Domingonkunata predicasun
1. ¿Imatan yachanchis Pablo compañeronkunapiwan Filipos llaqtapi ruwasqankumanta?
1 Ñawpa tiempopiqa sábado p’unchaymi Filipos llaqtamanta yaqa llapa judiokuna samaqku, Pablopas compañeronkunapiwanmi chaypi kasharqanku misionero llank’aypi. Sichus paykunapas chay p’unchay samarikunkuman karqan chayqa, manan pipas mana allintaqa rimanmanchu karqan. Ichaqa yacharqankun chay p’unchaypi askha judiokuna mañakunankupaq huñunakusqankuta, chaymi paykunata predicaq rirqanku. Chhaynapin Lidia sutiyoq warmi familianpiwan bautizakurqanku. ¡Ancha kusisqachá sientekurqanku chay predicaqkunaqa! (Hech. 16:13-15.) Kay tiempopiqa askha runakunan domingonpi samanku. Chayraykun domingonkunata predicayqa allinpuni kanman.
2. ¿Ima sasachakuytan Diospa llaqtan atiparqan domingonkunapi predicakunanpaq?
2 Ñawpaqpi domingonkuna predicasqanku. 1927 watapin Diospa llaqtanta kallpachakurqan domingonkunapi predicanankupaq. Ichaqa chayta ruwaqtinkun autoridadkuna paykuna contra hatarirqanku. Estados Unidospin askha iñiqmasikuna carcelpi wisq’asqa karqanku, tumpasqan karqanku samana p’unchay domingonkunata mana respetaymanta, mana permisowan vendeymanta ima. Ichaqa manan chayraykuchu predicayta saqerqanku. Aswanpas 1930 watakunapin predicanapaq grupokunata organizarqanku (campaña de las divisiones), chaypin iñiq t’aqakunamanta huk asignasqa territoriopi predicaqku. Mayninpiqa askhan predicaqkuna karqanku chaymi autoridadkuna wisq’aspanku mana llapankuwan atiqkuchu. Ñoqanchisrí, ¿valoranchischu domingonkunapi predicananchispaq ñawpaqpi iñiqmasinchiskunaq kallpachakusqankuta?
3. ¿Imanaqtinmi domingonkuna allin p’unchay kanman predicanapaq?
3 Allin p’unchay predicanapaq. Askha runakunan domingonpiqa mana llank’ankuchu chaymi mana apurasqachu kashanku. Hinaspapas wakinqa chay p’unchaymi Diosta yuyarikunku chaymi predicasqanchista uyariwasunman. Sichus huñunakuyninchis domingopi chayqa, ñan p’achasqaña kashanchis predicanapaq; chhaynaqa lloqsisunmanmi predicaq huñunakuy ñawpaqta otaq qhepatapas, munanki chayqa apakuwaqmi imallatapas chaymanta mikhunaykipaq.
4. ¿Imaynan sientekusun domingonkunapi predicaspa?
4 Domingonkuna huk rato predicaqtinchisqa kanqaraqmi tiempo samananchispaq. Hinaspapas kusisqan sientekusun Diospaq llank’asqanchismanta (Pro. 19:23). Chaymantapas tarisunmanmi astawan yachay munaq runata, Lidia sutiyoq warmita hina.