Willasqata uyarikuyqa wañuymantan salvawasunman

SIMEULUE islapin terremoto pasaran 26 diciembre 2004 watapi, chayqa tarikun Sumatraq wichay ladonpin (Indonesia). Lamar-qochaq ladonpi kaqkunaqa qochapas ch’akirapushanman jinatan rikuranku. Chayta rikuspan runakunaqa “Smong! Smong!” nispa orqoman ayqekuranku, chhaynataqa ninku lamar-qocha lloqsimunanpaqmi. Media hora qhepallamanmi qochaqa lloqsimuran, yaqa llapa wasikunatan thunirapuran.

Chhaynata qochaq lloqsimusqanwanqa Simeulue islan ñaupaqtaqa afectasqa karan. Chaypiqa 78.000 runakunan tiyaqku, ichaqa qanchis runakunallan wañuranku.a Chay islapi tiyaqkunaqa ninkun: “Temblorchus kan, lamar-qochataqchus ch’akipuq jina kan chayqa, orqoman ayqekuy, unuqa sinchi kallpawanmi kutimunqa”, nispa. Chay islapi tiyaqkunaqa ñaupa abuelonkumantaraqmi yacharanku lamar-qocha ch’akiq jina kaqtinqa kallpawan kutimunanta. Chay señalta reparaspa orqoman ayqekusqankuraykun salvakuranku, chayraykun pisi runakunalla wañuranku.

Biblian willawanchis manchakunapaq p’unchay qayllaykamushasqanta, ninmi: “Manchay ñak’ariymi kanqa, chay jinaqa manan jayk’aqpas kay pacha qallariymantapacha kunankama karanchu, manataqmi kanqapaschu”, nispa (Mateo 24:21). Runakunaña mana allinta kamachinakushanku chaypas, manan chaywanchu kay allpa pachaqa chinkapunqa, kay pachaqa wiñaypaqmi kanqa, chaymi Diospa munaynin (Eclesiastés 1:4). Aswanpas Diosqa ‘kay pacha waqllichiqkunatan wañuchinqa’. Chaywanmi chinkachinqa mana allin ruwaykunata tukuy sufrimientotapas (Apocalipsis 11:18; Proverbios 2:22). Ancha kusikunapaqmi chayqa.

Ima desgraciapas kaqtinqa lliu runan wañun, chay manchakunapaq p’unchaypin ichaqa mana chhaynachu kanqa. Biblian nin: “Diosqa munakuymi”, nispa, paymi prometewanchis: “Chanin runakunaqa kay allpatan jap’ikapunqaku, chaypin wiñaypaq tiyanqaku”, nispa (1 Juan 4:8; Salmo 37:29). ¿Imatan ruwanayki manchay ñak’ariy p’unchaypi mana wañuchisqa kanaykipaq, Diospa prometesqan pachapi tiyanaykipaqpas? Bibliaq willasqantan kasukunayki.

¿QOCHACHU QONQAYLLA CHA’KIQ JINA KASHAN?

Kay pachapi millay ruwaykuna ima p’unchaypichus tukupunantaqa manan yachanchischu, Jesusmi niran: “Chay p’unchayta chay horatawanmi ichaqa mana pipas yachanchu, manallataq janaq pachapi kaq angelkunapas, Churipas, aswanpas Yayallan yachan”, nispa. Chaywanpas Jesusqa kallpachawaranchismi makilla kashananchispaq (Mateo 24:36; 25:13). ¿Imamantan makilla kashananchis? Bibliaqa willawanchismi imakunachus pasanan karan Dios manaraq millay kausayta tukuchishaqtin chayta. Simeulue islapi tiyaqkunaqa lamar-qochata ch’akiqta jina rikuspan repararanku juj desgracia kananta, kay pachapi millay kausay chinkapunanpaq cercallaña kasqantapas imapas qonqaylla cambiasqanmi reparachiwasun. ¿Ima cambiokunan chaykuna? Recuadropin chayta willashan.

