Chaskiwaqmi Diospa bendicionninkunata

Jehová Diosmi Abrahanman willaran paypa miraynin “llapan ayllukunapaq samincha kananpaq” (Génesis 22:18). ¿Pin karan?

Jehová Diosmi Jesusman atiyninta qoran milagrokunata ruwananpaq, chay tiempomantaqa yaqa iskay waranqa watañan pasarun. Chay milagrokuna ruwasqanwanmi Jesusqa sut’ita rikuchiran Abrahanman Jehová Dios prometesqan paywan junt’akusqanta. Jesusqa Abrahanpa mirayninmantan karan (Gálatas 3:14).

Runakunaqa rikurankun Jesuspa milagrokuna ruwasqanta, chhaynapin yacharanku Diosqa Jesuswan llapa runakunata bendecinan kasqanta. Chay milagrokunata rikuspankun runakunaqa yacharanku jamuq tiempopi imakunatachus Jesús ruwanqa chayta. Rikuchillarantaqmi munakuq, sumaq sonqo, khuyapayakuq kasqanta.

Munakuqmi karan chaymi onqosqakunata qhaliyachiran.

Lepra onqoyniyoq runan Jesusta rogakuran: “Señor munanki chayqa, atinkin qhaliyachiwayta”, nispa. Jinan Jesusqa llamiykuspa niran: “Munanin”, nispa. Chay ratopitaq onqoyninmanta qhaliyapuran (Marcos 1:40-42).

Sumaq sonqon karan chaymi yarqasqa runakunata mijuchiran.

Jesusqa manan munaranchu runakuna yarqaymanta kanankuta. Chaymi waranqanpi runakunata mijuchinanpaq t’antatapas challwatapas askhaman tukuchiran (Mateo 14:17-21; 15:32-38). Llapankun sajsanankukama mijuranku, puchuranraqmi t’antapas challwapas.

Khuyapayakuqmi karan chaymi wañusqa runakunata kausarichiran.

Juj kutinmi juj viudaq wawanta p’ampaq apasharanku, chay viudapaqqa manañan pininpas karanchu cuidananpaq, chaymi Jesusqa chay viudata anchata khuyapayaspa wawanta kausarichiran (Lucas 7:12-15).