun imatan significan chayta. ¿Allinchu kanman?

Ernesto: Allinmi.

Julio: Nabucodonosormi mosqokurqan juj jatunkaray cielokama chayaq sach’ata. Mosqoyninpin uyarirqan chay sach’ata kumpanankupaq Diospa angelnin kamachikusqanta. Pampapi k’ullunwan saphillanpiwanñan qheparqan. Chaymantataq “qanchis tiempo” pasaqtin chay sach’aqa jujmanta wiñamurqan.c Chay profeciaqa ñaupaqtan Nabucodonosorpi junt’akurqan. Payqa atiyniyoq reymi karqan; cielokama chayaq sach’a jinan karqan. Ichaqa wit’uspapas wijch’unkuman jinan karqan “qanchis tiempo” pasanankama. ¿Yuyarishankichu imaynapi chay junt’akusqanta?

Ernesto: Manan, manan yuyarinichu.

Julio: Biblian willashan locoman tukupusqanta, yaqachus jina qanchis wata otaq “qanchis tiempo” chhayna kasharqan. Chayraykun manaña reyñachu kapurqan. Ichaqa, chay tiempo pasaqtinmi yuyayninman kutipurqan jujmantataq rey kapurqan.d

Ernesto: Ñan entiendeshaniña. Ichaqa, ¿imapin chay tupan Diospa gobiernonwan 1914 watawanpas?

Julio: Chayta entiendenapaqqa, yachananchismi Danielpa willasqan profeciaqa iskaypi junt’akusqanta. Ñaupaqtan junt’akurqan Nabucodonosorpa kamachikuynin tatipuqtin. Iskay kaqtaq Diospa kamachikuynin tatipuqtin. Chay iskay kaqmi tupan Diospa gobiernonwan.

Ernesto: ¿Imaynapin yachanki chay profecía iskay kutipi junt’akusqanta?

Julio: Kikin profecian yanapawanchis chayta entiendenanchispaq. Daniel 4:17 texton willashan imapaqchus chay profecía willakusqanta, chaypin nin: “Chhaynapi llapa kausaqkuna ancha jatun Dioslla runakunata kamachiq kasqanta yachanankupaq, pitachus kamachikuqpaq munasqanta churaq kasqantapas yachanankupaq”, nispa. ¿Repararqankichu “runakunata kamachiqmanta” rimasqanta?

Ernesto: Arí, kaypiqa “ancha jatun Dioslla runakunata kamachiq” kasqanmantan rimashan.

Julio: Kusa. ¿Pitaq kanman “ancha jatun” kamachiqkuqri?

Ernesto: Dioschá riki.

Julio: Kusa. Chaymi rikuchin Danielpa willasqan profeciaqa mana Nabucodonosorllamantachu rimashasqanta. Aswanpas “runakunata kamachiqmantawanmi” rimashan otaq Diospa gobiernonmanta. Chay profeciata astawan t’aqwirispaqa chhaynapuni kasqantan reparanki.

Ernesto: Allinmi, chhaynaqa uyarisayki.

DANIEL LIBROQ WILLASQAN

Julio: Daniel libropin askha kutita rimashan Diospa gobiernon kamachikunanmanta, Jesucristopas rey kapunanmanta. Jujnin kaqta t’aqwirisunchis, chayqa Daniel 2:44 textopin kashan. Leeruwaqchu ama jina kaspa.

Ernesto: Ya, nishanmi: “Chay reykuna kamachikushaqtinmi janaq pacha Diosqa juj gobiernota sayarichinqa, chay gobiernoqa manan jayk’aqpas ch’usaqyachisqachu kanqa nitaqmi juj runaq makinmanchu qosqa kanqa. Chay gobiernon llapa gobiernokunata ñut’uspa chinkachipunqa, jinaspa chay gobiernollaña wiñaypaq kapunqa”, nispa.

Julio: Kusa. Imaniwaqtaq, ¿Diospa gobiernonmantachu chaypi rimashan?

