Jehová Diosmi cheqan ñanninta purichiwan

TAYTA-MAMAYMI YANAPAWARAN CHEQAN ÑANNINTA PURINAYPAQ

Tayta-mamayqa 1920 watakunapi jinan manaraq casarakushaspa Bibliamanta yachayta qallariranku. Noqaqa 1939 watapin Inglaterra nacionpi nacerani, chaymi juch’uychaymantapacha juñunakuykunaman rirani. Juñunakuypi Bibliata ñaupaq kaq kutipi leenaypaqqa soqta watachallaypiraqmi kasharani. Chay kutipiqa juch’uyllataq karani chayqa cajachatan churapuwaranku leenaypaq, ichaqa askha hermanokunata rikuspan manchasqa kasharani.

Pusaq watachaypi kashaqtiymi papayqa juj tarjetachata ruwapuwaran Diosmanta willanaypaq. Chay kutipiqa sapallaymi juj runaman predicarani, chaypin papaypa qowasqan tarjetata leechirani, chaymi chay runaqa “Sea Dios veraz” nisqa librota chaskikuwaran. Jinaspa kusisqa chayta papayman willarani. Chaymantapachan Diosmanta willayqa juñunakuykunaman riypas mayta gustawaq. Chaykunan yanapawaran astawan Jehová Diosta tukuy tiempoywan servinaypaq.

Papaymi inscribichiwaran Qhawaq revistata chaskinaypaq, chay revistakuna chayamuqtinqa llapallantan leerapuq kani. Chaymi yanapawaran Jehová Diospi astawan confianaypaq, chayraykun bautizakapuytapas munarani.

Tayta-mamaywanmi 1950 watapi rirayku “Diospa llaqtanmi wiñarin” nisqa asambleaman, chayqa aparikuran Estados Unidos nacionpin 3 agosto killapi. Chay asambleapin noqaqa bautizakurani 11 watachaypi kashaqtiy. Bautizakunaypaq yachachikuytan rimamuran Carey Barber hermanonchis, chaymantan payqa umalliq t’aqamanta kapuran. Chay hermanonchis llapa bautizakuqkunapaq iskay tapuykunata ruwamuqtinmi alto kunkawan “¡arí!” nispa nirani. Noqaqa manataq nadayta yacharanichu chayqa manchakuranin unuman jaykuyta, tioymi ichaqa kallpachawaran ama manchakunaypaq, jinaspan pay kikin piscinaman pusawaran. Juj hermanon bautizawananpaq unuman chinkaykachiwaran jujtaq orqomuwaran, chakiyqa manan pampamanqa tupaykullaranpaschu. Chay p’unchayqa noqapaqqa ancha importanten karan, chaymantapachan Jehová Diosqa cheqan ñanninta purichiwaran.

JEHOVÁ DIOSPI CONFIANAYPAQMI DECIDIKURANI

Colegioyta tukuruspaqa tukuy tiempoywan Diosta serviyta munasharani, profesorniykunan ichaqa tanqawaranku universidadman jaykunaypaq, chaypi estudianaypaq. Profesorniykunata kasuspan universidadpi estudiayta qallarirani. Ichaqa reparakuranin Jehová Diosta servinaypaq tiempo mana aypawasqanta, chaymi profesorniykunaman qelqarani wata tukuyllata universidadta saqenaypaq. Jinan tukuy tiempoywan Jehová Diosta servipurani.

Jehová Diostan tukuy tiempoywan serviyta qallarirani 1957 watapi Wellingborough llaqtapi. Chaymi Londres Betelpi llank’aq hermanokunata nirani allin experienciayoq hermanowan Diosmanta willanaypaq tupachiwanankuta, jinan paykunaqa Bert Vaisey hermanowan tupachiwaranku. Chay hermanoqa sumaqtan Diosmanta willanaypaq yanapawaq. Iñiq t’aqaykupiqa iskaynillaykun soqta hermanakunapiwan karayku, paykunaqa kuraqñan karanku. Pisillataq karayku chayqa yaqa llapa tapuykunamanmi noqallayku kutichiq kayku, chaykunan yanapawaran allin iñiyniyoq kanaypaq Jehová Diospi astawan confianaypaqpas.

