Dios sonqo angelkunata qatikusun

1, 2. a) ¿Imakunapin jujniray kanchis angelkunamanta? b) ¿Imakunapin angelkunawan yaqa igual-lla kanchis?

JEHOVÁ Diosqa familianmanta kananchispaqmi kay llaqtanman pusamuwarqanchis. Chay familiapiqa munay kausaymi, sumaq kausaymi kan. Ichaqa manan runakunallachu chay familian ukhupiqa kashanchis, angelkunapas paypa familian ukhupin kashanku (Dan. 7:​9, 10). Ichaqa angelkunapi piensaspaqa yaqapaschá nisunman: “Paykunaqa noqanchismanta jujniraymá kanku”, nispa. Cheqaqmi chayqa, paykunaqa noqanchismanta aswan ñaupaqtaraqmi kamasqa karqanku (Job 38:​4, 7). Chaymantapas paykunaqa noqanchismanta aswan atiyniyoqmi kanku, ch’uya mana ima juchayoqtaqmi kankupas. Arí, paykunaqa manan noqanchis jina juchasapachu kanku (Luc. 9:26).

² Chaywanpas angelkunawanqa imaymanapin yaqa igual-lla kanchis. Paykunapas noqanchis jinan Jehová Dios imayna kasqanta qatikunku, noqanchis jinan libre kanku Diosta servinankupaq mana servinankupaqpas, chaymantapas sutiyoqmi kanku. Noqanchis jinan paykunapas imaymanata ruwaspa Jehová Diosta servinku. Chaymantapas paykunaqa noqanchis jinan kamaqninchis Jehová Diosta adoraspa kusisqa kanku (1 Ped. 1:12).

3. ¿Imakunatan yachasunman Dios sonqo angelkunamanta?

³ Angelkunawanqa imaymanapitaq yaqa igual-lla kanchis chayqa paykunaq ejemplonqa imaymanapin yanapawasunman. Kaypin yachasun imaynatas paykuna jina humilde sonqo kasunman, imaynatas paykuna jina jujkunata munakusunman, imaynatas paykuna jina aguantaq kasunman, imaynatas paykuna jina yanapakusunman Diospa llaqtanpi ch’uya kausay kananpaqpas chaykunamanta.

ANGELKUNAQA HUMILDE SONQON KANKU

4. a) ¿Imaynatan angelkuna rikuchinku humilde sonqo kasqankuta? b) ¿Imaraykun paykuna chhayna humilde sonqo kanku? (Salmos 89:7).

⁴ Angelkunaqa imaymanapiña allin experienciayoq kanku chaypas, atiyniyoqña, yachaysapaña kanku chaypas humilde sonqon kanku. Diospa nisqanman jinataqmi imatapas ruwanku (Sal. 103:20). Ichaqa Jehová Diospa ima kamachisqantapas ruwaspaqa manan chaywanqa alabakunkuchu, nitaqmi runakunamanta aswan atiyniyoq kasqankuwanpas creekunkuchu. Aswanmi paykunaqa manaña sutinku yachakunchu chaypas, k’umuykukuywan kusisqa ima Jehová Diosta servinku (Gén. 32:​24, 29; 2 Rey. 19:35).a Chaymantapas paykunaqa manan jujkunaq jatunchasqan kanantaqa munankuchu. ¿Imaraykun paykuna chhayna humilde sonqo kankuman? Jehová Diosta munakusqankuraykun, payta respetasqankuraykun (leey Salmos 89:7).

5. ¿Imaynatan juj ángel apóstol Juanwan rimashaspa rikuchirqan humilde sonqo kasqanta? (Qhaway kay parrafopaq dibujota).

