¿Imaynatan mosoqkunata yachachisunman?
1. ¿Imaynan sientekurqanki chayllaraq predicaq lloqsispa?
1 ¿Yuyashankichu chayllaraq wasin-wasin predicasqaykita? Mancharisqachá kasharqanki. Ichaqa chaypin kasharqan yachachiqniyki otaq huk iñiqmasinchis yanapanasuykipaq. Kunanqa ñan experienciayoq predicaqña kanki, listoñataq kashanki mosoqkunata predicayta yachachinaykipaq.
2. ¿Imatan mosoqkuna yachananku?
2 Mosoq predicaqkunaqa yachanankun wasin-wasinta rispa Bibliawan predicayta, revisitakuna ruwayta, estudiokuna qoytapas. Yachanallankutaqmi callekunapi, qhatunakunapi, otaq maypi kaspapas predicayta. ¿Imaynatan paykunata yanapasunman? Ejemplota qospa, allinta yuyaychaspa ima.
3. ¿Imaynatan hukkunata ejemplonchiswan yanapasunman?
3 Ejemplonchiswan yachachisun. Jesusqa ejemplonwanmi qatikuqninkunaman yachachirqan predicayta (Luc. 8:1; 1 Ped. 2:21). Pi mosoqwanpas predicanaykipaq rimanakurqankichis chayqa, imayna predicayta qallarinaykipaq fácil rimayllata preparakuy paypas kaqllatataq rimananpaq, chaytaqa qelqanchiskunapin tarinki. Predicacionpi kashaspaqa huk otaq iskay kutita predicay pay uyarinanpaq, chaymantataq tapuy: “¿Imaniwaqmi predicasqaymanta, allintachu rimapayarqani?” nispa. Chhaynapin payqa yachanqa hukkunawan predicay ancha allinpuni kasqanta, allintataq uyarisunki imatapas yachachiqtiyki.
4. ¿Imaynatan mosoqta yanapasunman predicacionpi?
4 Sumaqta yanapay. Jesusqa yachachirqanmi qatikuqninkunata imayna predicanankupaq (Mat. 10:5-14). Qanpas kaqllatataq ruway. Mosoq predicaq rimashaqtinqa allinta uyariy. Chay wasipi predicayta tukuqtintaq imamantachá allinta rimarqan chaymanta “kusa” niy. Ichaqa ama imatapas niychu pantasqanmanta yaqapaschá huk punkupi allinta predicanqa. Manchakusqanraykupaschá pantarqan. Chaymantapas yuyariy mana llapanchischu kusa rimaq, kaq yuyayniyoq kasqanchista, hinaspapas manan hukpa imayna predicasqallanchu allin kanman (1 Cor. 12:4-7).
5. ¿Ima nispan mosoqta yanapawaq?
5 Mayninpiqa mosoq predicaqmi yanapayta mañakusunki, mana chayqa qan kikiykimanta sumaqllata yanapay. ¿Imaynata? Wakin experienciayoq iñiqmasikunan ninku: “¿Yanapaykimanchu imayna ruwanaykipaq?”, otaq “Qanpa qhawarisqaykiman hina, ¿imaynatan ruwarqanki?”, nispa. Otaq imapi pantasqanta willaspa niwaq: “Ñoqapaqpas chaymi sasa karqan chayllaraq predicayta qallarishaqtiy”, nispa; hinaspa willawaq imas yanaparqasunki chayta. Allinpunin kanqa mayninpi iskayniykichis Razonamiento librota qhawaqtiykichisqa. Ichaqa ama nishutachu niy imayna ruwananta, aswanpas hukllamanta rimay.
6. ¿Imaynatan predicacionpi Proverbios 27:17 textoq nisqanman hina ruwasunman?
6 “Fierrotaqa fierrowanmi filochanku.” Timoteoqa experienciayoq allin predicaqmi karqan, chaywanpas Pablon yuyaycharqan aswan allin yachachiq kananpaq (1 Tim. 4:13, 15). Chayllaraq predicaq lloqsisqaykimantapacha askha watakunaña pasarqan chaypas, astawanmi yachashanallayki. Yachashallay predicaqmasiykikunamanta, wakinqa pisitaña yachanku chaypas. Hinaspapas listo kashay iñiqmasikunata sumaqta yanapanaykipaq, astawanqa mosoq predicaqkunata, paykunapas kusata allin willakuykunata predicanankupaq (Pro. 27:17).