Ama atipachikuychu manchakuyniykiwan
1. ¿Imaraykun wakinkuna manchakunku Bibliamanta estudio qoyta?
1 ¿Mana allin yachachiq kanaykipaq yuyaykuspachu manchakunki Bibliamanta estudio qoyta? Ñawpa tiempopi Dios serviq runakunapas chay hinatan yuyaykurqanku llank’aykunata Diosmanta chaskispa, paykunamantan karqan: Moisés Jeremías (Éxo. 3:10, 11; 4:10; Jer. 1:4-6). Ñoqanchispas chay hinatan mayninpiqa yuyaykusunman. ¿Imatan ruwasunman chhaynapi tarikuspa?
2. ¿Imaraykun mana wasin-wasinta predicaspallachu purinanchis?
2 Jehová Diosqa ima llank’aytapas hunt’ananchispaq hinallan qowanchis (Sal. 103:14). Runakunata yachachispa qatikuqninkuna kanankupaq llank’ayqa atinanchispaq hinan, chayraykun chay llank’ayta qowarqanchis (Mat. 28:19, 20). Chay llank’aytaqa manan yachayniyoqkunallamanchu qorqan (1 Cor. 1:26, 27). Chaymi kallpachakunanchis estudiota qonanchispaq, manataqmi wasin-wasinta predicaspallachu purinanchis.
3. ¿Imaynatan Jehová Dios yachachiwanchis Bibliamanta estudiota qonanchispaq?
3 Jehová Diosmi yachachiwanchis. Diosmi yanapawanchis runakunata yachachimunanchispaq chay hinapi yachachisqankuna kanankupaq (2 Cor. 3:5). Llaqtanpin imaymana yachachiykunata sut’inchawanchis, chaytaqa manan kay pachamanta allin yachayniyoqkunaqa reqsinkuchu (1 Cor. 2:7, 8). Bibliapin tarinchis Jesuspa allin yachachiyninkunata. Iñiq t’aqapipas allin yachachiykunatan sapa kuti chaskinchis. Chaymantapas qelqanchiskunan yanapawanchis, hukninmi Imatapunin libro, chay libron yachachiwanchis Bibliamanta cheqaq yachachiykunata allinta entiendenapaq. Chayraykun, Bibliamanta estudio qoyqa mana sinchi sasachu.
4. ¿Imaraykun mana iskayananchischu Jehová Dios yanapawananchispi?
4 Moisespas Jeremiaspas Diospa yanapayninwanmi llank’ayninkuta allinta hunt’arqanku (Éxo. 4:11, 12; Jer. 1:7, 8). Chayrayku Jehová Diosmanta mañakunanchis yanapawananchispaq. Payqa yanapawasunpunin, Bibliamanta estudiota qospaqa paymantan cheqaqkaqta yachachishanchis, chay ruwananchistataqmi munanpas (1 Juan 3:22). Chayrayku kallpachakusun Bibliamanta estudio qoyta qallarinanchispaq. Chayta ruwasun chayqa kusisqan kasun askha bendiciontataq chaskisunpas.