Cuartelman mana riyta munasqayraykun carcelman wisq’awaranku. Chaymanta lloqsimuspaymi Bárbara esposayta reqsirani, paywanmi casarakurani 1959 watapi. Maymanña riychis nispa niwasunchis chayqa “yá” nispa nisunchis nispan ninakurayku. Casarakusqayku qhepamanmi Lancashire llaqtapi Jehová Diosta servisharayku. Chaymantan ichaqa 1961 watapi enero killapi nombrasqa qharikunapaq escuelaman invitawaranku, chayllamanmi watukuq umalli kanaypaq niwaranku. Jinan allin experienciayoq watukuq umalli Birmingham llaqtapi yachachiwaran watukuq umalli kanaypaq, iskay semanan chaypi esposaywan kuska kasharayku. Chaymantan ichaqa Lancashire Cheshire llaqtakunaman ripurayku Jehová Diosta serviq.

JEHOVÁ DIOSPI CONFIAYQA MAY ALLINPUNIN

Vacacionpi kashaqtiykun 1962 watapi agosto killapi sucursalmanta juj cartata chaskirayku, chaypin kasqa juj invitación Galaad escuelaman rinaykupaq. Chaymi esposaywan Jehová Diosmanta mañakuspayku chay solicitudta kaqpacha junt’arayku, jinan kaqpacha sucursalman apachipurayku. Pisqa killa qhepamanmi ichaqa Estados Unidos nacionman rirayku chunka killa Galaad escuelapi kanaykupaq, chayqa 38 clase Galaad escuelan karan.

Galaad escuelapiqa manan Bibliallamantachu yacharayku, yachallaraykutaqmi Diospa llaqtanmanta, jinallataq llapa hermanonchiskunawan imayna kawsaymantapas. Chaykamaqa manan 25 wataypipas kasharaniraqchu, ichaqa imaymanatan yacharayku juj iñiqmasinchiskunamanta. Sapa p’unchaymi Galaad escuelapi yachachiq Fred Rusk hermanonchiswan llank’arani, chayqa noqapaqqa may allinpunin karan. Chaypin yacharani jujkunata yuyaychaspaqa Bibliawanpuni yuyaychanay kasqanta. Chay escuelapiqa allin experienciayoq hermanokunaq yachachimusqankutan uyarirayku, chay hermanokunan karan: Nathan Knorr, Frederick Franz, Karl Klein jinallataq Alexander Macmillan. Macmillan hermanonchismi allinta entiendechiwaranku imaynatas 1914 watamantapacha 1919 watakama Jehová Dios llaqtanta yanapasqanta, chaykunan anchata kallpachawaranku.

JUJ LADOPI JEHOVÁ DIOSTA SERVINAYKUPAQMI NIWARANKU

Escuelata tukushaqtiykun hermano Knorr niwaranku África ladopi Burundi nacionpi Diosmanta yachachinaykupaq. Chayta niwaqtinkupachan Anuario libropi maskharayku jayk’a hermanokuna Burundi nacionpi kasqanta yachanaykupaq, ichaqa manan jujpas kasqachu. Chay llaqtamanqa manaraqmi pipas Diosmanta willaq risqakuchu. Chaymi manchasqa kasharayku, ichaqa Jehová Diospa yanapaynintan mañakurayku.

