Llank’asqanchispa rurusqanmi kusichiwanchis
1. ¿Iman pisikallpayachiwasunman Dios serviyninchispi?
1 Jehová Diosmi llapa runata kamarqan tukuy ‘llank’asqankuq’ rurusqanwan kusisqa kanankupaq (Ecl. 2:24). Chaymi Dios serviyninchispi kallpachakusqanchispa rurunta mana rikuspa pisikallpayasunman, hinaspa manaña kusisqachu llank’asunman. Imaynatan mana pisipaspa kallpachakushallasunman?
2. ¿Imaraykun kallpachakushanallanchis?
2 Manan llapanpunichu allinpi tukunqa. Jesustapas manan llapa runachu uyarirqanku, ichaqa manan chayraykuchu nisunman llank’asqanqa mana allinpin tukurqan nispa (Juan 17:4). Muhu t’akaqmanta rikch’anachiypi Jesuspa willasqanmi rikuchiwanchis mana llapa runaq sonqonpichu allin willakuy muhu t’akasqanchis wiñananta (Mat. 13:3-8, 18-22). Qhawarisun imakunatas aypasunman kallpachakusqanchiswan chayta.
3. ¿Imaynapin rurunchis manaña runakuna uyariwanchischu chaypas?
3 ¿Imaynapin rurunchis? Diospa Gobiernonmanta willakuykunata chaskiqkunan rurunanku karqan, chaytan willawanchis muhu t’akaqmanta rikch’anachiy (Mat. 13:23). Trigoq tullun wiñamuspa poqoqtinqa manan huk mosoq tullukunachu wiñamun, aswanpas muhukunan. Chay hinallataqmi cristianokunaq rurusqanpas; manan Jesuspa mosoq qatikuqninkunata maskhayllachu, aswanpas Diospa gobiernonmanta sapa kutilla rimaymi. Chayta ruwaspa ‘allinkunata’ aypasqanchismi anchata kusichiwanchis, manaña runakuna uyariwanchischu chaypas. Predicaspaqa Diospa sutin yupaychasqa kananpaqmi yanapakushanchis (Isa. 43:10-12; Mat. 6:9). Diospa llank’aysiq-masin kaypas kusichiwanchismi (1 Cor. 3:9). Hinaspapas Jehová Diostaqa anchatan kusichin “siminchiswan” yupaychasqanchis (Heb. 13:15, 16).
4. ¿Imaynapin rurusunman mana yachasqallanchis?
4 Mayninpiqa manan llapa llank’asqanchispunichu allinpi tukunqa. Jesuspa predicasqan runakunapas manan llapankuchu qatikuqninman tukupurqanku, wakinqa wañupusqan qhepatañan. Chay hinallataqmi allin willakuykunata runakunaq sonqonpi tarpusqanchispas mana usqhayllachu wiñamunqa, aswanpas yaqapaschá mana yachasqallanchis chay runaqa iñiqmasinchisña kapunqa. Chay hinaqa, Dios serviyninchispi kallpachakusqanchisqa ancha allinpunin. Chayrayku ‘askhata rurusunchis’, chay hinapi Jesuspa qatikuqninkuna kasqanchista sut’ita rikuchisun (Juan 15:8, MR).