Tratadokunawan allin willakuykunata willasun
1. ¿Imaynatan tratadokuna yanapawanchis?
1 Diospa llaqtanqa unayñan tratadokunawan allin willakuykunata willashanku. 1880 watapin C. T. Russell iñiqmasinchis llank’aqmasinkunawan kuska tratadokuna ruwayta qallarirqanku Watch Tower (quechuapi Qhawaq) nisqa revistata leeqkuna ch’eqechinankupaq. Chay tratadokunaqa ancha allinpunin karqan, chaymi Diospa Gobiernonmanta mana qolqellapaq predicay aparikunanpaq Russell iñiqmasi inscribichisqan Zion’s Watch Tower Tract Society (kunanqa Watch Tower Bible and Tract Society of Pennsylvania) nisqa sutipi churakurqan tract (“tratados”) nisqa simita. Biblia Estudiaqkunaqa 1918 watakaman 300 millón más tratadokunata rakirqanku. Kunankamapas anchatan tratadokuna yanapawashanchis predicayninchispi.
2. ¿Imaraykun ancha allinpuni tratadokunawan predicay?
2 Ancha allinpunin. Tratadokunaqa sumaq ruwasqan kashan. Chaypi willakuykunaqa pisillapin qelqasqa kashan runakuna interesakunanpaq hinataqmi kanpas. Runakunaqa librota otaq revistata chaskikunankumantaqa tratadokunatan astawanqa chaskikunku. Wawakunapas chayllaraq predicaqkunapas tratadokunawanmi facil-llata predicanku. Hinaspapas huch’uylla kasqanraykun maymanpas aparikusunman.
3. Tratadokuna allinpuni kasqanmanta experienciaykita willay otaq qelqanchiskunapi kaqtapas.
3 Askha runakunan huk tratadoq yanapayninwan Diosta reqsirqanku. Haití nacionpin huk warmi callepi huk tratadota tarirqan, leeruspataq nirqan: “¡Kaymá cheqaq yachachikuyqa!” nispa. Chay qhepamanmi Huñunakunanchis Wasita rirqan, Biblia estudiayta qallarirqan, chaymantataq bautizakurqan. ¡Huk tratadopi Diospa Siminta tarisqanmi yanaparqan!
4. ¿Ima yuyaywanmi predicasun tratadokunawan predicananchis killakunapi?
4 Wasin-wasinta predicaspa. Tratadokunawan predicay allinpuni kasqanraykun noviembre killamantapacha wakin killakuna tratadokunawan llank’asun. Ichaqa manan saqeyllachu saqesun, aswanmi tratadoq yanapayninwan runakunawan parlarisun. Sichus chayllaraq visitaqtinchis otaq kutiqtinchis astawan yachayta munanqa chayqa, munachisunmanmi Imatapunin librota otaq Bibliata estudianapaq mayqen qelqatapas. ¿Imaynatan tratadokunawan predicayta qallarisunman? Askhataq tratadokuna kan chayqa, ñawpaqtan yachananchis imamantan sapankapas rimashan chayta.
5. ¿Imaynatan wasin-wasinta predicaspa tratadokunata munachisunman?
5 Tratadokunawan predicanapaqqa, ñawpaqtan qhawarina ima tratadowan predicananchista runakuna imayna kasqantawan. Yaqapaschá huk tratadota qosunman qallariyninpi dibujota otaq fotota rikuspa interesakunanpaq. Otaq iskay kinsa tratadokunata qhawarichisunman akllakunanpaq. Yaqapaschá wakinqa punkunkuta mana kichakamuyta munankuchu, paykunamanpas atikusqanman hinan tratadota qhawachisunman otaq nisunman: “Punkuykiq pachanta kay tratadota haywamusayki, hinaspa willariwanki chaypi rikusqaykimanta”, nispa. Huk tratado tapuywan qallarishan chayqa chaytan tapurisunman, otaq huk tapuyta ruwasunman chayman tumpa parlarinapaq. Tratadota pisillata leepuspataq kutichinanpaq hina tapurisunman. Chayman hinan huk textota akllaspa leesunman. Chay qhepamanmi nisunman hayk’aqta ima horata kutinapaq. Sichus runakunata mana tarisqanchis wasikunapi iñiq t’aqanchis qelqakunata saqellan chayqa, tratadotapas saqesunmanmi ichaqa puriqkuna mana rikunanpi.
6. ¿Imaynatan tratadokunawan callekunapi predicasunman?
6 Callekunapi predicaspa. ¿Predicarqankichu tratadokunawan callekunapi? Wakin runakunaqa usqhayllan purishanku, chaymi mana parlariyta munankuchu, nitaq yachanchischu Bibliapi interesakunkuchus icha manachus chayta. Yaqapaschá qosqanchis revistakunatapas mana leenkuchu, chaymi allin kanman tratadokunata qoy. Chaytaqa huch’uylla kasqanta, sumaq kasqanta qhawarispan leenkuman. Sayaykuspa uyariwasun chayqa, willasunmanmi imamanta chay tratado willasqanta.
7. Willay imaynatan hukkuna may tarikusqankupipas tratadokunawan predicanku chayta.
7 Maypipas predicaspa. Tratadokunawanqa facil-llatan maypi tarikuspapas predicasunman. Huk iñiqmasinchismi wasinmanta lloqsispa sapa kutilla tratadokunata bolsillonpi aparikun. Chaymi tiendapi llank’aqwan otaq piwanpas parlaspaqa huk tratadota munachin. Huk casado cristianokunan Nueva York llaqtata paseaq rirqanku, paykunan Naciones nisqa folletota, huk simikunapi tratadokunatawan aparikurqanku tupasqanku runakunaman qonankupaq. Chaymi qhatuqkunata, parquepi samakuqkunata, pensionpi mikhuqkunatapas huk simipi rimaqta uyarispaqa, rimasqanku simipi huk tratadota qoqku.
8. ¿Imaynapin tratadokuna muhuman rikch’akun?
8 “Muhuykita tarpuy.” Tratadokunaqa muhu hinan. Chakra llank’aqkunaqa comuntan muhuta t’akanku, chaymi mana yachankuchu maypi wiñananta. Eclesiastés 11:6 texton nin: “Tutamanta muhuykita tarpuy, ch’isinkamapas llank’ashallaypuni, manan yachankichu mayqenchus aswan allin kananta, ñawpaq tarpusqachus icha qhepakaqchus, icha iskayninchus allinkama kananta”, nispa. ‘Yachayta mast’arishanallapaqqa’ tratadonchiskunawanmi predicananchis (Pro. 15:7).
[3 paginapi willakuy]
Tratadokunawan predicay allinpuni kasqanraykun noviembre killamantapacha wakin killakuna tratadokunawan llank’asun.