Diosta allinta reqsiy

Wayna-sipasman tukupunanchis tiempo

LLIWMI yuyaqña kapuspaqa mana allinchu sientekunchis, chay tiempopin kallpanchis pisiyapun, uyanchis ch’awiyapun, ninrinchis upayapun, ñawinchis rasphiyapun huk nanaykunapas hamun. ¿Qanpas yuyaqñachu kashanki? Chhaynaqa, wayna-sipas kasqaykita yuyarispaqa tapukurqankichá: “¿Imanaqtintaq machuyapuni, payayapuni? ¿Chay hinapaqchu Dios ruwawarqanchis?” nispa. Diosqa manan munarqanchu yuyaqman tukunanchista. Payqa anchatan munakuwanchis, chayraykun machu-payayayta wiñaypaq chinkachipunqa. Qhawarisunchis Job 33:24, 25 textopi willasqanta.

Ñawpa tiempomanta Job sutiyoq runan Diospaq hunt’aq sonqo karqan, anchatataqmi Diosqa munakurqan. Satanasmi Diospa ñawpaqenpi tumparqan, nirqanmi: “Jobqa imachus chaskinanraykullan servishasunki”, nispa. Diosqa allintan yacharqan Job hunt’aq sonqo kananta, hinallataq ima dañotaña pasaqtinpas allichapunanta. Chayraykun Jehová Diosqa hinallata qhawarqan Saqra pruebaman Jobta churananta. Satanasmi “aycha qaranta sarnaman rikch’akuq millay onqoywan tukurqachirqan, uma mukukunmanta chaki puntankama” (Job 2:7). Kurukunan cuerponta suksurqan, aycha qaranpi k’irikunapas lleq-niripurqanmi yanayaspataq t’akarikapurqan (Job 7:5; 30:17, 30). ¡Jobqa anchatan ñak’arirqan! Chaywanpas hunt’aq sonqon karqan. Pay kikinmi nirqan: “Kawsanaykamaqa hunt’aqllapunin Diospaqqa kasaq”, nispa (Job 27:5, NM).

Wañupunanta yuyaykuspan Jobqa, payllapi hinallataq imayna qhawarisqa kasqanpi nishuta piensaspa, ‘mana huchayoqman tukuspa Diosta huchachasqa’ (Job 32:2). Jehová Diosqa Eliuwanmi anyachirqan ichaqa willachirqanmi kacharisqa kananpaq ‘pago’ kasqanrayku ‘wañuymanta qespichisqa’ kananta. Hinaspapas nirqanmi ‘aychan qholla wawaq hinaraq kananpaq, waynaq hinaraq cuerponpas kapunanpaq’ (Job 33:24, 25). Jobtaqa anchatachá kallpacharqan wañuymanta salvasqa kayta yachasqanqa. Hinaspapas, huchanmanta kutirikuspa ‘pagota’ otaq sacrificiota haywaqtinqa Diosqa chaskinmanmi karqan, chhaynapitaq ñak’ariyninta tukuchinman.a

Jobqa huch’uyaykukuqmi karqan, chayraykun Diospa anyasqanta uyarikuspa huchanmanta kutirikurqan (Job 42:6). Jehová Diosqa sacrificio haywasqantan chaskirqan huchanta pampachananpaq chhaynapi yapamanta Paywan allinpi kananpaq. Chaymantan Dios “Jobtaqa ñawpaqmanta aswantaraq saminchapurqan” (Job 42:12-17). ¿Imaynatan chayta ruwarqan? Chay millay onqoyninmantan qhaliyachipurqan ‘waynaq hinaraqmi cuerponpas kapurqan’. ¡Ima munaymá chayqa!

Chay sacrificio haywasqanwan pampachasqaña Job karqan chaypas, qhepamanqa wañupurqanmi Adanpa miraynin kasqanrayku. Ñoqanchispaqmi ichaqa huchanchismanta pampachasqa kanapaq huk ancha allin pago kapuwanchis chaywanqa llapanchismi pampachasqa kasunman. Chayqa Jesuspa kawsaynin qosqanmi, chayqa Jehová Diospa munayninpin ruwakurqan (Mateo 20:28; Juan 3:16). Jesuspa sacrificionpi iñiqkunaqa wiñay-wiñaypaqmi paraisopi kawsanqaku mana machu-payayaspa. Chhaynaqa, ¿imatan ruwanayki ‘aychayki qholla wawaq hinaraq kananpaq’? Chaypaqqa Bibliatan estudianayki.

[Uranpi willakuy]