Wawanchista yachachisun Jehová Diosta yupaychanankupaq
1. ¿Wawakuna Jehová Diosta yupaychankumanchu?
1 Salmo 148:12, 13 texton nin: Wayna-sipaskuna, “Señor Diospa sutinta llapa yupaychaychis”, nispa. Bibliaqa willawanchismi askha wayna-sipaskuna Diosta yupaychasqankumanta. Ejemplopaq, wawallaraq kashaqtinmi “Samuelqa Señor Diosta linomanta unkuyoq servisharqan” (1 Sam. 2:18). Huk ‘sipaschan’ Naamanpa warminta niran: qosaykiq lepra onqoynintaqa Israel llaqtapi Jehová Diospa profetanmi hanpiyta atinman, nispa (2 Rey. 5:1-3). Jesús yupaychana wasipi askha milagrokunata ruwaqtinmi ‘wawakuna’ qaparispa niranku: “¡Qespichiwayku Davidpa Churin!” nispa (Mat. 21:15). ¿Imaynatan tayta-mamakuna wawankuta yachachinkuman Jehová Diosta yupaychanankupaq?
2. ¿Imanaqtinmi tayta-mamakuna ejemplota qonanku wawankuman?
2 Tayta-mamakunan ejemplota qonanku: Israel llaqtapi taytakuna manaraq wawankuman Diosmanta yachachishaspaqa, paykunaraqmi tukuy sonqowan Diosta munakunanku karan kamachikuyninkunatapas kasukunanku karan (Deu. 6:5-9). Sichus tayta-mamakuna sumaqta wawankuman rimapayanku predicacionmanta, sapa semanataq predicaq lloqsinkupas chayqa, wawakunapas sumaqtan chaniyoqtan qhawarinqaku predicayta.
3. ¿Imaynatan pananchista yanaparan tayta-mamanpa ejemplon?
3 Huk pananchismi willakun: “Wawa kashaqtiyraqmi familiayqa sapa semanapuni predicaq lloqsiqku. Tayta-mamayqa kusisqa predicaqku. Chayrayku huch’uyniykumantapacha sumaqta qhawarirayku predicayta”, nispa. Chay pananchisqa qanchis watachallanpin mana bautizasqa publicadora karan, kunanqa kinsa chunka iskayniyoq watañan Diospaq hunt’asqata llank’ashan.
4. ¿Imaynatan tayta-mamakuna wawankuta yanapankuman?
4 Wawakunata yanapashanallapuni: Tayta-mamakuna, wawaykichista yachachiychis predicacionpi yanapakunankupaq. Niwaqchismi punkuta takananpaq, wasiyoqman tratadota qonanpaq otaq textota leenanpaq. Chhaynapin predicaspa kusikunqaku, manataq manchakunqakuchu Diospa Reinonmanta willaspa. Wiñasqanman hinataq astawan predicanqa. Chaypaqmi, tayta-mamakuna, yanapanaykichis iñiyninkupi yachayninkupi wiñarinankupaq, espiritual metakunatapas churakunankupaq.
5. ¿Imakunatan wawakuna hunt’ananku publicador kanankupaq?
5 Sichus wawaykikuna predicanankupaq hunt’ashankuña chayqa, nisunkitaq: predicayta munashani nispa chayqa, ancianokunawan rimay. Publicador kaspankun astawan reparanqaku Jehová Diosta yupaychananku kasqanta. Wawakunaqa manan kuraqkuna hinaraqchu yachananku publicador kanankupaqqa. ¿Bibliamanta qallariy yachachikuykunata entiendenñachu? ¿Bibliaq nisqanman hinachu kawsashan? ¿Munanchu predicayta, Jehová Diospa testigon kaytapas? Chhayna kaqtinqa, ancianokunan qhawarinkuman mana bautizasqa publicador kananpaq listoña kasqanta (qhaway Organizados para hacer la voluntad de Jehová nisqa librota 79-82 paginakunata).
6. Wawakuna yachachiy sasaña chaypas, ¿imaraykun tayta-mamakuna yachachinankupuni wawankuta?
6 Tayta-mamakuna wawankuman Dios yupaychayta yachachinankupaqqa kallpachakunanku. Ichaqa anchatan kusikunku wawanku espiritualpi wiñariqtin. Aswantaraqqa Jehová Diosmi kusikun wawakuna Diospa ruwasqankunamanta willaqtinku.