Burundi nacionpiqa francés simitan rimasqaku, chaymi chay simita yachanayku karan, costumbrenkupas jujniraymi kasqa. Iskay p’unchay chayasqayku qhepamanmi Galaad escuelamanta compañeroyku Harry Arnott chayaramusqa, paymi maskhaysiwaranku tiyanaykupaq wasita. Payqa Zambia naciontan risharan Jehová Diosta serviq. Chay nacionpi tiyaq autoridadkunaqa manan reqsirankuchu Jehová Diospa testigonkunataqa, chaymi mana munarankuchu chaypi tiyanaykuta. Niwarankutaqmi: “Sichus llank’anaykichispaq mana permisota mañakunkichischu chayqa kay nacionmantan ripunkichis”, nispa. Chaymi noqaykuqa Uganda nacionman ripurayku.

Manchasqan kasharayku Uganda nacionman jaykunaykupaq, manan karanchu permisoyku chay nacionpi kanaykupaqqa. Canadá nacionmanta hermanonchismi Uganda nacionpi Jehová Diosta servisharan, paymi yanapawaranku Uganda nacionman jaykunaykupaq. Chaymi tiempota qowaranku chay nacionpi tiyanaykupaq permisota orqonaykupaq, chaypin repararayku Jehová Diospa yanapayninta.

Uganda nacionpiqa Jehová Diosmantaqa yachachisqakuñan, chaypiqa 28 hermanokunañan kasqaku. Chay nacionpiqa wakin runakunaqa inglés simitan rimasqaku, ichaqa paykunata yachachinaykupaqqa rimasqanku simikunatapunin yachanayku karan. Chaymi luganda simita yachanaykupaq decidikurayku, chay simitan mastaqa rimasqaku Kampala llaqtaq qayllanpi tiyaq runakunaqa. Chay simitaqa unay watakunapin rimayta yacharayku, ichaqa chay simita yachasqaykun yanapawaranku chaypi tiyaq runakunata Bibliamanta yachachinaykupaq, paykunapas kusisqan kasharanku Jehová Diosmanta yachaspa.

LLAQTAN-LLAQTANTA VISITASQAYKU

Kusisqan Diosmanta runakunaman yachachisharayku. Chayllamanmi niwaranku Kenia sucursalmanta watukuq umalli jina chay nacionpi llapa llaqtakunaman visitanaykupaq, maypichus chay llaqtakunapi allinta Jehová Diosmanta uyarikunku chay llaqtakunaman precursor especialkunata kachanaykupaq ima. Chay llaqtakunapi tiyaqkunaqa sumaqtan wasinkupi chaskiykuwaqku, mijunata imaraqmi wayk’upuwaqkupas.

Chaymantaqa iskay p’unchaymi jujmanta viajallaranitaq Kampala llaqtamanta Kenia nacionpi kaq Mombasa llaqtakama, chaymantataq barcopi rirani Seychelles islakama. Chaymantan ichaqa 1965 watamanta 1972 watakama esposaypiwan kuska chay islakunamanqa watukuq umalli jina chayarayku. Chaypiqa kasqaku iskay hermanonchiskunallan, tiempowanqa pisi-pisimantan chaypiqa juj iñiq t’aqa kapuran. Chaymantapas jujmantan viajallaraykutaq watukuq umalli jina Eritrea, Etiopía, Sudán nacionkunaman, iñiqmasinchiskunata watukuq.

Uganda nacionpin militarkuna gobierno contra jatarispa paykuna kamachikuyta qallaripuranku, jinan juj llaqtayoq runakunata llapaykuta niwaranku inscribikunaykupaq, chayta kasukuspan noqaykuqa inscribikuraykupacha. Iskay kinsa p’unchay qhepakunamanmi Kampala llaqtapi juj hermanowan carropi risharayku, chayllamanmi policiakuna sayachiwaranku. Chaypin niwaranku: “Ima yachaqchá qankunaqa kayta jamushankichis”, nispa, jinan puestoman apawaranku. Chaypin paykunata nirayku: “Noqaykuqa Diosmanta willaqllan kayku, jinaspapas inscribikuykuñan”, nispa. Chayta niqtiykuqa manan creewarankuchu, jinan juj puestomanñataq apawaranku. Chay puestopin juj policía reqsiruwaranku, paymi niran: “Arí, paykunaqa inscribikunkuñan”, nispa, chaymi kacharipuwallaranku. Chaypin repararani Bibliaq nisqan jina may allinpuni kamachikuqkunata kasukuy kasqanta (Mar. 12:17).

