QALLARIYPI KAQ | ¿IMA NIMMI BIBLIA ANGELKUNAMANTA?
¿Imaynatan angelkuna yanapasunkiman?
Dios sonqo angelkunaqa anchatan runakunapi interesakunku, kallpachakushankutaq Diospa munayninta ruwanankupaq. Dios kay pachata kamaqtinqa angelkunan ‘ima sumaqta takisharanku’, jinallataq ‘kusisqa q’ochukusharanku’ (Job 38:4, 7). Tiempoq pasasqanman jinan angelkunaqa entiendeyta munaranku qhepaman kay pachapi imakuna sucedenanmanta (1 Pedro 1:11, 12).
Biblian willan angelkunaqa Diospa munayninta junt’anankupaq mayninpiqa serviqninkunata pakaykusqankuta (Salmos 34:7). Ejemplopaq:
Sodoma, Gomorra sinchi millay llaqtakunata Jehová ch’usaqyachiqtinqa angelkunan Lot-ta familiantawan yanaparanku ayqenankupaq (Génesis 19:1, 15-26).
Babilonia nacionpin kinsantin hebreo waynakuna juj jatun hornopi wañunankupaq juchachasqa karanku. Chaymi Dios “angelninta kachamuran, jinaspan payman jap’ipaykukuq kamachinkunata qespichiran” (Daniel 3:19-28).
Danielpas juj tuta leonkunaq kasqan t’oqoman wijch’uykusqa kaspan mana ima dañotapas sufriranchu. Paymi niran: “Diosniymi angelninta kachamuwan, paymi leonkunaq siminta wisq’aykuran”, nispa (Daniel 6:16, 22).
Unay tiempomantañan angelkunaqa Diosta serviq runakunata yanaparanku
ÑAUPA IÑIQ T’AQATA YANAPARANKU
Diospa munaynin junt’akunanpaq necesario kaqtinqa, angelkunan yanaparanku qallariy siglopi iñiq t’aqata. Ejemplopaq:
Juj angelmi cárcel punkuta kicharispa apostolkunata libraran, chaymantataq niran templopi predicashanallankupaq (Hechos 5:17-21).
Juj angelmi predicaq Felipeta kamachiran Jerusalenmanta Gaza llaqtaman jaykuq ñanninta rinanpaq, jinaspa chaypi Etiopía llaqtayoq runata predicananpaq, chay runaqa Jerusalentan risqa Diosta adoraq (Hechos 8:26-33).
Waj llaqtayoq runakuna judioman tukupunankupaq Dios decidiqtinmi juj ángel Romapi oficial Cornelioman mosqoyninpi rijuriran. Chaypin willaran apóstol Pedrota wasinman invitananpaq (Hechos 10:3-5).
Apóstol Pedro carcelman apasqa kaqtinmi, juj ángel payman rijurispa libraran (Hechos 12:1-11).
¿IMAYNATAN ANGELKUNA YANAPASUNKIMAN?
Manan kanchu prueba ñaupa tiempopi jina kunanpas Dios runakunata yanapananpaq angelkunata utilizasqanmanta. Ichaqa Jesusmi niran kay tiemponchismanta: “Diospa gobiernonmanta allin willakuykunan pachantinpi willasqa kanqa llapa nacionkuna yachananpaq, jinan tukukuyqa chayamunqa”, nispa (Mateo 24:14). ¿Yacharankichu kay llank’ayta angelkuna qhawarishasqanta?
Angelkunaqa yanapakushanku allin willakuykuna pachantinpi aparikunanpaq
Apocalipsis libron willaran angelkuna llank’anankumanta. ¿Imapi? Pachantinpi runakuna Jehová Diosmanta, jinallataq tukuy ruwananmantawan yachanankupaq. Apóstol Juan qelqaran: “Chayllamanmi rikuruni juj angelta altonta volashaqta, paymi wiñaypaq allin willakuykunata willanan kasqa allpa pachapi llapa tiyaqkunaman, llapa nacionkunaman, ayllukunaman, rimaykunaman, llaqtakunamanwan. Paymi fuerteta nishasqa: ‘Diosta manchakuychis, payta jatunchaychis, juzganan horan chayaramunña, chayrayku payta adoraychis, paymi cielota, allpa pachata, lamar-qochata, pujukunatawan kamaqqa’”, nispa (Apocalipsis 14:6, 7). Askha experienciakunan rikuchin angelkuna pachantinpi predicacionpi yanapakushasqankuta. Jinaspapas juj juchallikuq runa pesapakuspa kutimpuqtinqa, anchatan angelkunaqa kusikunku (Lucas 15:10).
¿Iman sucedenqa predicación llank’ay tukuqtin? “Janaq pacha ejercitokuna” reykunaq reynin Jesuscristowan kuska maqanakunqaku “Diospa jatun p’unchaynin” “Armagedón” guerrapi (Apocalipsis 16:14-16; 19:14-16). Atiyniyoq angelkunan Diospa juicionta apanqaku “Diosta mana reqsiqkunamanta, paymanta allin willakuykunata mana kasukuy munaqkunamantawan” Jesucristo vengakuqtin (2 Tesalonicenses 1:7, 8).
Chayrayku ama iskayaychu angelkuna qanpi interesakusqanmanta. Paykunaqa munankun Dios serviy munaq runakunaq allinninta. Rikusqanchis jina, Jehová Diosmi angelninkunawan ñaupa tiempopi serviqninkunata kallpacharan pakaykuran ima (Hebreos 1:14).
Chaymi sapankanchis decidikunanchis kanqa: ¿uyarikusunchu pachantinpi allin noticiakuna willakusqanta? Jehová Diospa testigonkunaqa gustowanmi yanapasunkiku Diospa atiyniyoq angelninkunaq yanapayninmanta beneficiakunaykipaq.