Recuadropi willasqanqa ñaupa tiempopin sucederanña, ichaqa manan llapanchu juj tiempollapi sucederan, Jesusmi ichaqa niran “tukuy chaykunata” rikuspaqa tukukuy p’unchay cercallapiña kasqanta reparananchista (Mateo 24:33). Kaykunatan tapukusunman: Jesuspa nisqankuna, 1) ¿jayk’aqllapas pachantinpi sucederanchu?, 2) ¿jayk’aqllapas llapan sucederanchu kaq tiempollapi?, 3) ¿jayk’aqllapas nishupuni karanchu chhayna mana allinkuna? Jesuspa nisqan chay tukukuy p’unchaypipunin kausashanchis.

DIOS MUNAKUYNINTA RIKUCHIWANCHIS

Estados Unidosmanta expresidenten niran: “Ima desgraciamantapas ñaupaqta willayqa runakunaq vidantan salvan”, nispa. 2004 watapi lamar-qochaq lloqsimusqan qhepamanqa tukuy llaqtakunapin alarmakunata churaranku, chhaynapi jujpiqa ama askha runa wañunanpaq. Diospas manaraq kay millay pachaq tukupuynin chayamushaqtinmi willawashanchis. Kaytan prometewanchis: “Qhapaqsuyumanta allin willakuykunan kay pachantinpi willasqa kanqa, llapa suyukunaq yachananpaq, jinaqtinmi p’uchukayqa chayamunqa”, nispa (Mateo 24:14).

Jehová Diospa testigonkunaqa qayna watan predicaranku 1.900 millones más horakunata, 240 nacionkunapi, 700 más simikunapi. Chhaynata predicakusqanqa sut’itapunin reparachiwanchis kay millay pachata Dios chinkachinanpaq pisillaña faltasqanta. Jehová Diospa testigonkunaqa runamasinkuta munakusqankuraykun willashanku Diospa phiñakuynin p’unchay chayamunanpaq pisillaña faltasqanta (Mateo 22:39). Kayta leesqaykiqa sut’itan rikuchin Dios anchata munakusqasuykita. Diosqa ‘manan pitapas chinkananta munanchu’, aswanpas ‘juchata saqespa payman llapa kutirikunankutan munan’ (2 Pedro 3:9). ¿Kasukunkichu Diospa advertiwasqanchista?

¡VIDAYKITA SALVAY!

Simeulue islapi tiyaqkunaqa lamar-qochata ch’akiqta jina rikuspan orqoman ayqekuranku, manan jinachu karanku. Paykunaqa manan wañuyta munarankuchu. Chhaynatan qanpas ruwanayki, vidaykita salvanaykipaqqa juj orqomanmi seqanayki kanqa. Profeta Isaiasmi Diospa yuyaychasqan kay invitacionta ruwawanchis: “Jakuchis, Señor Diospa orqonman wichasun [...]. Paymi ñanninkunata yachachiwasun, chay ñanninkunatataq purisunchis”, nispa (Isaías 2:2, 3).

Orqo patapiqa seguron sientekunki, ima pasasqantapas aswan allintan reparanki. Chhaynatan Bibliapi tarikuq Diospa yachachikuyninkunapas millonninpi runakunata yanapashan aswan allinta kausanankupaq (2 Timoteo 3:16, 17). Chhaynapin Diospa ‘ñanninta purishanku’, reparankutaqmi Diospa cuidasqan yanapasqan kasqankuta.

¿Kasukunkichu Diospa invitación ruwawasqanchista, kay tukukuy p’unchaypi cuidawananchispaq prometewasqanchistapas? Bibliaqa sut’itan reparachiwanchis ‘tukukuy qaylla p’unchaykunapi’ tiyasqanchista, allinta estudiay chaymanta rimaq recuadrota (2 Timoteo 3:1). Tiyasqaykiq qayllanpi kaq Jehová Diospa testigonkunan yanapasunkiku chaykunata allinta entiendenaykipaq Bibliaq nisqanman jina kausanaykipaqpas. Yaqapaschá yachayta munawaq tapukusqaykikunata Bibliaq kutichisqanta, chaypaq jaykuy www.pr2711.com nisqaman. Maskhay ENSEÑANZAS BÍBLICAS > PREGUNTAS SOBRE LA BIBLIA nisqata.