3 Problemata aguantanapaq yanapay

Wakin problemakunaqa manan allichakuyta atikunchu nitaq imatapas ruwayta atisunmanchu chayta jark’anapaq. Ejemplopaq, yaqapaschá pi familiaykipas wañupuran otaq mana jampiy atikuq onqoywan kashanki. Chhayna kaqtinqa, aguantanallaykin chay problemakunata. ¿Yanapawasunmanchu Biblia chay problemanchiskunapi?

MANA JAMPIY ATIKUQ ONQOY

Rosa nin: “Onqoyniywanmi sapa kutillan nishu nanaypi tarikuni. Vidayqa manañan normalchu”, nispa. Astawanqa llakikuq Bibliata estudiaspa mana concentrakuyta atisqanmantan. Ichaqa allintan kallpacharan Mateo 19:26, chaypin nin: “Diospaqmi ichaqa tukuy imapas atikuqlla”, nispa. Chaymantan Rosaqa yacharuran juj formakunamanta estudiayta. Mayninpiqa manapunin atiqchu estudiayta sinchi nanaywan, chaymi Bibliamanta, jinallataq Bibliamanta willaq qelqakunamanta grabacionkuna uyariyta qallariran.a Paymi nin: “Sichus mana chay grabacionkunata uyariyta atiymanchu karan chayqa, manan iñiyniypi allinchu kayman karan”, nispa.

Maypachachus Rosa llakisqa sientekun manaña ñaupaqpi jinachu ruwasqanmanta chayqa, 2 Corintios 8:12 textoq nisqantan yuyarin. Chaypin nin: “Imapas tukuy sonqowan qosqataqa allinpaqmi Diosqa qhawarin, payqa pipas atisqanman jina qonantan munan, manan mana atinanta qonantachu”, nispa. Chay simikunan Rosaman yuyarichin Diosqa ruwasqanwan kusisqa kashasqanta. Payqa atisqanman jinallan tukuy atisqanta ruwan.

FAMILIANCHIS WAÑUPUQTIN

Dianan yuyarin: “18 watallayoq ususiy wañupusqanmi noqapaq sinchi sonqo nanay karan. Manaña kausayta atinaypaqmi piensarani, manañan imapas igualchu kanman”, nispa. Dianataqa Salmos 94:19 texton kallpacharan, chaypin salmista takiran: “Sonqoyta llakikuna ñit’iykushaqtinmi, qanqa sonqochaykuwanki kusirichiwanki”, nispa. Diana nillantaq: “Jehová Diostan valekurani juj llank’ayta qowananpaq, chhaynapi nanayniyta pisiyachinaypaq”, nispa.

Dianaqa kusikuytan tariran runakunata yanapaspa. Tiempowanmi pay kikinta comparakuran wawakunaq utilizasqanku crayolawan. Crayolaqa p’aki p’akiña kashaspapas pintashallanmi, chay jinan paypas llakikuypiña tarikushaspapas juj runakunata yanapayta atiq. Paymi nin: “Repararanin Bibliamanta yachachikuykunawan runakunata consolaqtiy, Jehová Dios chaykunawan consolawashasqanta”, nispa. Juj listatan ruwaran llakikuykunapi tarikuq Bibliaq willasqan runakunamanta. ¿Imatan tariran? Llapankupas Diosmanta mañakuq kasqankuta. Chaymantapas pay kikinmi niran: “Sichus mana Bibliata kicharinkichu chayqa, manan respuestata tarinkichu”, nispa.

Ichaqa Biblian Dianataqa yachachillarantaq jamuq tiempopi concentrakunanpaq, amataq pasasqanpichu. Anchatan kallpachan Hechos 24:15 textopi suyakuy, nin: ‘Allin runakunatapas mana allin runakunatapas wañusqa kasqankumanta [Dios] kausarichimpunqa’, nispa. ¿Creenchu Diana Jehová Dios wawanta kausarichimpunanpi? Pay kikinmi nin: “Manan pisillatapas iskayanichu ususiywan tupanaymantaqa. Paywanmi Jehová Diospa señalasqan p’unchaypi tupasaqku. Ususiytaqa sut’itapunin umaypi rikushani jardinniykupi kuska kashasqaykuta, imaynan nacesqan p’unchay rikurani jina”, nispa.

a Chay grabacionkunaqa internetpin kashan jw.org nisqa direccionpi.

Bibliaqa consolawasunmanmi sinchi llakipi tarikushaqtinchispas

¿IMAYNATAN DIOS YANAPAWASUNMAN?

Bibliaqa sut’itan willan: “Señor Diosqa llapa wajakuqninkunaq sispallanpin kashan, jayk’an cheqaq sonqowan wajakuqninkunaq qayllallanpin kashan. Manchakuqninkunaq munasqantan junt’an, wajakusqankutan uyarin, paykunatan qespichin”, nispa (Salmos 145:18, 19). ¡Chay simikunaqa sonqonchismanmi chayan! Ichaqa, ¿imaynatan Dios kutichiwanchis wajakuqtinchis?

KALLPATA QOWANCHIS

Problemakuna kasqanraykun kallpa wañuy sientekusunman, llakikusunman, jinallataq iñiyninchispipas pisikallpayasunman (Proverbios 24:10). Ichaqa Jehová Diosqa “sayk’usqatan kallpachan, pisipaqtapas wajmantan kallpachan” (Isaías 40:29). Apóstol Pabloqa imaymana pruebakunatan aguantaran, paymi niran: “Tukuy imapaqmi kallpa qowaqniyqa kallpata qowan”, nispa (Filipenses 4:13). Diosqa santo espiritunwanmi Pablota kallpacharan, chhaynatan qantapas kallpachasunkiman (Lucas 11:13).

YACHAYTA QOWANCHIS

¿Imatan ruwawaq Bibliapi juj consejota entiendenaykipaq chayman jina ruwanaykipaqpas? Discípulo Santiago qelqaran: “Mayqenniykichispas yachayniyoq kayta necesitashankichis chayqa, Diosmanta mañakushallaychis, jinan Diosqa chay mañakusqaykichista qosunkichis. Payqa lliuman tukuy sonqowan askhatapuni qoq Diosmi”, nispa (Santiago 1:5). Mañakusqaykiman jina ruwanaykipaqqa sapa p’unchaymi Bibliata leenayki, chaypi yachasqaykitataq kasukunayki (Santiago 1:23-25). Chayta ruwaspaqa consejonkuna allinpuni kasqantan rikunki.

THAJ KAYTA QOWANCHIS

Llakikuykunapi tarikuqtiykiqa Jehová Diosmi thaj kayta qosunki. Biblian nin: “Ama imamantapas llakipakuychischu, aswanpas mañakuspa, rogakuspa, graciasta qospa ima Diosman willakuychis imachus necesitasqaykichista. Jinan Diosqa runaq mana entiendey atisqan thaj kayta qosunkichis, chhaynapin sonqoykichista yuyayniykichista ima Cristo Jesuswan waqaychanqa”, nispa (Filipenses 4:6, 7). Diosmanta mañakuy thaj kayta qonasuykipaq.

Ichaqa, ¿imatan ruwawaq problemaykikuna mana usqhaychu allichakuqtin? Manan Diospas qonqapusunkiman jinachu sientekunayki. Jehová Diosqa kallpata valorta iman qowasun aguantananchispaq (1 Corintios 10:13). Bibliapin Dios prometewanchis jamuq tiempopiqa lliu problemanchiskuna chinkapunanta.