Pachak watañan Diospa gobiernonmanta willashanchis
1. ¿Imata ruwanapaqmi Rutherford iñiqmasi Diospa llaqtanta kallpacharqan?
1 Rutherford iñiqmasin yaqa 100 wata ñawpaqta Diospa llaqtanta kallpacharqan hallp’antinpi Diospa gobiernonmanta willanankupaq, nirqanmi: “¡Reyqa kamachikushanñan! Qankunan paymanta willaq kankichis. Chhaynaqa, Reymanta reinonmantawan willaychis, willaychis, willaychis”, nispa. ¡Chaymi kunan hunt’akushan! Apostolkunaq tiemponpi hinan, ‘allin willakuykuna kay pachantinpi runakunaman willasqa kashan’ (Col. 1:23). ¿Imaynatan ñawpaqpi Diospa gobiernonmanta willakuyta aparikurqan? ¿Imaynatan kay pachak wata hunt’akusqanpi allin willakuykunata aparisunman?
2. ¿Imamantan revistanchiskuna willashan?
2 Ñawpaqpi predicakusqan. 1939 watamantapachan Qhawaq. Jehová Diospa Gobiernonmanta Willashan (español simipi) nisqa sutiwan revista lloqsimushan. Kay revistan sapa kutilla willan Diospa gobiernonmanta imachus ruwananmantawan. ¡Rikch’ariy! revistan willashallantaq Diospa gobiernollan llapa runakunapaq sumaq kawsay apamunanmanta. Kay revistakunaqa hallp’antinpin rakikushan askha simikunapitaqmi t’ikrasqa kashan (Apo. 14:6).
3. ¿Imakunawanmi Diospa llaqtan predicarqan?
3 ¿Imakunawanmi Diospa llaqtan ñawpaqpi yanapachikurqan Diospa gobiernonmanta willanankupaq? Ñawpaqkunataqa parlanteyoq carrokunawan, radiowan, tocadiscowan yanapachikuspan predicaqku. Chay tiempopi iñiqmasikuna pisillaña karqanku chaypas, chaykunawan yanapachikuspan askha runakunaman predicarqanku (Sal. 19:4). Kay qhepa watakunapiqa jw.org nisqawanmi waranqa-waranqanpi runakunaman predicashanchis. Chayqa predicayta hark’asqanku llaqtakunamanraqmi chayashan.
4. ¿Imaynatan kay qhepa watakunapi predicayta qallarikurqan?
4 1990 watakunamanta hinan Diospa llaqtan huk hinamanta Diospa gobiernonmanta willashan. Chaymantapachan predicashanku parquekunapi, estacionkunapi, mercadokunapi ima. Qayna watakunallan hallp’antinpi huk hinamanta hatun llaqtakunapi predicayta qallarikurqan. Hinaspapas iñiq t’aqakunan, askha runakunaq kasqanpi vitrinakunapi, mesakunapi qelqakunata churaspa predicashanku. Chaywanpas manan saqenchischu wasin-wasin predicaytaqa (Hech. 20:20).
5. ¿Imaynatan qallariy watamanta predicayninchista yapasunman?
5 Hamuq tiempopi predicanapaq. Setiembre killapin mosoq wata qallarinqa. Chaypin askha iñiqmasikuna precursor regular nisqata qallarinqaku. Qanri, ¿kallpachakuwaqchu precursor regular kanaykipaq, mana atispataq mayninpi precursor auxiliar kanaykipaq? Sichus mana precursor kayta atinkichu chayqa, kallpachakuy astawan predicanaykipaq. Chayta ruwanki chayqa Diosmi tukuy ruwasqaykipi yanapasunki (Mal. 3:10).
6. ¿Imaraykun octubre killa hatun killa kanqa?
6 Kay octubre killawanmi Jesús pachak wataña kamachikunqa. Chaymi chay killapi lloqsimuq Qhawaq revista Diospa gobiernonmanta willanqa. Chaytan llapa runakunaq makinpi saqemunanchis kanqa. Chayrayku llapallanchis kallpachakusun “Diospa qhapaqsuyunmanta [gobiernonmanta] allin willakuykunata” willamunapaq (Hech. 8:12).