Kunanpas kusisqan kausawaq
MAY munaychá kanman kausayqa mana onqoy, mana machuyay, mana wañuypas kaqtinqa. Chhayna kausaymanqa aypawaqmi. Kay tiempopiqa imaymana problemakunan kashan. ¿Imaynatan chhaynaña kashaqtinpas kusisqa kawaq? Bibliapin kan askha consejokuna yanapanasuykipaq, chhaynapi sumaqta kusisqa kausanaykipaq. Chaypaq yachasunchis wakin problemakunamanta imaynatan Bibliaq consejonkuna yanapawasunman chaymanta.
“IMAYKICHISCHUS KAN CHAYLLAWAN CONTENTO KAUSAYCHIS”
Biblian consejawanchis: “Aman qolqe sonqoqa kankichischu, aswanpas imaykichischus kan chayllawan contento kausaychis”, nispa (Hebreos 13:5).
Kay mundopiqa imaymana cosaskunan rijurimushan, chayllawanñapas runaqa kausanman jinan kashan. Biblian ichaqa niwanchis imanchischus kan chayllawan kusisqa kausananchispaq. ¿Imaynatan chhayna kausayta atisunman?
Manan qolqe sonqochu kananchis. ‘Qolqe sonqo kaspan’ runakunaqa manaña saludninkuta, familiankuta, jujkunawan amistad ruwayta, qhelli kausaymanta cuidakunkuchu, qolqeraykun imayna runa kasqankutapas cambiapunku (1 Timoteo 6:10). ¡Qolqeraykuqa imatapas ruwankumanraqmi! Chaymantapas, qolqe sonqo runaqa “astawanpunin munan” imaymanayoq kayta (Eclesiastés 5:10).
Runaqa aswantan valen cosaskunamantaqa. Cosaskunaqa serviwanchismi, ichaqa manan juj runa jinaqa noqanchismanta sientenkumanchu; runallan chaytaqa ruwan. Cheqaq amigoyoq kayqa kusichiwanchismi (Proverbios 17:17).
BIBLIAQ CONSEJONKUNATA KASUKUSPAQA KUSISQAN KASUN
ONQOYTA AGUANTANAPAQ
Biblian consejawanchis: “Kusisqa sonqoqa allin jampin, llakisqa sonqon ichaqa onqochin”, nispa (Proverbios 17:22).
Onqoyninchista aguantanapaqqa kusisqa kaymi “jampi”. Ichaqa, ¿imaynatan kusisqa kasunman onqosqa kashaspa?
Agradecekuq kay. Problemallanchispi piensanchis chayqa “sapa p’unchaypas sasakaman” kanqa (Proverbios 15:15). Biblian ichaqa niwanchis: “Agradecekuq kaychis”, nispa (Colosenses 3:15). Allinkuna pasawasqanchismantan agradecekunanchis pisillaña kaqtinpas. Ejemplopaq, sumaqta inti chinkaykusqanmanta otaq munakusqanchis runa kusisqa sientekusqanmanta ima.
Jujkunata yanapay. “Qoypin aswan kusikuyqa kan, manan chaskiypichu”, onqosqaña tarikuspapas chaykunata ruwaspaqa kusisqan sientekusun (Hechos 20:35). Ima ruwasqanchismantapas pipas agradecekuwaqtinchisqa kusikunchismi, chaywantaq thajpi sientekunchis. Jujkunata kusichispaqa noqanchispas kusikunchismi.
CASARASQAKUNAQA KUSKALLAN KAUSANANKU
Biblian consejawanchis: “Aswan allin kaqkunatapas allinta reparanaykichis”, nispa (Filipenses 1:10).
Casarakuspa mana kuskalla kausaqqa pisi tiempomantan karunchanakunku, chayraykun casarasqakunaqa kuskalla kausananku; casarakuyninkutapas aswan importantepaqmi qhawarinanku.
Kuska imatapas ruwaychis. Biblian nin: “Aswan allinmi iskay runa juj runallamantaqa”, nispa (Eclesiastés 4:9). Sapallayki imatapas ruwanaykimantaqa, iskayniykichis ruwaychis. Ejemplopaq, kuskan wayk’ukuwaqchis, kuskan paseaq riwaqchis, kuskan imallatapas mijuwaqchis.
Munanakuychis. Bibliaq nisqanman jinaqa qosawan esposawanqa munanakuspa respetanakuspan kausananku (Efesios 5:28, 33). Sumaqta asirikuspa, oqllaykuspa otaq juj munay regalota qospa iman iskayninkuta astawanqa jujllachanqa. Casarasqakunaqa qosallankuwan otaq esposallankuwanmi warmi-qhari puñuypiqa kananku (Hebreos 13:4).