Ernesto: Ah, bueno... yaqachus jina.

Julio: Chay versiculopiqa willashanmi “chay gobiernollaña wiñaypaq kananta”. ¿Mayqen runapas wiñaypaq gobiernanmanchu Dios jina?

Ernesto: Manan pi runapas.

Julio: Arí, manapunin. Diospa gobiernonmanta rimaq juj profeciatañataq qhawarisun. Chaymi kashan Daniel 7:13, 14 textopi, chaypin willashan pichus rey kapunan karqan chayta. Chay textopin nishan: “Paymi chaskirqan atiyta, jatunchayta, kamachikunanpaq atiytawan, chhaynapi llapa llaqtakuna, nacionkuna, imaymana rimayniyoq runakuna payta servinankupaq. Paypa kamachikuyninqa wiñaypaqmi kanqa, gobiernonpas manan jayk’aqpas chinkachisqachu kanqa”, nispa. Kay versiculokunapin rimashallantaq ñaupaqpi rimamusqanchismanta.

Ernesto: Arí, juj gobiernomantan rimashallantaq.

Julio: Allintan entiendeshanki. Chay gobiernoqa manan runaq gobiernon jinachu. Sichus repararqanki chayqa, “llapa llaqtakunata, nacionkunata, imaymana rimayniyoq runakunata” kamachinanmantan willashan. Arí pachantinta gobiernananmantan rimashan.

Ernesto: Manan reparasqanichu chaytaqa. Ichaqa nisqayki jinapunin, chaytan textopi nishan.

Julio: Kaytawanmi nishallantaq: “Paypa kamachikuyninqa wiñaypaqmi kanqa, gobiernonpas manan jayk’aqpas chinkachisqachu kanqa”, nispa. Kay versiculoq nisqanqa Daniel 2:44 textowan yaqa kaqllan, ¿riki?

Ernesto: Arí, yaqa kaqllapunin kashan.

Julio: Kunanqa, yuyarisun kaykama imakuna yachamusqanchista. Daniel 4 capitulopi profeciaqa willashan “ancha jatun Dioslla runakunata kamachiq” kasqanmantan. Chaymi rikuchin Nabucodonosorpa mosqokusqan profeciaqa paymanta aswan atiyniyoqpi junt’akusqanta. Chaymantapas Daniel libropiqa astawanqa Diospa gobiernon kamachikuyta qallarinanmantan rimashan, Jesucristopas rey kapunanmantawan. Tukuy chaykunan rikuchin Daniel libro 4 capitulopi profeciaqa, Diospa gobiernonmanta rimashasqanta.

Ernesto: Arí, sut’in chayqa kashan. Ichaqa manaraqmi entiendeshanichu imaynapi 1914 watawan tupasqanta.

QANCHIS TIEMPOKUNA PASAN

Julio: Chaypaq, astawan rey Nabucodonosormanta rimasun. Ñan yacharqanchisña profeciaq ñaupaqta junt’akuyninpi pay jatunkaray sach’a kasqanta. Kamachikuyninmi tatipurqan qanchis tiempo pasanankama sach’ata wit’upuqtinku. Nabucodonosormi locoman tukupurqan, chay tiempo pasaqtintaq yuyayninman kutipuspa jujmanta rey kapurqan. Profeciaq iskay kaq junt’akuynintaq karqan Diospa gobiernon tatichisqa kapuqtin, chayqa pasarqan manan ima mana allintapas Dios ruwasqanraykuchu.

Ernesto: Manan entiendeshanichu.

