Kallpachakusun aswan allin yachachiq kanapaq
1. ¿Ima ejemplokunan rikuchin aswan allin yachachiq kanapaq kallpachakunanchis kasqanta?
1 Jehová Diosmi munan sapankanchispas allin yachachiq kananchista. Chaymi Jesusqa kay pachapi kashaspa qatikuqninkunata yachachirqan aswan allinta predicanankupaq (Luc. 9:1-5; 10:1-11). Priscilapas Aquilapas Apolosmanmi “aswan sut’itapuni Diospa ñanninta yachachirqanku” allin yachachiq kananpaq (Hech. 18:24-26). Timoteoqa unayñan Diospa siminta yachachisharqan, chaywanpas apóstol Pablon nirqan aswan allin yachachiq kananpaq kallpachakunanta, chay hinapi ‘iñiypi wiñasqanta lliwpas sut’ita rikunankupaq’ (1 Tim. 4:13-15). Unayña otaq chayllaraq Diospa kamachin kashanchis chaypas, aswan allin yachachiq kanapaqmi kallpachakushanallanchis.
2. ¿Imakunatan ruwasunman aswan allin yachachiq kanapaq?
2 Allin yachachiqkunata qatikusun. Ñoqanchispas huk cristianokunaq yanapayninwanmi aswan allin yachachiq kasunman (Prov. 27:17). Chaypaqqa paykunawan predicaspan makilla uyarinanchis imayna yachachisqankuta. Tapusunmanmi imayna predicasqankumanta estudiokuna qosqankumantapas, makillataqmi uyarinanchis imachus niwasqanchista (Prov. 1:5). Sichus sasachakunchis revisitakuna ruwayta, estudiokuna tariyta chayqa, gruponchispi umallita otaq allin experienciayoq iñiqmasitan valekusunman yanapawananchispaq. Hinaspapas sapa kutillanmi Diosta mañakunanchis santo espiritunwan yanapawananchispaq (Luc. 11:13).
3. ¿Imaynatan chaskikuna huk iñiqmasiq consejonta?
3 Sichus imapipas pantarusqanchismanta huk iñiqmasi aconsejawanchis chayqa, manan phiñakunachu (Ecl. 7:9). Aswanpas Apolos hinan huch’uyyaykukuq kananchis agradecekunataqmi yanapawasqanchismanta. Chaypin rikuchisun allin yuyayniyoq kasqanchista (Prov. 12:15).
4. ¿Imaraykun allin yachachiq kanapaq kallpachakunanchis?
4 Diosta hatunchanapaqmi kanqa. Jesusmi qatikuqninkunata yanapananpaq huk rikch’anachiyta willarqan. Paytan rikch’anachikurqan uvas sach’awan, qatikuqninkunatataq chay sach’aq k’allmankunawan. Uvas sach’a ‘astawan rurunanpaqqa’ Jehová Diosmi sach’aq k’allmankunata kuchupan (Juan 15:2). Uvas chakrayoqkunaqa munankun uvas plantanku sapa kutilla askha ruruyoq kananta, Diospas munanmi allin yachachiq kaspa aswan askha runakunata yanapananchista (Heb. 13:15). ¿Imakunan kanqa allin yachachiq kaqtinchis? Jesusmi nirqan: “Allintapuni kawsasqaykichiswanmi [otaq askhata rurusqaykichiswanmi] Yayayqa hatunchasqa” kanqa, nispa (Juan 15:8).