¿Imaraykun runakuna Diosmanta mañakunku?
“Qolqepaq pukllaspan Diosmanta mañakuq kani gananaypaq. Ichaqa manan hayk’aqpas ganarqanichu” (Samuel,a Kenia)
“Escuelapi kashaqtiymi rezayllata yachachiwarqanku, chaytan umallaykumanta rimaq kayku” (Teresa, Filipinas)
“Sasachakuypi tarikuspan Diosmanta mañakuqpuni kani. Chaymantapas mañakuqmi kani huchayta perdonawananpaq allin cristiana kanaypaqpas” (Magdalene, Ghana)
Samuel, Teresa, Magdalene hinan askha runakuna Diosmanta mañakunku. Wakinmi tukuy sonqowan mañakun wakintaq hawa sonqolla. Hinaspapas wakin runakunan Diosmanta mañakunku allin examenta qonankupaq, equiponku ganananpaq, familianku allinlla kananpaq otaq imaraykupas. Chaymi rikuchin millonninpi runakuna Diosmanta mañakuy munasqankuta. Huk encuesta ruwakusqanpin yachakurqan mana religionniyoq runakunapas Diosmanta mañakusqankuta.
Qanri, ¿mañakunkichu Diosmanta? ¿Imatan mañakunki? Mañakunkiña manaña chaypas, yaqapaschá tapukunki: “¿Allinchu Diosmanta mañakusqay? ¿Pillapas uyariwanmanchu?”, nispa. Librokunata qelqaq runan nin: ‘[Mañakuyqa] llakikuyta qonqanapaqmi’, nispa. Wakin doctorkunapas ninkun: “Mañakuspan llakikuyninchista pisiyachinchis”, nispa. ¿Chhaynatachu qanpas ninki? ¿Llakikuyninchista pisiyachinallanpaqchu Diosmanta mañakusunman?
Ichaqa Bibliaq nisqan hina, Diosmanta mañakuyqa manan llakikuyninchista pisiyachinallapaqchu. Willanmi allin kaqllata, paypa munayninman hina mañakuqtinchis Dios uyariwananchista. ¿Cheqaqchu chay kanman? Qatimuqpi chaymanta yachasunchis.
a Sutinkuqa cambiasqan kashan.