Leeqkunaq tapukusqan
¿Allinchu kanman casarakuyta munaspa internetpi piwanpas reqsinakuy?
Jehová Diosqa munanmi casarasqa warmi-qhariqa kusisqa wiñaypaq kausanankuta (Mat. 19:4-6). ¿Casarakuytachu munashanki? Chhayna kaqtinqa, ¿iman yanapasunkiman allin esposata otaq allin qosata tarinaykipaq? Jehová Diospa kamachikuyninkunan yanapasunkiman. Jehová Diostaq kamawaranchis chayqa allintan yachan imas allin noqanchispaq imas mana allinchu chayta. Chaypaqmi imaymana yuyaychaykunata qowanchis. Chaykunamanta kunan yachasunchis.
Biblian niwanchis: “Runaq sonqonqa tukuy imamantapas aswan q’otukuqmi, millay ruwaqtaq kanpas, ¿pitaq chay sonqotari reqsinman?”, nispa (Jer. 17:9). Bibliaq nisqan jina sonqoqa q’otukuqmi, chaymi pipas casarakuyta munaspaqa allinta piwanpas ñaupaqtaqa reqsinakunan. Chhaynapi imaynapunichus kasqanta allinta yachanankupaq, manataqmi sonqonkuq munasqanman jinachu imatapas ruwananku (Prov. 28:26). Chaymi piwanpas chayllaraq reqsinakushaspaqa mana imatapas prometenakushanachu nitaq casarasqa warmi-qhari jinaqa imatapas ninakushanachu.
Proverbios 22:3 nin: “Yuyayniyoqqa mana allin kaqtan reparan jinaspan pakakun, pisi yuyayniyoqkunan ichaqa pasallanku jinaspan k’irisqa rikukapunku”, nispa. Sichus casarakuyta munaspa internetpi parejata maskhasunman chayqa mana allinkunapin tarikusunman. Chhaynapin askha wayna sipaskuna tarikuranku. Internetpiqa millay runakunan kan; wakinqa runamasinkutan engañanku suwanku ima, wakintaq “testigon kani” nispa llullakunku.
Chaymantapas wakin runakunaqa internetpin imaymana programakunata churanku parejata tarinapaq. Ichaqa, ¿allinchu kanman chay programakunapi confiay? Icha ¿Jehová Diosllapichu confiananchis? (Prov. 1:7; 3:5-7.)
Proverbios 14:15 nin: “Pisi yuyayniyoqqa tukuy uyarisqantan creen, yuyayniyoqmi ichaqa thaskisqankunata allinta qhawan”, nispa. Chaymi piwanpas casarakuyta munaspaqa allintaraq piwanpas reqsinakuna. Ichaqa internetpiqa manan pitapas allintaqa reqsiyta atisunmanchu, sapa p’unchayña paywan rimashasunman chaypas manapunin allintaqa reqsisunmanchu. Askha runakunan piensaranku internetpi rimasqanku runawan allinta reqsinakushasqankuta, ichaqa tuparuspanraqmi repararanku mana chhaynachu kasqanta.
Salmos 26:4 nin: “Manan ch’achu runawan tiyanichu, manan iskay uyakunawanpas juñunakunichu”, nispa. Internetpi runakunaqa manan sut’itapunichu willakunku pipunichus imaynapunichus kasqankuta. Wakinqa yaqapaschá llullakusparaq ninkuman: “Testigon kani”, nispa. Ichaqa, ¿testigopunichu kanku? Testigoña kankuman chaypas, ¿allin cristianochu kanku? ¿Jehová Diospa munasqanman jinapunichu kausanku? ¿Allin cristianota jinachu iñiq t’aqanpipas payta qhawarinku? (1 Cor. 15:33; 2 Tim. 2:20, 21.) Chaymantapas, ¿solteropunichu kanku, solterapunichu kanku? Casarakunankupaqpas, ¿librepunichu kashanku? Sichus internetnillanta pitapas reqsisunchis chayqa manan pitapas allintapuniqa reqsisunmanchu, manan pitapas paymantaqa tapurikuyta atisunmanchu (Prov. 15:22). Jinaspapas manapunin munasunmanchu Diosta mana serviq runawan casarakuytaqa (2 Cor. 6:14; 1 Cor. 7:39).
Bibliaq nisqan jina, manapunin allinchu internetpi parejata maskhayqa. Ichaqa, ¿maypin tarisunman allin esposata otaq allin qosatapas? Juñunakuykunapi, asambleakunapi otaq iñiqmasinchiskunawan kuska kaspapas.
Allinta reqsinakuspaqa reparanqakun imayna runa kasqankuta imaynata Jehová Diosta serviyta munasqankutapas
Kunanqa kay onqoykuna kasqanraykun internetninta juñunakushanchis. Chaywanpas solterokunaqa atinkumanmi jujkunawan reqsinakuyta. Chay juñunakuykunapin solterokunaqa qhawarinkuman imaynatas tapuykunaman kutichishan chayta, Dios sonqopunichus kashan icha manachus chaytapas (1 Tim. 6:11, 12). Chaymantapas juñunakuy pasaytan rimallankumantaq, chaytaqa ruwankuman iñiq t’aqapi parlanankupaq juch’uy t’aqachakunata ruwaqtinkun. Otaq yaqapaschá reqsinakullankumantaq iñiq t’aqapi hermanokuna internetpi kuska imatapas ruwanankupaq juñunakuqtinku. Chay juñunakuykunapin allinta qhawarinanku imayna cristianochus kasqanta, imaynata jujkunatapas tratasqanta (1 Ped. 3:4). Chaymantapas qhawarinanmi pay jinachus kallpachakushan Diosta astawan servinanpaq chayta, kuska tiyaspapas tupachinkumanchus icha manachus chaytapas.
Sichus solterokuna Jehová Diospa kamachisqanman jina parejata maskhanqaku chayqa kusisqan casarakuspaqa kausanqaku. Bibliapas ninmi: “Allin warmiwan [otaq allin qhariwan] casarakuqqa allinkaqtan tarin, Señor Diospa allin qhawarisqantaqmi kanpas”, nispa (Prov. 18:22).