Chay tiempopiqa sapa kutinmi carreteranta viajaqtiyku militarkuna sayachiwaqku, jinaspapas mayninpiqa machasqa iman suyawaqku, chaymi Jehová Diosllamanta mañakuq kayku. Jinan chay militarkunaqa kacharipuwallaqku, chayraqmi thaj karayku. Chaymantan 1973 watapi llapa waj llaqtayoqkunata qarqopuwaranku Uganda nacionmanta.

Chaymantan niwaranku África ladopi kaq Costa de Marfil nacionman rinaykupaq, chaypi runakunaqa jujniray costumbreyoqmi karanku, chaymanñataqmi yachakunayku karan. Jinaspapas jujmantan yacharayku francés simita, chaypiqa juj nacionmanta hermanokunawan kuskan tiyarayku. Chay nacionpi runakunaqa sumaqtan uyarikuqku Diosmanta willasqaykuta, repararaykutaqmi Jehová Diospa yanapayninta, Jehová Diosta kasukuyqa may allinpuni kasqantapas. Chhaynatan Jehová Diosqa cheqan ñanninta pusawaranku.

LLAKIKUYKUNAPI TARIKUYKU

Llakikuykunapin tarikurayku, Bárbara esposaymi cancerwan onqopuran. Chaymi jampichikunanpaq askha kutita Europa ladoman rirayku, ichaqa 1983 watapin astawan onqorapuran. Chaymi Africamanta ripurayku, may llakisqapunin chaymantaqa ripurayku.

Londres Betelpi kashaqtiykun esposayqa astawan onqorapuran, jinaspa wañukapuran. Betelpi kaq hermanokunan yanapawaran chay llakikuyniyta aguantanaypaq. Casarasqa hermanokunan sumaqta kallpachawaranku astawan Jehová Diospi confiashanallaypaq. Tiempowanmi ichaqa 1989 watapi Ann hermanawan casarakapurani, payqa Betelpin yanapakushasqa, ñaupaqpin ichaqa precursora especial jina yanapakusqa. Payqa tukuy sonqonwanmi Jehová Diosta munakuran, chaymantapachan Londres sucursalpi Jehová Diosta servirayku.

Umalliq t’aqaq rantinpin 1995 watamanta 2018 watakama yaqa 60 nacionkunata visitarani. Chaypin sut’ita repararani ima llakipiña tarikuqtinchispas Jehová Diosqa yanapawasqanchista.

Ann esposaywanmi 2017 watapi África ladota visitarayku Burundi nacionta. Chaypin ñaupaqqa 1964 watapi Jehová Diosmanta willaspa purirani. Chay predicasqay callepin kunanqa munay Betel wasi kashan, chaymantapachan 15.500 hermanokunata yanapashanku.

Juj nacionkunatapas visitanaykupaqmi 2018 watapi niwallarankutaq, chaypin repararani Costa de Marfil nacionta visitanaypaq. Chayta yachaspaqa kusisqan kasharani, Abiyán llaqtamanqa wasiyman jinan chayarani. Betelman chayaspan hermanokunaq telefononta qhawasharani, jinan tarirani Sossou sutita. Chayta tarispan nirani: “Paytaqa reqsinimá, manachu pay kay llaqtapi watukuq umalli jina kasharan”, nispa. Ichaqa manan paychu kasqa, wawanmi kasqa.

Sasachakuykunapi tarikusqaymi yanapawaran Jehová Diospi astawan confianaypaq, paymi yanapawaran cheqan ñanninta purinaypaq. Chaymi kunanqa decidisqa kashani wiñay kausayman apaq ñanninta purishanallaypaq (Prov. 4:18).