⁵ Imaynatachus juj ángel humilde sonqo kasqanta rikuchirqan chayta qhawarisun. 96 watapi jinan juj ángel apóstol Juanman ancha jatun rijuriykunata rikuchirqan, ichaqa manan yachakunchu pichus chay ángel karqan chaytaqa (Apo. 1:1). ¿Imatan apóstol Juan ruwanman karqan llapa chaykunata rikuspa? Chay angelpa ñaupanmanmi qonqoriykukurqan payta adorananpaq. Chay angelmi ichaqa nirqan: “¡Imatan ruwashanki! ¡Ama chayta ruwaychu! ¡Diosllatan adoranayki! Noqaqa kamachimasillaykin kani”, nispa (Apo. 19:10). Rikusqanchis jina chay angelqa k’umuykukuq humilde sonqon karqan. Payqa manan munarqanchu jatunchasqa kaytapas ni alabasqa kaytapas. Aswanmi nirqan: “Diosllatan adoranayki”, nispa. Chaymantapas payqa unayña Jehová Diosta servisharqan chaypas, Juanmanta aswan atiyniyoqña karqan chaypas, manan paymanta aswan jatunpaqchu qhawarikurqan, aswanmi nirqan: “Noqaqa kamachimasillaykin kani”, nispa. Juanta yuyaychaspapas manan phiñasqachu ni k’araq simikunawanchu chayta nirqan. Aswanmi sumaqllata, munayllata rimapayarqan. Payqa allintachá repararqan imaynas Juanqa admirasqa kaspa chayta ruwasharqan chayta.

6. ¿Imaynatan rikuchisunman angelkuna jina humilde sonqo kasqanchista?

⁶ ¿Imaynatan rikuchisunman angelkuna jina humilde sonqo kasqanchista? Diospa llaqtanpi ima llank’anatapas ima ruwanatapas chaskispaqa, manan jatunchakuq jinachu ni alabakuq jinachu imatapas ruwananchis (1 Cor. 4:7). Chaymantapas manan Jehová Diosta unayta servisqanchisraykuchu ni ima llank’anatapas chaskisqanchisraykuchu jujkunamanta jatunpaq qhawarikunanchis. Aswanpas Jesuspa nisqan jina, ima jatun llank’anatapas chaskispaqa astawanraqmi k’umuykunanchis, juch’uypaqmi qhawarikunanchis (Luc. 9:48). Chhaynaqa angelkuna jina jujkunata servisun, amataq paykunamanta aswan jatunpaqqa qhawarikusunchu.

7. ¿Imaynatan pitapas yuyaychaspa rikuchisunman humilde kasqanchista?

⁷ Juj hermanokunataña wawanchistaña yuyaychananchis kanqa chaypas k’umuykukuywanmi, humilde sonqowanmi chayta ruwana. Sut’intaña imatapas nina kaqtinpas munakuywanmi chayta ruwana. Imaynan chay angelpas Juanta nirqan, chhaynatan mana sientechiq jinalla pitapas rimapayananchis. Chaymantapas jujkunamanta juch’uypaq qhawarikusun chayqa, Bibliaq nisqanman jinan ima yuyaytapas qosun, respetowan munakuywan imataqmi ruwasunpas (Col. 4:6).

ANGELKUNAQA MUNAKUNKUN RUNAKUNATA

8. a) Lucas 15:10 nisqanman jina, ¿imaynatan angelkuna rikuchinku runakuna munakusqankuta? b) ¿Imaynatan angelkuna yanapakushanku Diosmanta willaypi? (Qhaway tapanpi kaq fotota).

⁸ Angelkunaqa allintan yachanku imakunapis runakuna tarikushanku chayta, chaymantapas munakunkun paykunataqa. Chaymantapas paykunaqa kusikunkun mayqen runapas juchanta saqespa Diosman kutimpuqtin, mayqen runapas Bibliata estudiasqanman jina pisi-pisimanta vidanta cambiaqtin, Diosta servipuqtinpas (leey Lucas 15:10). Chaymantapas angelkunaqa yanapakushankun Diosmanta willaypipas (Apo. 14:6). Manapaschá paykunachu runakunawan uya-uyapura rimanku, ichaqa paykunan pusawanchis Diosmanta yachay munaq runakunaman. Arí, manan nisunmanchu: “Juj angelmi juj hermanoman reqsichirqan juj runata”, nispaqa. Jehová Diosqa espiritunwanpas juj runataqa tanqanmanmi payta reqsinanpaq (Hech. 16:​6, 7). Chaywanpas Jehová Diosqa angelkunawanpas yanapachikushanmi. Paykunaqa liston kashanku Diosmanta willaspa puriqtinchis chaypi yanapawananchispaq. (Qhaway “Mañakusqankuman jinan ruwasqa karqan” nisqa willakuyta).b

9. ¿Imaynatan rikuchisunman angelkuna jina runamasinchista munakusqanchista?

