¿Allintachu junt’ashanchis Dios serviyninchiswan?

1. ¿Imatan llapanchispas ruwayta munanchis, imarayku? (Tapanpi kaq fotota qhaway.)

JESUCRISTON kamachiwaranchis: “Llapa nacionmanta runakunaman riychis, jinaspa yachachimuychis discipuloykuna kanankupaq”, nispa (Mat. 28:19). Chay kamachikuytaqa llapa cristianokunapas allintan junt’ayta munanchis (2 Tim. 4:5). Chay llank’aymi aswan importante ima llank’aymantapas, usqhayllataqmi chaytaqa ruwananchis. Tukuy tiemponchiswanña chaypi llank’ayta munasunman chaypas mayninpiqa sasan chayta ruwayqa.

2. ¿Imakunan jark’awasunman Dios serviyninchista allinta junt’ananchispaq?

² Tiemponchistapas kallpanchistapas imaymanapaqmi qonanchis. Yaqapaschá familianchista uywananchispaq ch’isiyaqta llank’anchis, onqoyniyoq familianchista cuidashanchis, onqosqa kashanchis, otaq kuraqña kashanchis. Chhaynapi tarikuspa, ¿imaynatan Dios serviyninchista allinta junt’asunman?

3. Mateo 13:23 textopi nisqanman jina, ¿imatan Jesús willaranña?

³ Manapaschá munasqanchisman jinachu Diosta servishanchis imapipas tarikusqanchisrayku, chaywanqa manan desanimakunachu. Jesusqa willaranñan mana igualtachu llapanchispas Diospa gobiernonpaq llank’ananchista (leey Mateo 13:23). Jehová Diosqa anchatan valoran tukuy sonqonchiswan paypaq llank’asqanchista (Heb. 6:10-12). Ichaqa reparakunchispaschá aswantaraq Dios serviyta atisqanchista. Chhaynaqa, ¿imatan ruwananchis Dios serviyta ñaupaqman churanapaq, necesitasqallanchiswan kausanapaq, allinta predicanapaq yachachinapaqpas? Manaraq chayta qhawarishaspa yachasun imaynatas juj cristiano Dios serviyninwan allinta junt’anman chayta.

4. ¿Imaynan Dios serviyninwan allinta junt’aq cristiano?

⁴ Dios serviyninwan allinta junt’aq cristianoqa tukuy atisqantan kallpachakun predicananpaq, runakunaman yachachinanpaqpas. Jehová Diosqa manan jayk’a hora predicasqallanchistachu qhawamun astawanqa qhawamun imarayku predicasqanchista. Sichus Diosta runamasinchista munakusun chayqa, tukuy sonqowanmi Diosta servisunchisb (Mar. 12:30, 31; Col. 3:23). Chaypaqqa tukuy atisqanchistan kallpachakunanchis Diosta servinanchispaq. Sichus predicayta ancha allinpaq qhawarisunchis chayqa, tukuy atisqanchistan ruwasun askha runakunaman predicananchispaq.

5, 6. ¿Imaynatan juj cristiano Dios serviyninta junt’anman imaymana ruwanayoqña kanman chaypas? Juj ejemplota willay.

⁵ Rimasun guitarra tocayta gustaq waynamanta, chay waynaqa sapa kutillanmi guitarrata tocan. Tiempowanmi payta contratanku sapa semana tukuyta tocananpaq, ichaqa ganasqan qolqeqa manan aypanchu kausananpaq. Chaymi lunesmanta vierneskama juj tiendapi llank’an. Yaqa semanantinña chay tiendapi llank’an chaypas allinta tocananpaqmi samasqan ratokunapi practicashallan.

⁶ Noqanchispas tukuy tiemponchiswanmi predicayta munanchis, ichaqa imaymana ruwanayoq kasqanchisraykun mana atinchischu. Chaywanpas kallpachakushallanchismi runakunaq sonqonman chayanapaq jina allin willakuykunata willananchispaq. Imaymana ruwanayoqña kanchis chaypas, ¿imatan ruwasunman Diosmanta willayta ñaupaqman churananchispaq?

DIOS SERVIYTA ÑAUPAQMAN CHURASUN

7, 8. ¿Imaynatan Jesús Diosta serviran? ¿Imaynatan ejemplonta qatikusunman?

⁷ Jesuspaqqa Dios serviymi imamantapas aswan importante karan, chaymi ejemplonta qatikunanchis (Juan 4:34, 35). Karu llaqtakunatan puriran askha runakunaman predicamunanpaq. Jesusqa predicaqmi wasin-wasinta askha runakunaq kasqanpipas. Tukuy ruwasqanpin rikuchiran Dios serviyta ñaupaqman churasqanta.

