Wawaykikunata yanapay Diosta servinankupaq
1. Salmo 148:12, 13 textoq nisqan hina, ¿ima ruwanankupaqmi tayta-mamakunata kallpachashan?
1 Jehová Diosmi wawakunata invitan payta hatunchanankupaq (Sal. 148:12, 13). Chaymi tayta-mamakuna wawankuta yachachinku Bibliamanta cheqaq yachachikuykunata Diospa kamachikuynintapas. Chaymantapas yachachinkun allin willakuykunata willanankupaq. ¿Imaynatan yanapashallankuman?
2. ¿Imaynatan tayta-mamakunaq ejemplon wawankuta yanapanman?
2 Allin ejemploykiwan yanapay. Gedeón sutiyoq juezmi 300 runankunata nirqan: “Ñoqata qhawamuwankichis, imaynatachus ruwasqay kikintan ruwankichis”, nispa (Jue. 7:17). Wawakunapas tayta-mamanta qhawaspankun kaqllatataq ruwanku. Huk iñiqmasinchismi tutakunalla llank’an, sábado tutamantan wasinman samakuq rinanmantaqa, wawankunawanmi predicaq lloqsin sayk’usqaña kashaspapas. Chay taytaqa mana rimarispallan wawankunata yachachishan predicacionqa ñawpaqpi kananta (Mat. 6:33). ¿Rikusunkikuchu wawaykikuna Diospa llaqtanpi kusikuywan yanapakusqaykita, Diosmanta mañakusqaykita, Biblia leesqaykita, huñunakuykunapi tapuykunaman kutichisqaykita, predicasqaykitapas? Dios serviyniykipi tukuy kallpachakusqaykita rikuspaqa, wawaykikunapas kallpachakunqakun chhaynata servinankupaq (Deu. 6:6, 7; Rom. 2:21, 22).
3. ¿Imaynatan wawankuta yanapankuman Diospa llaqtanpi allin ruwaykunata aypanankupaq?
3 Imakuna aypay munasqankuta yanapay. Tayta-mamakunaqa manan sayk’unkuchu wawanku purinanpaq, rimananpaq, p’achakunanpaq yachachiyta. Chaykuna ruwayta yacharqoqtinkutaq huk ruwaykunatañataq yachachinku. Cristiano kaqtinkutaq wiñasqankuman hina Diospa llaqtanpi imakuna aypay munasqankuta churakunankupaq, imayna aypanankupaqpas yanapanku (1 Cor. 9:26). ¿Yachachishankichu wawaykikunata huñunakuypi umallanmanta tapuykunaman kutichinanpaq, Bibliamanta Allin Yachachiq Kanapaq Escuela nisqa huñunakuypaq discursonta payllamanta preparakunanpaqpas? (Sal. 35:18). ¿Yachachishankichu Diospa llaqtanpi ima ruwaypipas yanapakunanpaq? ¿Kallpachashankichu bautizakunanpaq Diospaq tukuy tiemponwan llank’ananpaqpas? ¿Reqsichishankichu allin iñiyniyoq kusisqa predicaq iñiqmasikunata? (Pro. 13:20.)
4. ¿Ima allinkunan wawakunapaq kanqa tayta-mamanku Dios serviyta yachachiqtinku?
4 Salmistan qelqarqan: “Diosníy, wayna kasqaymantapachan yachachiwarqanki, kunankamataqmi musphana ruwasqaykikunata willashani”, nispa (Sal. 71:17). Huch’uychanmantapacha wawaykikunata yanapay Diosta servinankupaq. Wawaykita iñiyninpi yanapasqaykiqa yuyayniyoq runa kanankaman yanapanqa (Pro. 22:6).