⁹ ¿Imaynatan noqanchispas rikuchisunman angelkuna jina runakunata munakusqanchista? Pipas Diospa llaqtanman jujmanta kutimpun chayqa, angelkuna jinan kusikunanchis chaymanta. Sumaqtan munaytan paykunata chaskinanchis (Luc. 15:​4-7; 2 Cor. 2:​6-8). Chaymantapas tukuy atisqanchistan kallpachakunanchis jujkunaman Diosmanta willananchispaq (Ecl. 11:6). Imaynan angelkunaqa predicasqanchispi yanapawanchis, chhaynatan noqanchispas juj hermanokunata yanaparinanchis. Yaqapaschá chayllaraq lloqsishaqkunata pusarisunman; kuraqkunata onqosqakunatapas yanaparisunmanmi.

10. ¿Imatan yachasunman hermana Sarawan imachus pasasqanmanta?

¹⁰ ¿Mana ñaupaqpi jinañachu imatapas ruwayta atisunman chayrí? Chhaynapiña tarikuspapas atisunmanmi jujniraykunamanta angelkunawan kuska llank’aytaqa. Chaypaq yachasun India nacionpi Sara sutiyoq hermanamanta.c Payqa 20 watas precursora kasqa, chaymantas ichaqa onqorapusqa, manañas jatariyta atipusqachu. Chaywansi payqa sinchi llakisqa tarikapusqa. Ichaqa hermanokunaq yanapasqanwan Bibliata leesqanwan imas pisi-pisimanta jujmanta kallpata jap’isqa, jinaspa jujniraymanta predicayta qallarisqa. Manataq cartata qelqanallanpaqpas tiyariyta atiqchu chayqa telefonollantas predicayta qallarisqa. Ñaupaqpi visitasqan runakunatas wajayta qallarisqa, paykunaqa willaqkus pikunas Bibliata estudiayta munallankumantaq chayta. Chhaynallapis iskay kinsa killallapi hermana Saraqa 70 runakunamanña Bibliamanta yachachishasqa. Askhataq karqanku chayqa, manas sapallan estudio qoyta atisqachu, chaysi wakintaqa juj hermanokunaman pasachisqa paykuna estudiota qonankupaq. Chay estudiaqkunamanta wakinqa juñunakuykunamanpas rishankus. ¡May kusikunapaqmi chayqa ¿riki?! Angelkunapas may kusisqachá kashanku hermana Sarawan kuska Diosmanta willaypi llank’aspankuqa.

ANGELKUNAQA ANGUANTAQMI KANKU

11. ¿Imaraykun nisunman “angelkunaqa allin ejemplon kanku aguantaq kaypi” nispa?

¹¹ Dios sonqo angelkunaqa imaymanatan aguantashanku, chaypipas paykunaqa allin ejemplon kanku. Paykunaqa unayñan rikushanku millay ruwaykunata mana allin ruwaykunata. Paykunaq rikushaqtinkun Satanaspas juj angelkunapas Dios contra jatarirqanku (Gén. 3:1; 6:​1, 2; Jud. 6). Bibliapiqa willashanmi imaynas juj supay Diospa angelnin contra qaqa churakurqan chayta (Dan. 10:13). Chaymantapas angelkunaqa allintan yachanku imaynas kay tiempokamaqa pisi runakunalla Diosta servirqanku chayta. Chhaynaña chaypas manan paykunaqa Diostaqa saqenkuchu, aswanmi kusisqa contento payta servishanku. Paykunaqa allintan yachanku imaynas pisi tiempollamanta tukuy mana allinkunata Jehová Dios chinkachipunqa chayta.

12. ¿Iman yanapawasun imatapas aguantananchispaq?

¹² ¿Imaynatan noqanchispas angelkuna jina aguantaq kasunman? Noqanchispas yaqapaschá mana allinkunapi tarikusunchis, jark’asqa imapaschá kasunchis. Ichaqa angelkuna jinan Diospi confiananchis. Payqa chinkachinqapunin chay mana allinkunataqa, chaymantapas angelkuna jinan “kallpachakushanallanchis allin kaqkunata ruwananchispaq” (Gál. 6:9). Noqanchisqa manan sapallanchischu kashanchis, Jehová Diosqa yanapawasunpunin (1 Cor. 10:13). Paymi espiritunta qowasun, chay espirituwanqa atisunmi pacienciakuyta, kusisqataqmi kasunpas (Gál. 5:22; Col. 1:11). Ichaqa, ¿imatan ruwawaq pipas jark’asuqtiyki? Jehová Diospin tukuy sonqo confianayki, manan imatapas manchakunaykichu. Jehová Diosqa qanwanmi kashanqa, paymi kallpata qosunki, paymi yanapasunki (Heb. 13:6).