⁸ Jesús jinan noqanchispas kallpachakunchis maypipas allin willakuykunata willananchispaq. Imaymana sacrificiokunatan ruwanchis chay llank’aypi yanapakunanchispaq (Mar. 6:31-34; 1 Ped. 2:21). Wakinqa iñiq t’aqapin precursor especial, regular otaq auxiliar jina llank’ashanku. Jujkunataq juj simita yachashanku otaq maypichus predicaqkuna necesitakushan chaypi yanapakushanku. Wakin hermanonchiskuna manaña chhaynatachu llank’ashanku chaypas, tukuy atisqankutan ruwanku predicaypi yanapakunankupaq. Imaynapiña tarikuqtinchispas Jehová Diosqa manan mana atinanchistaqa mañawanchischu. Payqa allin willakuykunata kusisqa willananchistan munan (1 Tim. 1:11; Deut. 30:11).

9. a) ¿Imaynatan Pablo rikuchiran Dios serviyta ñaupaqman churasqanta llank’ananña kaqtinpas? b) Hechos 28:16, 30, 31 textopi nisqan jina, ¿imaynatan apóstol Pablo Diosta serviran?

⁹ Apóstol Pabloqa allin ejemplotan qowaranchis Dios serviyta ñaupaqman churananchispaq. Corinto llaqtapi kashaspan pisi qolqeyoq kasqanrayku karpakunata ruwaspa llank’aran. Manataqmi munaranchu chay llaqtapi hermanokuna mantienenankuta (2 Cor. 11:7). Chaywanpas manan chay llank’aychu paypaqqa aswan importante karan, chaymi sapa sábado predicaq. Mantienekunanpaq yanapaqtinkutaqmi astawan predicaran. Chaymi ‘Diospa siminmanta willaspa Pabloqa puriran, judiokunamantaq sut’inta rikuchiran Jesusqa Cristopuni kasqanta’ (Hech. 18:3-5; 2 Cor. 11:9). Wasinpi preso jinaña iskay wata karan chaypas, Pabloqa predicashallaranmi visitaqninkunaman cartakunatapas qelqaranmi (leey Hechos 28:16, 30, 31). Payqa manan imawanpas jark’achikuranchu Diosta servinanpaq. Chaymi niran: ‘Diosmi chay llank’anata qowaranku, chaymi mana pisipaykuchu’, nispa (2 Cor. 4:1). Noqanchispas llank’ananchisña kaqtinchispas Dios serviytan ñaupaqman churananchis.

10, 11. ¿Imaynatan Dios serviyninchista junt’asunman onqosqaña kaqtinchispas?

¹⁰ Yaqapaschá kuraq kasqanchisrayku otaq onqosqa kasqanchisrayku mana wasin-wasinta predicayta atinchischu, chaywanpas jujniraymantan predicasunman. Ñaupaq tiempopi cristianokunaqa runaq kasqanpin predicaranku: wasin-wasinta, plazakunapi, juj ladokunapipas (Hech. 17:17; 20:20). Puriyta mana atinchischu chayqa askha runakunaq kasqanpin tiyaspa predicasunman. Telefonontapas predicasunmanmi, cartata qelqaspa otaq jujniraymantapas. Askha onqosqa kuraq hermanonchiskunan chhaynata predicaspa kusisqa sientekunku.

¹¹ Onqosqaña kashaspapas junt’asunmanmi Dios serviyninchiswan. Qhawarisun Pabloq ejemplonta. Paymi niran: “Tukuy imapaqmi kallpa qowaqniyqa kallpata qowan”, nispa (Filip. 4:13). Juj kutinmi Pabloqa viajashaspa onqopuran, chaymi necesitaran Diospa kallpanta. Galacia llaqtapi hermanokunatan niran: “Onqosqayraykun ñaupaqpiqa allin willakuykunata willaraykichis”, nispa (Gál. 4:13). Chay jinatan noqanchispas onqosqa kashaspapas doctorkunaman, enfermerokunaman, chaypi llank’aqkunamanpas predicasunman. Chay runakunataqa manan wasinkupi tarinchischu predicaspa.

IMAYMANATAN SACRIFICANANCHIS

12. ¿Imaynan jujllata qhawaq ñawi?