Julio: Pisi-pisimanta entiendesunchis, ñaupa tiempopiqa Israelpi reykunan tiyaykurqanku “Jehová Diospa trononpi”.e Chay reykunaqa Diospa rantinpin gobiernarqanku. Tiempowanmi ichaqa, yaqa llapanku chay reykunaqa Dios contra jatarirqanku, llaqta runakunapas paykuna jinan ruwallarqankutaq. Chayraykun Diosqa jinallata qhawarqan Babilonia suyu Israel llaqtata jap’ikapunanta 607 watapi manaraq Jesús jamushaqtin. Chaymantapachan Jerusalén llaqtapiqa manaña kapurqanñachu Jehová Diospa rantinpi gobiernaq reykuna. Chhaynapin Diospa gobiernonqa tatichisqa kapurqan. ¿Entiendekushanchu chaykama?

Ernesto: Arí, entiendeshaniñan.

Julio: Qanchis tiempokunaqa 607 watamantan yupayta qallarikurqan. Chay tiempomantapachan Diospa gobiernonqa manaña kamachikurqanñachu. Chay qanchis tiempokuna tukuqtinmi Diosqa juj mosoq reyta churarqan, kay kutipiqa janaq pachapi; chay reymi Diospa rantinpi kamachikunan karqan. Danielpa willasqan wakin profeciakunapas chay tiempokunapin junt’akunan karqan. Chhaynaqa, ¿jayk’aqmi chay qanchis tiempokuna tukupurqan? Chayta yachaspaqa yachallasuntaqmi jayk’aqchus Diospa gobiernon kamachikuyta qallarirqan chaytapas.

Ernesto: Yaqachus jina 1914 watapi kamachikuyta qallarirqan.

Julio: Arí Ernesto, chhaynapunin.

Ernesto: ¿Imaynapitaq chay watapi kasqantari yachasunman?

Julio: Jesús kay jallp’api kashaspan nirqan chay qanchis tiempokunaqa manaraq tukusqanta.f Chhaynaqa chay tiempokunaqa askha watakunan. Chay qanchis tiempokunaqa pachaj-pachaj watakuna Jesuspa ñaupantaraqmi qallarirqan, janaq pachaman ripusqan qhepamanpas manaraqmi tukurqanchu. Chaymantapas Danielpa profeciankunaqa “tukukuy tiempokunapiraqmi” entiendekunan karqan.g Chayman jinan, 1880 watakuna qayllata Biblia estudiaq juj t’aqa runakuna, chay profeciakunata allinta t’aqwirqanku. Pisi-pisimantan entienderqanku chay qanchis tiempokunaqa 1914 watapi tukupunanta. Chaymantapacha imakunachus pasasqanmi sut’ita rikuchin chay watapi Diospa gobiernon janaq pachapi kamachikuyta qallarisqanta, tukukuy p’unchaykuna qallarisqantapas. Manan llapantaqa ratulla entienderusunmanchu, Ernesto.

Ernesto: ¡Arí! Jujmantachá kutipanay kanqa allinta entiendenaypaqqa.

Julio: Arí. Noqapas unaypin entienderqani. Ojalachá kunan rimasqanchis yanapasunkiman karqan Jehová Diospa testigonkunaqa Bibliawanpuni Diospa gobiernonmanta yachachisqaykuta reparanaykipaq.

Ernesto: Arí. May allinmi Bibliapi anchata confiasqaykichisqa.

Julio: Qanpas munashankimá chhaynata Bibliapi confiaytaqa. Ichaqa, nisqay jina manan llapantaqa ratulla entienderuwaqchu, kashanchá tapukuyniykikuna. Ejemplopaq yachamusqanchis jina qanchis tiempokunaqa 607 watapi manaraq Jesús jamushaqtinmi qallarirqan, chaytaq Diospa gobiernonwan tupan. Ichaqa, ¿imaraykun ninchis qanchis tiempokunaqa 1914 watapin tukupurqan nispa?

Ernesto: Arí, chaytan noqapas tapukushani.

Julio: Biblian yanapawanchis chay qanchis tiempokuna jayk’a tiempotachus durasqanta yachananchispaq. ¿Munawaqchu chaymanta juj p’unchay rimananchista?h

Ernesto: Allinmi kanman. Suyasayki.