¿YACHARQANKICHU?
¿Pikunatan Biblia niq enuco nispa?
Perqapi ruwasqa eunuco runa
Eunuco nispaqa ninku castrasqa runakunatan. Ñawpa tiempopiqa millay runakunata, guerrakunapi hap’isqanku runakunatan otaq esclavokunatan castraqku. Confianapaq hina eunuco runakunataqa reypa esposankunata cuidaqpaqmi churaqku. Biblian willan Hegai, Saasgaz eunuco runakuna, Asuero reypa (Jerjes I) warminkunata cuidanankupaq churasqa kasqankumanta (Ester 2:3, 14).
Ichaqa manan castrasqa runakunallatachu eunuco niqku. Yachaq runakuna nisqan hina, ñawpa tiempopiqa reykunata serviq importante runakunatas eunuco nillaqkutaq. Biblian willan Jeremiaspa amigon Ebed-melec eunuco runamanta. Payqa ancha importante runan kanman karqan, chaychá facil-llata reyman asuykuq (Jeremías 38:7, 8, NM). Hinaspapas willanmi Etiopía suyupi reynaq tesoreron eunuco runamanta. Paytan Felipe predicarqan Dios yupaychasqanmanta kutipushaqtin (Hechos 8:27).
¿Imaraykun ñawpa tiempopi michiqkuna ovejakunata cabrakunamanta t’aqaqku?
Jesusmi Diospa juicionmanta rimashaspa nirqan: “Runaq Churinqa llapa angelninkunapiwan lliphlli-kayninpi hamuspanmi [. . .] ñawpaqenman llapa runa huñukamunqa. Chaymi paykunata t’aqanqa, imaynan michiqpas ovejakunata cabrakunamanta t’aqan hinata”, nispa (Mateo 25:31, 32). Ñawpa tiempopin chay hina costumbre karqan. Michiqkunan ovejakunata cabrakunamanta t’aqaqku. ¿Imaraykun chayta ruwaqku?
P’unchaytaqa ovejata cabratawan kuskan michiqku, tutatataq kanchaman apayapuqku, salqa animalkunamanta, suwakunamanta, chirimanta cuidanankupaq (Génesis 30:32, 33; 31:38-40). Michiqkunaqa huk kanchamanmi ovejakunata t’aqaqku, astawanqa china ovejakunata uñakunatapas cabrakuna mana maqananpaq. Huk libroq nisqan hina, t’aqallaqkutaqmi “lechenta ch’awanankupaq, millmanta rutunankupaq, cruzachinankupaq ima” (“Bibliaq tiemponpi costumbrekuna”, inglés simipi). Jesuspa tiemponpiqa yaqa llapa judiokunan campopi tiyaqku, chaymi payqa oveja michiqmanta rikch’anachiywan yachachirqan.