¹² Jesusmi niran: “Ñawiqa cuerpoq k’anchayninmi. Chayrayku, ñawiykichus jujllata qhawanqa chayqa, llapa cuerpoykin k’anchayniyoq kanqa”, nispa (Mat. 6:22). ¿Imatan chaywan nisharan? Jujllata qhawaq ñawiqa juj ruwayllapin tukuy yuyayninta churan, manataqmi juj ruwaykunawan distraekunchu. Jesuspa yuyayninqa Dios serviyllapin kasharan, discipulonkunatataq yachachiran Jehová Diosta gobiernontapas ñaupaqman churanankupaq. Jesuspa ejemplonta qatikusun chayqa, ‘Diospa gobiernonta chanin kaynintawanmi ñaupaqta maskhasun’ (Mat. 6:33).

13. ¿Imatan yaqapas ruwananchis Dios serviyllapi yuyayninchis kananpaq?

¹³ Yuyayninchis Dios serviyllapi kananpaqqa yaqapaschá imaymanata sacrificananchis kanqa.c Chhaynapin jujkunata yanapasun Diosta reqsinankupaq munakunankupaqpas. Yaqapaschá llank’ananchispi horariota cambiasunman, kusirikunanchis tiemponchistapas pisiyachisunman, chhaynapi astawan predicananchispaq.

14. ¿Imatan juj casarasqa hermanonchiskuna ruwaranku astawan predicanankupaq?

¹⁴ Elías sutiyoq umalliqmanta esposanmantawan yachasun. Paymi nin: “Manan precursor regular kayta atiraykuchu, chaywanpas astawan predicanaykupaqmi imaymana cambiokunata ruwarayku. Ejemplopaq, pisillatañan gastarayku, kusirikunayku tiempotapas pisiyachiraykun. Llank’anaykupipas jefeykutan valekurayku horarioykuta cambiananpaq, chhaynapin tardenkunata predicaq lloqsiyta atirayku, askha runakunamantaq estudiota qorayku, killapipas iskay kutitan llank’anayku p’unchaykunapi predicaq lloqsirayku. Chaykunata ruwaspan, ¡anchata kusikurayku!”, nispa.

¿IMAYNATAN ALLIN YACHACHIQ KASUNMAN?

15, 16. 1 Timoteo 4:13, 15 textopi nisqanman jina, ¿imaynatan aswan allinta predicasunman? (Qhaway “¿Imakunatan ruwana Dios serviyninchista aswan allinta junt’ananchispaq?” nisqa recuadrota.)

¹⁵ Dios serviyninchista allinta junt’anapaqqa kallpachakunanchismi allin yachachiq kananchispaq. Wakin profesionalkunaqa sapa kutillanmi capacitakunku allinta llank’anankupaq. Noqanchispas sapa kutillanmi capacitakunanchis aswan allinta Dios serviyninchista junt’ananchispaq (Prov. 1:5; leey 1 Timoteo 4:13, 15).

¹⁶ ¿Imatan ruwashanallanchis allin yachachiq kananchispaq? Tukuy yuyaywanmi uyarinanchis Diospaq kausasunchis nisqa juñunakuy imayna aparikusqanta. Chay juñunakuymi capacitawanchis aswan allinta predicananchispaq. Demostracionta ruwaqkunaman consejo qosqankutan makilla uyarinanchis, jinaspa chayman jina predicananchis. Chaymantapas predicasunmanmi gruponchista umalliqwan, allinta predicaq hermanokunawan, precursor regular hermanokunawan, watukuq umalliqwanpas. Yachachinapaq herramientanchiskunata aswan allinta utilizasun chayqa, astawanmi kusikusun predicaspa yachachispapas.

17. ¿Imaynan sientekusun Dios serviyninchiswan allinta junt’aspa?

¹⁷ ¡May sumaqmi Jehová Diospa ‘llank’aqmasin’ kayqa! (1 Cor. 3:9.) Sichus Dios serviyta ñaupaqman churasun chayqa, kusisqan Jehová Diosta servisun (Filip. 1:10; Sal. 100:2). Imaynapiña tarikuspapas Diospa yanapayninwanqa atisunmi Dios serviyninchiswan junt’ayta (2 Cor. 4:1, 7; 6:4). Imayna tarikusqanchisman jina askhataña otaq pisitaña Diosta servinanchispaq ruwasunman chaypas, sonqomanta ruwaspaqa kusisqan Diosta servisunchis (Gál. 6:4). Dios serviyniykita allinta junt’aspan rikuchishanki Jehová Diosta runamasiykita munakusqaykita. “Chayta ruwaspaqa qan kikiykitan salvakunki, uyarisuqniykikunapas salvasqallataqmi kanqaku” (1 Tim. 4:16).