1921: Pachaj wata ñaupaqta

LLAPA iñiqmasinchiskunatan 1921 watapi enero killamanta Qhawaq revistapi kallpachakuran Jehová Diosmanta astawan willamunankupaq. Chaytaqa ruwananku karan Isaías 61:1, 2 textokunapi nisqanman jinan. Chaypin nishan: “Señor Diospa espiritunmi junt’aykushawan, paymi ajllakuwaspa jawiwaran wajchakunaman allin willakuykunata willanaypaq [...]. Kachamuwaranmi llaqtanta khuyapayanan p’unchay chayamunanta willanaypaq, auqanchiskunaman paypa ayni-kutichinan p’unchay jamunantawan willanaypaq”, nispa.

MANA MANCHAKUSPA DIOSMANTA WILLAQKUNA

Iñiqmasinchiskunaqa mana manchakuspan Diosmanta willananku karan. Ichaqa manan allin willakuykunallatachu willananku karan, millay runakuna wañuchisqa kanankumantawanmi willananku karan.

Canadá nacionmanta John Hoskin hermanonchisqa jark’akushaqtinkupas mana manchakuspan Diosmanta willashallaran. Chaymi hermanonchisqa 1921 watapi metodista religionmanta umalliqman Diosmanta willasqa. Jinan chay umalliqta nisqa: “Manaña Diosmanta igualtachu piensanchis chaypas mana discutispallan sumaqllata rimananchis”, nispa. Ichaqa pisillataraq rimashaqtinkus metodista religionmanta umalliqa sinchita phiñakuspa punkuta fuerteta wisq’arparimusqa, chaysi hermanoqa piensasqa punku p’akikunanpaqraq.

Chaymantas chay runaqa hermanonchista phiñarikuspa nisqa: “¡Pasay Diosmanta mana yachaq runakunaman willamuy!”, nispa. Hermanonchisqa manas imatapas kutichisqachu sonqollanpis nisqa: “Chaytamá ruwashani riki”, nispa.

Hermanonchismi nillarantaq: “Chay religionmanta umalliqqa yanqanmantan imaymanata runakunaman willaykuran, jinan chay runakunaqa wañuchiytaraq munawaranku”, nispa. Wañuchiytaña hermanonchista munaranku chaypas, Jehová Diosmantan mana manchakuspa kusisqa willashallaran. Wakin runakunaqa Diosmanta willasqantaqa tukuy sonqowansi uyarikusqaku imaymanapitaqsi yanapasqakupas.

FAMILIANTIN OTAQ SAPALLANCHISPI BIBLIATA ESTUDIAY

Diosmanta yachay munaq runakunata yanapanankupaqmi hermanonchiskunaqa Rijch’ariy nisqa revistapi Bibliata estudianapaq programata orqomuranku (chay tiempopiqaThe Golden Age nikuranmi).a Chay programaq sutinmi karan “Estudio bíblico para los jóvenes” nisqa, chay programapiqa imaymana tapuykunan karan. Wakin tapuykunan kaykuna: ¿Jayk’a librokunan Bibliapi kan? ¿Qatiykachasqapunichu Diosta serviqkuna kananku karan? Chay tapuykunawan yanapachikuspan tayta-mamakunaqa Bibliamanta allinta wawankuman yachachiqku, chhaynapi paykunapas mana manchakuspa Diosmanta willanankupaq.

Chaymantapas kallarantaqmi “Estudios avanzados sobre el Plan Divino de las Edades” nisqa programa. Chay programapiqa tapuykunan kallarantaq Bibliata astawan entiendenapaq, chay tapuykunaqa orqosqa karan Estudios de las Escrituras nisqa libromantan, chaykunawanmi hermanonchiskunaqa yanapachikuranku. Ichaqa 1921 watapi 21 diciembre killapin Rijch’ariy revistapi willakuran manaña chay iskaynin programakuna lloqsimunanpaq, ¿imaraykun chay cambiokuna ruwakuran?