ANGELKUNAQA YANAPAKUNKUN DIOSPA LLAQTANPI CH’UYA KAUSAY KANANPAQ

13. ¿Ima llank’anatan angelkuna ruwashanku kay tukukuy tiempokunapi? (Mateo 13:​47-49).

¹³ Kay tukukuy tiempokunapiqa juj llank’anatawanmi Jehová Diosqa angelkunaman qorqan. Paykunan kamachisqa kashanku chanin runakuna ukhumanta millay runakunata t’aqanankupaq (leey Mateo 13:​47-49). Yachasqanchis jinapas predicasqanchiswanmi imaymana clase runakuna Diospa llaqtanman jamushanku. Wakinqa Diosmanmi entregakapunku, wakinmi ichaqa mana. Chaypin angelkunaqa chanin runakunamanta millay runakunata t’aqanku, chhaynapin yanapakushanku Diospa llaqtanpi ch’uya kausay kananpaq. Chaywanqa manan nishanchischu: “Diospa llaqtanmanta lloqsipuqkunaqa manan jayk’aqpas kutimunkumanchu”, nispaqa. Nitaqmi: “Diospa llaqtanpiqa manan ima problemapas kanqachu”, nishanchischu. Chhaynaqa, angelkunaqa tukuy atisqankutan kallpachakushanku Diospa llaqtanpi ch’uya kausay kananpaq.

14, 15. ¿Imaynatan rikuchisunman angelkuna jina Diospa llaqtan ch’uya kananta munasqanchista? (Qhaway kay parrafokunapaq fotokunata).

¹⁴ ¿Imaynatan rikuchisunman Diospa llaqtanpi ch’uya kausay kananta munasqanchista? Chaypaqqa kallpachakunanchismi ch’uya kausayta apananchispaq, Diosta servisqanchispas ch’uya kananpaq. Sapankanchismi sonqonchista allinta waqaychakunanchis. Chaypaqqa manan comuntachu piwanpas juñukunanchis, manataqmi Diosmanta t’aqaq ima ruwaytapas ruwananchischu. Chhaynapin yanapakusun Diospa llaqtanpi ch’uya kausay kananpaq (Sal. 101:3). Jujkunatapas yanapananchismi Diospa llaqtanpi ch’uya kausayta apanankupaq. ¿Imaynatan chayta ruwasunman? Sichus yacharusunman pipas jatun juchaman urmasqanta chayqa kallpachananchismi umalliqkunawan rimananpaq. Manachus willakunman chayqa noqanchismi umalliqkunaman willananchis. Chhaynapin chay hermanoqa iñiyninpi yanapasqa kanqa (Sant. 5:​14, 15).

¹⁵ Jatun juchakunaman urmaqkunamanta wakinqa Diospa llaqtanmantan t’aqasqa kanku. Piwanpas chayta ruwakunman chayqa manan paywan juñukunanchischu (1 Cor. 5:​9-13).d Chayta ruwaspan Diospa llaqtantaqa ch’uyata jap’ikun. Chaymantapas paykunawan mana juñukusunchu chayqa yanapasunmi paykunata. ¿Imaynata? Yaqapaschá paykunamanta t’aqakusqanchista rikuspa mayqenpas yuyayman kutinman, jinaspa Diosman kutimpunman. Kutimpunmanchus chayqa Jehová Dios jinan angelkuna jinan kusikunanchis (Luc. 15:7).

16. ¿Imakunatan ruwanayki angelkunata qatikusqaykita rikuchinaykipaq?

¹⁶ May munaypunin angelkunaq tukuy imaymana ruwasqankuta yachayqa, paykunawan kuska llank’aypas. Llapallanchis kallpachakusun paykuna jina humilde sonqo kananchispaq, jujkunata munakunanchispaq, aguantaq kananchispaq, Diospa llaqtanpi ch’uya kausay kananpaq yanapakunanchispaqpas. Dios sonqo angelkunata qatikusun chayqa, wiñay-wiñaypaqmi Jehová Diospa familian ukhupi kasunchis.