Wañupuqkunan kausarimpunqaku

¿Yuyashankichu Gailta? Paymantan rimaranchis kay revistapi tawa paginapi. Gailqa manan yachanchu jayk’aqchus qosan wañukapusqanta qonqananta. Ichaqa anchatan munan jujmanta qosanwan tupayta Diospa prometesqanman jina, paymi nin: “Apocalipsis 21:3, 4 texton anchata gustawan chaypin nin: ‘Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñaupaqkaqkunaqa manaña kapusqanrayku’”, nispa.

Gailmi nillantaq: “Kay promesaqa sut’itan willashan. Anchatan khuyapayani wañuqniyoq runakunata, paykunaqa manan yachankuchu kausarimpuy kananta”, nispa. Gailqa chay promesapin creen, ¿imarayku chayta ninchis? Payqa tukuy tiemponwan vecinonkunaman “manan wañuypas kanqañachu” nispa predicasqanrayku.

Yaqapaschá qanpaqqa mosqoy jinalla. Ichaqa piensay Job onqosqa kashaspa nisqanpi (Job 2:7). Sinchi llakipi tarikuspan wañuytaraq munaran, chaywanpas confiaranmi wañupusqanmanta Dios kay allpa pachapi kausarichimpunanta. Chaymi niran: “Wañuypachapi pakaykuwankiman chayqa, [...] wajamuwaqtiykiqa kutichimusaykin, kamasqayki runamanta sonqoykita ‘ch’allaq’ nirichinki”, nispa (Job 14:13, 15). Chaypin kayta yachanchis: Jobqa manan iskayaranchu Dios payta kausarichimpunanpi.

Diosqa kausarichinqapunin Jobta jinallataq millonninpi runakunatapas, kay pacha paraíso kapuqtin (Lucas 23:42, 43;Traducción del Nuevo Mundo [NM]). Biblia prometen “Dios [wañupuqkunata] kausarichimpunanta” (Hechos 24:15). Jesuspas nillarantaqmi: “Ama kay nisqaywanqa musphaychischu, aya p’ampanakunapi lliu kaqkunaq Runaq Churinpa kunkanta uyarinanku tiempon chayamunqa”, nispa (Juan 5:28, 29). Jobqa rikunqa chay promesa junt’akuqta, chaypin “aychanqa qholla wawaq jinaraq kanqa, waynaq jinaraq cuerponpas kapunqa” (Job 33:24, 25). Chay jinallataqmi pasanqa pikunachus Diospa kay promesanpi creenku paykunawanpas.

Sichus pillapas familiaykimanta wañupuran chayqa, kaypi yachasqanchisqa manan llakikuyniykita tukuchinqachu. Ichaqa Diospa promesanpi piensaymi yanapasunkiman wañupuqniyki kausarimpunanta suyakunaykipaq, jinaspa thaj kausanaykipaq (1 Tesalonicenses 4:13).

¿Munawaqchu yachayta imakunatawanmi ruwawaq wañuqniykimanta ama nishuta llakikunaykipaq? Otaq tapukurankichu, ¿imaraykun Dios jinallata qhawan sufrimientota millay kausaytapas? Chaykunata yachanaykipaq jaykuy internetman www.pr2711.com nisqaman, chaypin tarinki Bibliaq yachachisqanta sumaq consejokunatapas.