MOSOQ LIBRON LLOQSIMURAN

“Diospa arpan” libro inglés simipi

Libropi ima paginakunata leenapaq tarjeta

Askha tapuykunayoq tarjeta

Hermanonchiskunaqa munarankun Diosmanta yachay munaq runakuna Bibliapi yachachikuykunata facil-llata entiendenankuta. Chaymi 1921 watapi noviembre killapi “Diospa arpan” nisqa libro inglés simipi lloqsimuran, 1925 watapitaq castellano simipi lloqsimuran. Chay librota chaskikuq runakunaqa chay librowanmi paykunalla Bibliata estudianku karan, ichaqa paykunatan anotaqku. Chay librota estudiaspan entiendenanku karan Jehová Diosqa llapa runakunata wiñaypaq kausanankuta munasqanta. ¿Imaynatan chay librowan estudiaqku?

Pipas chay librowan estudiayta munaqqa juj tarjetatawanmi chaskiq, chaypin willaq ima paginakunatan estudianqa chayta. Qatiqnin semanapitaq juj tarjetata chaskillaqtaq askha tapuykunayoqta, chay tarjetaq tukuyninpin willallarantaq ima paginakunatan qatiqnin semanapi leenqa chayta.

Iñiq t’aqamanta hermanokunaqa chay librota estudiaq runamanmi kinsa killa jina sapa semanan chay tarjetakunata apachiqku. Chaytaqa kuraq hermanonchiskunan otaq ima onqoywanpas kaq hermanonchiskunan apachiqku. Estados Unidos nacionmanta hermananchis Anna Gardner willakun: “Ñañay Thayle manaña puriyta atiranchu chaypas sapa semananmi chay tarjetakunata runakunaman apachiq”, nispa. Chay librota estudiayta tukuqtinkutaqmi mayqen hermanopas Bibliamanta astawan yachachinanpaq visitaq.

Hermananchis Thayle Gardner silla de ruedaspi kashan

DIOSMANTAQA ASTAWANMI WILLASHANALLANCHIS

Joseph Rutherford hermanonchismi llapa iñiq t’aqakunaman cartata apachiran, chay cartapin khaynata niran: “Kay watapin Diosmanta willasqanchisqa astawan yapakushan qayna watakunamantaqa, chaymi astawanraq Diosmantaqa willashanallanchis, jujkunatapas kallpachananchismi Diosmanta astawan willashanallankupaq”, nispa. Chay cartapi nisqantan llapa hermanokunaqa kasukuranku, chaymi 1922 watapiqa astawanraq Jehová Diosmanta mana manchakuspa willaranku.

Llaki tiempopi yanapakuq amigokuna

Kay tiempopi hermanokunapas jujkuna-jujkunawan munanakusqankutan rikuchiranku. Chaymi paykunaqa ‘llaki-phutiy tiempopipas’ yanapanakuranku (Prov. 17:17).

Estados Unidos nacionpin Tulsa llaqtapi, 1921 watapi 31 mayo p’unchaypi waranqa más yuraq runakuna yana runakunawan maqanakuranku. ¿Imaraykun chay ch’aqway jatariran? Juj yana runas juj yuraq warmita maqarapusqa. Greenwood barriopin yana runakunaqa tiyaranku, chaymanmi yuraq runakunaqa phawaykuranku jinaspa wasinkutapas negocionkutapas lliuta suwapuranku. Llapanpiqa 1.400 wasikunata negociokunata iman suwapusqaku, 36 runakunatataq wañuchipusqaku. Ichaqa maspaschá wañuranku chaytaqa manan allintachu yachakun.

