¿Imaraykun Diospa gobiernonmanta yachanayki?

Jesusmi qatikuqninkunata nirqan khaynata mañakunankupaq: “Qhapaqsuyuyki [otaq gobiernoyki] hamuchun, munayniyki kay pachapi ruwakuchun, imaynan hanaq pachapipas ruwakun hinata”, nispa (Mateo 6:10). Chayta yachaspan waranqa-waranqanpi runakuna Diospa gobiernonta suyakushanku.

Ichaqa yaqa llapa religionkunan Diospa gobiernonmanta pisita willanku. Ñawpa tiempomanta willaq H. G. Wells runan admirakurqan Jesuspaq ‘hanaq pacha gobiernomanta’ willay ancha importante kashaqtin, ‘yaqa llapa cristiana religionkuna chay gobiernomanta pisita willasqankuwan’.

Jehová Diospa testigonkunan ichaqa Diospa gobiernonmanta willashayku. Kay revistan chayta rikuchin, sutinpunin nin, Qhawaq. Jehová Diospa Gobiernonmanta Willashana nispa. Kay revistaqa 220 simikunapin lloqsimun, sapanka revistamantataq 46 millón ruwakun. ¡Manan huk revista kanchu chhayna askhanpi ruwakuqqa!

¿Imaraykun Jehová Diospa testigonkuna Diospa gobiernonmanta willayku? Bibliapuni chay gobiernomanta willasqanrayku. Hinaspapas chay gobiernollan kay pachapi tukuy sasachaykunata chinkachinqa.

Jesuspaqpunin Diospa gobiernon aswan importante karqan, runakunaman yachachispapas chaymantan astawanqa willarqan. Chaymi ñoqaykupas Jesusta qatikuspa Diospa gobiernonmanta willayku (Lucas 4:43). ¿Imaraykun Jesuspaq chay gobiernomanta yachachiy aswan importante karqan? ¿Imaynapin chay gobierno yanapasunkiman? Chaykunamantan qatimuq paginakunapi yachasun.