2015 watapaq escuelan yanapawasun aswan allinta yachachinapaq
1 Rey Davidmi Jehová Diosta nirqan: “Hatun Qaqaymi, qespichiqniymi kanki, simi rimarisqaykunapas yuyaykusqaykunapas sonqoykipaq hinapuni kachun”, nispa (Sal. 19:14). Ñoqanchispas siminchiswanmi Diosta hatunchananchis, ancha chaninpaqmi qhawarinanchis huñunakuypi predicaypipas Diospa siminmanta rimariyta. Chaypaqmi Jehová Dios 111.000 iñiq t’aqakunapi Bibliamanta allin yachachiq kanapaq escuelata aparichin. Chaymi llapallanchista yanapawashanchis allin willakuykunata yachachimunapaq. Chaywanmi allin preparasqa kashanchis sumaq simiwan, mana manchakuspa, iñinankupaq hina runakunata yachachinapaq (Hech. 19:8; Col. 4:6).
2 2015 watapi escuelapaq programapin asignación kashan ¿Imakunamantan Bibliapi yachasunman? folletomanta huk qelqakunamantawan. Wakin asignacionpin Bibliapi kaq sasa simikunata sut’inchakunqa, wakinpitaq Bibliaq willasqan runakunamanta rimakunqa. Hinaspapas escuelapi “akllasqa yachachikuykuna”, “huk kaq yachachiy” nisqa discursokunapaq tiempon pisiyapunqa. ¿Imaynan kanqa chay cambiokuna? Chaykunamantan qatimuq parrafokunapi yachasun.
3 Akllasqa yachachikuykuna: Chayta ruwaq iñiqmasiqa huk yachachikuyllamantan 2 minutollapi rimanqa. Allinta preparakunqa chayqa yachasqanmi iñiqmasikunata yanapanqa tiemponpitaqmi tukunqa. Chay qhepamanqa iñiqmasikunan kuskan minutopi otaq aswan pisipi allin yachachikuykuna tarimusqankumanta willanqaku. Chaypaqqa ñawpaqpi ruwakusqanta hinan 6 minuto kanqa. Kuskan minutollapi allin yachachikuykunata willayqa manan facilchu, ichaqa chay ruwasqankun allinninkupaq kanqa. Hinaspapas aswan askha iñiqmasikunan allin yachachikuykuna tarimusqankumanta willanqaku.
4 Huk kaq yachachiy: Kunanqa 3 minutollapiñan otaq aswan pisipi Bibliata leekunqa, pisiyachikunqataqmi leekunan versiculokunata. Chay asignacionta ruwaqqa hukkuna entiendenanpaq hinan allinta leenan. Chaypaqqa allintan preparakunan, askha kutitan alto kunkawan wasipi leenan, llapa simikunatataqmi allinta t’oqyachinan. Ichaqa llapallanchismi kallpachakunanchis allinta leenapaq. Tayta-mamakunapas wawankutan yanapashanku allin leeq kanankupaq. ¡Maytan kusikunchis wawakuna sumaqta leeqtinku!
5 Iskay kaq yachachiy: Chaytaqa warmikunan ruwanqa 5 minutopi otaq aswan pisipi. Escuelapi umalliqmi willanqa piwan ruwananta. Sichus, ¿Imakunamantan Bibliapi yachasunman? folletomanta otaq Bibliapi kaq sasa simikuna sut’inchaymanta kanqa chayqa, predicashanman hinan ruwanqa. Ichaqa iñiqmasikunata yanapananpaq hinan ruwanan. Sichus Bibliaq willasqan runamanta rimananpaq asignasqa kashan chayqa, paymanta willaq qelqatan allinta t’aqwirinan. Textokunatan allinta akllanan, qhawarichinantaqmi imakunatan paymanta yachasunman chayta.
6 Kinsa kaq yachachiy: Chaytaqa warmi otaq qharin ruwanqa 5 minutopi. Warmi ruwanqa chayqa “iskay kaq yachachiy” nisqanman hinan ruwanqa. Sichus huk qhari Bibliaq willasqan runamanta rimananpaq asignasqa kanqa chayqa, discursota hinan qonqa, iñiqmasikunata yanapanapaq hinataqmi ruwanqa. Qelqaq nisqanman hinan ruwanan, allintan textokunata akllanan, qhawarichinantaqmi imakunatan paymanta yachasunman chayta.
7 Qharikunapaq huk asignación: ¿Imakunamantan Bibliapi yachasunman? folletomanta otaq Bibliapi kaq sasa simikuna sut’inchaymanta kanqa chayqa, familianwan estudiashanman hina otaq predicashanman hinan ruwanan. Sichus huk textokuna kanman rimasqan temawan tupaq chayqa chaytapas leenmanmi. Chaytaqa ruwanan familianwan otaq huk iñiqmasiwanmi, ichaqa escuelapi umallin ninqa piwan imaynapi ruwanantapas. Mayninqa huk umalliqmi asignasqa kanqa chay demostracionta ruwananpaq. Chay kaqtinqa paymi akllakunman piwan ruwananta imaynapi ruwanantapas. ¡Maytachá kallpachawasun huk umalli familianwan otaq huk iñiqmasiwan demostracionta ruwasqanqa!
Escuelapi yanapaykuna chaskisqanchismi iñiyninchispi wiñachiwasun
8 Umalli yanapananpaq: Escuelapi umalliqqa sapanka estudiante imamantachus rimamunantan ñawpaqta willanqa, ichaqa manan willanqachu imapi llank’anan kasqanta. Tukusqan qhepamanmi ichaqa 2 minutopi Escuelapi Yachay libroq nisqanman hina willanqa imapin llank’anan karqan chayta. Chaypin willanqa imakunatan allinta ruwarqan otaq imakunapi allinyanan kasqanta, ichaqa sumaq sonqollawanmi chaytaqa ninqa.
9 Escuelapi Yachay libropi 79-81 paginakunapin huk lista kashan estudianteman yanapay qosqata qelqanapaq. Huñunakuy tukuytan escuelapi umalliq sapanka estudianteq libronpi qelqanqa asignación ruwasqanta, tapunqataqmi tareata ruwarqanchu manachus chaytapas. Hinaspapas umalliqa yanapananmi imapichus allinyanan kasqanpi, chaytaqa ruwanman huñunakuy tukuytan otaq huk p’unchaykunapi. ¿Imaynatan chayta qhawarinanku escuelapi kaqkuna? Iñiyninkupi wiñanankupaq yanapayta hinan (1 Tim. 4:15).
10 Sichus estudiante mana asignasqa kasqan tiempopichu tukunqa chayqa, escuelapi umalliqmi otaq yanapaqnin huk campanachata otaq imatapas tocanqa uraykamunanpaq. Chayta uyarispa hinan plataformamanta uraykamunan (qhaway Escuelapi Yachay, pág. 282 § 4).
11 Llapa munaqkunan chay escuelapi matriculakunkuman, ichaqa Bibliaq nisqanman hinan kawsashananku (qhaway Escuelapi Yachay, pág. 282 § 6). Chay escuelan llapallanchista yanapawashanchis allin willakuykunata mana iskayaspa, respetowan, munakuywan willamunapaq yachachinapaq ima. ¡Maytachá Jehová Dios kusikun chay escuelapi tukuy yachasqanchiswan hatunchasqanchismanta! (Sal. 148:12, 13; Is. 50:4.)