Kamaqninchisqa munakuwanchismi llakikuntaqmi noqanchismanta

1. PAYMI INTITA KAMARAN

¿Kausayta atisunmanchu inti mana kaqtin? Manan riki. Inti kaqtinmi imaymana plantakuna wiñan, t’ikarin, rurunpas. Chaymantapas Jehová Diosmi sach’akunata ruwaran saphinmanta unuta ch’onqanankupaq, chay unutaq sach’akunaq raphinkunaman chayaspa wajsiripun.

Orqo qhatapin munay q’omer sach’akuna kashan

2. PAYMI PARACHIMUN

Diosmi parataqa kamapuwaranchis. Para kaqtinmi imaymana mijuykuna wiñan. Chaymi chajrakuna tiempollanpi rurun, mijuykunapas askhan kapuwanchis, chaykunawantaq kusisqa kanchis.

Juj urpichan sach’aq k’aspinmanta jap’ipakuspa juj ruruta jap’iruyta munashan

3. DIOSMI MIJUYKUNATA P’ACHATAPAS QOWANCHIS

Askha tayta-mamakunan llakikunku mijunamanta p’achamantawan. Bibliapin niwanchis: “Allinta qhawariychis altonta phawaq animalkunata, chay animalkunaqa manan tarpunkuchu, manan cosechankuchu, manan taqena wasikunapipas mijuyta juñunkuchu. Janaq pacha Yayaykichismi chay animalkunataqa mijuchin. ¿Manachu qankunaqa chaykunamanta astawanraq valenkichis?”, nispa (Mateo 6:25, 26).

“Allinta qhawariychis campopi lirio t’ikakunaq imayna wiñasqanta; [...] Salomonpas ancha qhapaqña kashaspapas manan chay jujnin t’ika jinallapas p’achakuranchu. Chhaynatan Diosqa campopi plantakunata p’achachin; [...] ¿chaychu qankunata mana p’achachisunkichisman?”, nispa (Mateo 6:28-30).

Diosqa qowasunmanmi imakunatachus necesitasqanchista. Payta kasukusun chayqa, paymi yanapawasun qolqenchis kananpaq, llank’anata maskhaspa tarinanchispaqpas, chhaynapin imachus necesitasqanchista rantikuyta atisun (Mateo 6:32, 33).

Intipi, parapi, urpikunapi, t’ikakunapi ima piensasun chayqa astawanmi Diosta munakusun. Qatimuqpi yachasun imatan Diosninchis ruwaran runakunawan rimananpaq chayta.