Greenwood barriopin Richard Hill hermanonchisqa tiyaran. Paymi willakun: “Ch’aqwaykuna jatarisqan tutapiqa Bibliata estudianapaq juñunakuypin kasharayku. Llaqta ukhupiqa sinchi ch’aqwaymi uyarikamusharan, balakunapas t’ojamusharan. Jinallapin noqaykuqa puñurapusqayku. Qhepantin p’unchaytaqa astawanraqmi chay ch’aqwayqa jatariran. Chaymi vecinokunaqa niwaranku Tulsa llaqtaq teatrinninman pakakuq rinaykupaq”, nispa. Chaymi Richard hermanonchisqa esposanpiwan pisqantin wawankunapiwan Tulsa llaqtaq teatrinninman ripusqaku. Chaypiqa 3.000 yana runakunatan guardiakuna pakasqaku gobiernoq kamachisqan.

Arthur Claus hermanonchis yuraq runaña karan chaypas, Richard hermanoq wasintan watukuq riran. Paymi nin: “Imayna amigoy kashasqantan yachaytapuni munasharani”, nispa.

Arthur Claus hermanonchismi 14 waynachakunaman “Diospa arpan” librowan yachachiran

Richard hermanonchispa wasinman chayaspas Arthur hermanonchisqa juj yuraq runata rikusqa, chay runaqa armantinsi Richard hermanonchispa wasinta cuidashasqa. Jinan hermanonchista wasi patiopi rikuruspa nisqa: “¡Pin kanki, imatan kaypi ruwashanki!”, nispa.

Chaymi Arthur hermanonchisqa sumaqllata chay runataqa kutichisqa: “Richardqa amigoymi, imayna kashasqanta yachaqmi jamushani. Noqaqa jamullanipunin payta visitaqqa”, nispa. Jinan iskayninkumanta hermanonchispa wasinta cuidaranku.

Vecinokunan Arthur hermanotaqa nisqaku Richard hermanonchisqa Tulsa llaqtaq teatrinninpi pakakushasqanta. Ichaqa Richard hermanonchista orqonanpaqqa juj permisotaraqmi mañakunan karan, chaymi Arthur hermanonchisqa capitanta maskhaq risqa. “Richard amigoytan apakapusaq” niqtintaq capitanqa nisqa: “¿Qanchu paykunata cuidanki ima necesitasqantapas qonki?”, nispa. Jinan hermanonchisqa nisqa: “Arí, noqan paykunataqa cuidasaq”, nispa.

Capitanpa qosqan permisowanmi hermanonchis Arthurqa Tulsa llaqtaq teatrinninman risqa. Jinan capitanpa qosqan permisota oficialman qhawachiqtin oficialqa nisqa: “¡Capitanpunimá kaytaqa firmasqasunki! Manan pipas yana runakunata yanapaqqa jamunraqchu. Qanllapunin jamurunki”, nispa. Jinan oficialqa Richard hermanonchista maskhaspa pusamuran. Chaymantataq Arthur hermanonchisqa carronpi Richard hermanonchista familiantawan wasinman apapuran.

Hermanonchis Arthurqa Richard hermanonchistapas familiantapas sumaqtan cuidaran, ima necesitasqankutapas qoran. Chayta rikuspan chay llaqtapi tiyaq runakunaqa Diospa llaqtanta allinpaq qhawaripuranku. Arthur hermanonchismi nin: “Richard hermanonchispa wasinta cuidaq vecinopas Diosmanta willasqanchistaqa sumaqtan uyarikapun. Juj runakunapas sut’itan rikuranku yana runaña yuraq runaña kanchis chaypas munanakusqanchista, Diospa llaqtanpiqa igual-lla llapapas kasqanchista”, nispa.

a Rijch’ariy revistan 1932 watapi Luz y Verdad sutiwan castellanopi lloqsimuran, 1937 watapitaq Consolation sutiwan inglespi cambiakuran, 1938 watapitaq Consolación sutiwan castellanopi cambiakuran, 1946 watapitaq ¡Awake! sutiwan inglespi cambiakuran, 1947 watapitaq ¡Despertad! sutiwan castellanopi cambiakapuran.