¿Imapi creesqaykita comparawaqchu Bibliawan?

¿CREENKICHU Jesucristopi? Chhayna kaqtinqa, manan qanllachu creenki, mundontinpiqa iskay waranqa millón más runakunan Cristopi creenku. Religionkunapas waranqanpin kashan, cristiano nispataq sutichakunku. Ichaqa sapankapas jujniraytan piensanku yachachinkupas. Yaqapaschá creesqaykiqa mana kaqllachu “cristianon kayku” niqkunaq creesqanwan. ¿Creesqayki Bibliaq nisqanman jinapunichu kashan? Sichus cristianokunapaq Bibliaq yachachisqanman jina kausayta munanki chayqa, creesqaykikunatan Bibliawan comparanayki.

Jesuspa discipulonkunatan cristiano nispa sutichakuran (Hechos 11:26). Cristianokunaqa juj grupollataq karanku chayqa, manan necesitakuranchu juj sutikunawan reqsinankuta. Cristianokunaqa juj sonqollan kasukuqku Jesuspa yachachisqanta kamachisqantapas, paymi cristiano grupota qallarichiran. Iglesiaykipiri, ¿Cristoq yachachisqanman jinachu, discipulonkunaq creesqanman jinachu yachachinku? ¿Imaynapin seguro kawaq? Chaytaqa iglesiaykipi yachachisqankuta Bibliaq nisqanwan comparaspallan yachawaq.

Kaypi piensay: Jesucristoqa anchatapunin respetaran Diospa palabranta. Payqa manan allinpaqchu qhawariran costumbrenkurayku Bibliaq yachachisqanta pisichaqkunata (Marcos 7:9-13). Jesuspa cheqaq discipulonkunaqa Bibliaq nisqanman jinapunin creeranku. Chaymi Cristota serviy munaqkunaqa tapukunanku: “¿Religionniypi yachachisqanku Bibliaq nisqanman jinachu kashan?”, nispa. Chayta yachanaykipaqqa comparay iglesiaykipi yachachisqankuta Bibliaq yachachisqanwan.

Jesusmi niran: “Diosta adorayninchisqa cheqaq yachachikuypi teqsichasqa kanan”, nispa (Juan 4:24; 17:17). Apóstol Pablopas niranmi salvakuyta munaspaqa ‘cheqaq-kayta reqsinanchis’ kasqanta (1 Timoteo 2:4). Chayraykun creencianchiskunaqa Bibliaq nisqanman jina kanan. Salvacionninchisqa chaymantan dependenqa.

¿IMAYNATAN CREENCIANCHISTA BIBLIAWAN COMPARASUNMAN?

Animaykikun recuadropi kaq soqta tapuykunata leenaykipaq, jinallataq sapanka tapuyman Bibliaq kutichiynintapas. Bibliamanta copiasqa kaqta leey, Bibliaq imaynata kutichisqanpipas piensay. Chaymantataq kayta tapukuy: “¿Religionniypa yachachisqan tupashanchu Bibliaq yachachisqanwan?”, nispa.

Chay soqta tapuykunaman kutichisqaykita Bibliawan comparasqaykin anchata yanapasunkiman vidaykipi. ¿Munawaqchu iglesiaykipi juj yachachikuykunatapas Bibliawan comparayta? Jehová Diospa testigonkunan yanapasunkiman astawanraq Bibliata entiendenaykipaq. Mañakuwaqmi gratislla Bibliamanta yachachinasuykipaq otaq jaykuwaq internetman, www.pr2711.com/quz nisqa direccionman.

1 TAPUY: ¿Pitaq Diosri?

KUTICHIYNIN: Jehová, Jesuspa papan, payqa wiñaypaq Diosmi, tukuy atiyniyoq kamaq.

¿IMA NINMI BIBLIA?

“Qankunapaq mañakuspaykuqa Señornichis Jesucristoq Yayan Diosmanmi graciasta qollaykupuni” (Colosenses 1:3).

