¿Imakunata ruwaymi yanapawasunman ama nishuta llakipakunanchispaq?

NISHUTA llakipakuspaqa pisikallpayasunmanmi (Prov. 12:25). Mayninpiqa imaymana sasachakuykunapi tarikuspan sinchita llakipakusunman, jinaspa nisunman: “Manañan kallpay kanñachu, manañan ima ruwaytapas atiniñachu”, nispa. Ichaqa ama pisikallpayaychu, llapanchismi mayninpiqa imaymanamanta llakipakunchis. Wakinninchisqa yaqapaschá llakipakusunman mayqen familianchispas onqopusqanrayku, paykunata cuidayqa sasapaschá kanman. Chaymantapas llakipakusunmanmi mayqen familianchispas wañukapusqanrayku, otaq ima llakipipas tarikusqanchisrayku. Chhaynaqa, ¿iman yanapawasunman sasachakuykunapi tarikuspa ama nishuta llakipakunanchispaq?a

Rey Davidmanta yachaymi yanapawasun ama nishuta llakipakunanchispaq. Payqa imaymana sasachakuykunapin tarikuran, wañuchiytaraqmi munarankupas (1 Sam. 17:34, 35; 18:10, 11). Chhaynaqa, ¿imakunata ruwaymi Davidta yanaparan sasachakuykunapi tarikuspa ama nishuta llakipakunanpaq? ¿Imaynatan paymanta yachay yanapawasunman ama nishuta llakipakunanchispaq?

¿IMAKUNATA RUWAYMI DAVIDTA YANAPARAN AMA NISHUTA LLAKIPAKUNANPAQ?

Davidqa imaymana sasachakuykunapin tarikuran. Paytaqa rey Saulmi wañuchiyta munaran, chaymi paymanta ayqekuran. Chaymantapas Davidwan runankunapiwan maqanakuq rinankukaman enemigonkunaqa tiyasqanku llaqtata q’alata kanayapuranku, esposankutapas wawankutapas presotan apapuranku. Chayta rikuspan Davidpas runankunapas mana atinankukama khuyayta waqaranku. Chhayna llakipi tarikuspan runankunaqa Davidta rumiwan ch’aqespa wañuchiyta munaranku (1 Sam. 30:1-6). Chhayna sasachakuykunapi tarikuspaqa anchatachá Davidqa llakikuran.

¿Imatan David ruwaran chhayna sasachakuykunapi tarikuspa? Jehová Diospa yanapaynintan mañakuran. Davidqa mañakullaqpunin Jehová Diosmantaqa, chaymantapas yuyaymanaqmi imaynatas Jehová Dios ñaupaqpi yanaparan chayta (1 Sam. 17:37; Sal. 18:2, 6). Davidqa yacharanmi Jehová Diospa yanapaynillanwan ima sasachakuykunatapas atipananta. Chaymi payqa Jehová Diospa yanapayninta maskharan. Jehová Diosqa Davidtan niran enemigonkunata qatipananpaq. Jinan Davidpas runankunapas enemigonkunata qatipaspa esposankuta, wawankuta, imaymana kaqninkutawan kutichikampuranku (1 Sam. 30:7-9, 18, 19). Chhaynaqa, ¿imakunata ruwaymi Davidta yanaparan ama nishuta llakipakunanpaq? Kinsa ruwaykunan yanaparan. Ñaupaqta) Jehová Diosmanta mañakuran. Iskaypi) yuyaymanaqmi imaynatas Jehová Dios ñaupaqpi yanaparan chayta. Kinsapi) Jehová Diospa kamachisqanta kasukuran. ¿Imakunatan noqanchispas ruwananchis David jina ama nishuta llakipakunanchispaq?

¿IMAKUNATA RUWAYMI DAVIDTA JINA YANAPAWASUNMAN AMA NISHUTA LLAKIPAKUNANCHISPAQ?