“Qanqa Señor Diosniyku, jatunchaytapas, yupaychaytapas, atiytapas chaskinaykipaq jinapunin kanki, tukuy imaymanata qan kamasqaykirayku” (Apocalipsis 4:11).

Qhawallaytaq Romanos 10:13; 1 Timoteo 1:17 textokunatapas.

2 TAPUY: ¿Pitaq Jesucristori?

KUTICHIYNIN: Diospa primer wawanmi. Kamasqataq karan chayqa karanmi qallariynin. Payqa papantan kasukun.

¿IMA NINMI BIBLIA?

“Yayaqa noqamanta aswan kurajmi” (Juan 14:28).

“Cristoqa mana rikuna Diospa rijch’ayninmi, payqa karanñan manaraq imapas kamasqa kashaqtin, chaymi payqa qollana” (Colosenses 1:15).

Qhawallaytaq Mateo 26:39; 1 Corintios 15:28 textokunatapas.

3 TAPUY: ¿Imataq santo espirituri?

KUTICHIYNIN: Santo espirituqa manan juj dioschu, aswanpas Diospa kallpanmi chaytan utilizan munayninta ruwananpaq. Runakunapas chaskinkunmanmi santo espiritutaqa, chaywan atiyniyoq kanankupaq.

¿IMA NINMI BIBLIA?

“Elisabet uyariqtin jinataq, wijsanpi wawaqa “wat’aj” niran. Jinan santo espirituqa Elisabetman junt’aykuran” (Lucas 1:41).

“Qankunaman santo espíritu jamuqtinmi ichaqa atiyta chaskinkichis” (Hechos 1:8).

Qhawallaytaq Génesis 1:2; Hechos 2:1-4; 10:38 textokunatapas.

4 TAPUY: ¿Imataq Diospa reinonri?

KUTICHIYNIN: Diospa reinonqa juj gobiernon janaq pachapi, chaypi reytaq Jesús. Pisi tiempomantan chay gobiernoqa Diospa munayninta ruwanqa kay allpapi.

¿IMA NINMI BIBLIA?

“Qanchiskaq angelmi trompetanta tocaran, jinan janaq pachapi kunkayoq rimasqakuna uyarikuran: Kay pachapi kamachikuq-kaymi Señorninchispaña Cristonpaña kapun, paymi wiñay-wiñaypaq kamachikunqa, nishaq” (Apocalipsis 11:15).

Qhawallaytaq Daniel 2:44; Mateo 6:9, 10 textokunatapas.

5 TAPUY: ¿Llapan allin runachu janaq pachaman rinqaku?

KUTICHIYNIN: Manan. Diosmi ajllaran pay sonqo “pisi t’aqa” runakunata, yupasqallataqmi kanku janaq pachaman rinankupaq. Paykunaqa Jesucristowan kuskan janaq pachamanta kamachikamunqaku.

¿IMA NINMI BIBLIA?

“Pisi t’aqa oveja jinallaña kashaspapas, ama manchakuychischu, Yayaykichismi qhapaqsuyunta qosunkichis” (Lucas 12:32).

“Cristoq sacerdotenkunan kanqaku, Cristowantaqmi waranqa watata kamachikunqaku” (Apocalipsis 20:6).

Qhawallaytaq Apocalipsis 14:1, 3 textotapas.

6 TAPUY: ¿Imatan Dios munan kay allpapi runakunapaq?

KUTICHIYNIN: Diospa gobiernonpiqa kay allpan paraisoman tukunqa, chaypin kasukuq runakunaqa tiyanqaku mana onqospa, thajpi, wiñaypaqtaq kausanqaku.

¿IMA NINMI BIBLIA?

“Llamp’u sonqokunan ichaqa kay allpata chaskinqaku, sumaq thaj-nisqataq tiyakunqaku” (Salmo 37:10, 11).

“Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñaupaqkaqkunaqa manaña kapusqanrayku” (Apocalipsis 21:3, 4).

Qhawallaytaq Salmo 37:29; 2 Pedro 3:13 textokunatapas.