Jehová Diosmantan mañakunanchis. Imamantapas llakipakuspaqa Jehová Diospa yanapaynintan mañakunanchis. Chaymi yanapawasun imatapas allin yuyaywan ruwananchispaq. Jehová Diosmanqa llapa sasachakuyninchiskunatan willakunanchis. Pisitaña otaq sonqollanchispiña mañakusunman chaypas payqa uyariwasunpunin. Chayta ruwaspan rikuchinchis David jina Jehová Diospi confiasqanchista. Paymi niran: “Señor Diosqa jatun Qaqaymi, pakaykuwaqniymi, qespichiwaqniymi, Diosniyqa pakakunay Qaqan, payqa escudo jina jark’aykuwaqniymi, atiyniyoq qespichiwaqniymi, ancha jatun pakakunaymi”, nispa (Sal. 18:2). Jehová Diosmanta mañakuyqa anchatapunin yanapawanchis. Chaytan tukuy tiemponwan Jehová Diosta serviq Kahlia hermananchispas nin: “Jehová Diosmanta mañakusqay qhepamanqa thajmi kani. Jehová Diosmanta mañakuymi yanapawan pay jina piensanaypaq, paypi astawan confianaypaq ima”, nispa. Chhaynaqa Jehová Diosmanta mañakushallasun ama nishuta llakipakunanchispaq.

Jehová Diospa yanapawasqanchispin yuyaymanananchis. Jehová Diosqa ñaupaqmantapachan imaymanamanta yanapawashanchis. Chaykunapi yuyaymanaymi yanapawasun ama nishuta llakikunanchispaq. Chaymantapas yuyaymanananchismi imaynatas Jehová Dios ñaupaqpi pay sonqo runakunata yanaparan chayta (Sal. 18:17-19). Juj iñiq t’aqamanta Joshua umalliqmi nin: “Jehová Diosmanqa paypayman jinan imachus necesitasqayta llapanta willakuni. Payqa imaymanamantan mañakusqayman kutichimuwan. Chaykunapi yuyaymanaymi yanapawan paypi astawan confianaypaq”, nispa. Sichus kallpachakusun Jehová Diospa yanapawasqanchispi yuyaymanananchispaq chayqa manan imamantapas nishutachu llakipakusun.

Jehová Diostan kasukunanchis. Manaraq imatapas ruwashaspaqa Bibliatan allinta estudiananchis. Chayta ruwaymi yanapawasun allin yuyaywan imatapas ruwananchispaq (Sal. 19:7, 11). Wakin hermanonchiskunaqa kallpachakunkun Bibliapi juj versiculoq nisqanta allinta t’aqwinankupaq. Chayta ruwaymi paykunataqa yanapan Bibliaq nisqanman jina imatapas ruwanankupaq. Juj iñiq t’aqamanta Jarrod umalliqmi nin: “Noqaqa kallpachakunin Bibliapi juj versiculoq nisqanta allinta t’aqwinaypaq. Chayta ruwaymi yanapawan Jehová Diospa piensasqanta allinta entiendenaypaq, chhaynapi paypa munayninman jina imatapas ruwanaypaq”, nispa. Sichus kallpachakusun Bibliata allinta estudiananchispaq chaypi nisqantapas kasukunanchispaq chayqa manan imamantapas nishutachu llakipakusunchis.

JEHOVÁ DIOSMI YANAPAWASUN AMA NISHUTA LLAKIPAKUNANCHISPAQ

Davidqa Jehová Diospa yanapayninwanmi imaymana sasachakuyninkunata atiparan. Chayraykun Jehová Diosta niran: “Kallpaykiwanmi llaqta perqaman seqani”, nispa. Nillarantaqmi: “Diosmi kallpachawaqniyqa, paymi ñanniyta allichan”, nispa (Sal. 18:29, 32). Sinchi jatunña sasachakuyninchiskuna kanman chaypas Jehová Diospa yanapayninpin confiananchis. Paypa yanapayninwanqa atipallasunmi ima sasachakuytapas. Chhaynaqa ima sasachakuypipas tarikuspaqa Jehová Diosmantan mañakunanchis, jinaspapas yuyaymanananchismi imaynatas ñaupaqpi yanapawaranchis chayta. Chaymantapas Bibliatan allinta estudiananchis, jinaspa chaypi nisqanta kasukunanchis. Sichus chaykunata ruwasunchis chayqa Jehová Diosmi yanapawasunchis allin yuyaywan imatapas ruwananchispaq, ama nishuta llakipakunanchispaq ima.